1 Ne kabidi: Telejayi, Ô nzubu wa Isalele, nuenu bonsu badi batuka ne badi bipatshibua bua bubi bua balami ba bantu banyi; eyowa, nuenu bonsu badi batuka, badi batangalaka kula, badi ba ku bantu banyi, Ô nzubu wa Isalele. Telejayi kundi, Ô bidîla, ne ngumvuilayi, nuenu bantu ba kula; Mukalenga udi mumbikila kumbukila mu difu; kumbukila munda mua mamuanyi udi mutela dîna dianyi.

2 Ne udi muenza mukana muanyi bu mudi muela wa mvita mutua; mu dileji dia tshianza tshienda udi munsokoka, ne mungenza muketa musenena; mu nsapu wenda wa miketa udi munsokoka;

3 Ne wakamba kundi: Udi musadidi wanyi, Ô Isalele, ungatumbishidibuamu.

4 Pashisha ngakamba, ndi mukuata mudimu tshianana, ndi mujimija bukola buanyi bua patupu ne bua tshianana; bushuwa tshilumbuluilu tshianyi tshidi ne Mukalenga, ne mudimu wanyi ne Nzambi wanyi.

5 Ne mpindiewu, Mukalenga udi wamba—wakamfuka kumbukila mu difu bua ne ngikala musadidi wenda, bua kutuala Yakoba kabidi kudiye—nansha Isalele kayi musangishibua to, kadi nengikala ne butumbi ku mesu a Mukalenga, ne Nzambi wanyi neikala makanda anyi.

6 Ne wakamba: Budi bualu bupepela ne wikala musadidi wanyi bua kujula bisa bia Yakoba, ne bua kupinguluja bakubibua ba Isalele. Nenkuteka kabidi bu bukenka kudi Bena Bisamba bia Benda, bua ne wikala lupandu luanyi tô ne ku ndekelu ya buloba.

7 Nanku Mukalenga udi wamba, Musungidi wa Isalele, Wa Tshijila wenda, kudiye udi muntu upetula, kudiye udi bisamba bikina, kudi musadidi wa bakôkeshi: Bamfumu nebamona ne nebimana kûlu, bakalenga kabidi nebakukuila, bua bualu bua Mukalenga udi ne lulamatu.

8 Mukalenga udi wamba: Mu tshikondu tshikumbana ngakanuteleja, Ô bidîla bia mu mbuwa, ne mu dituku dia lupandu ngakanuambuluisha; ne nenulama, ne nupesha musadidi wanyi bua tshipungidi tshia bantu, bua kushindamija buloba, bua kupianyisha mapianyi matupu;

9 Bua ne wamba kudi bena lukanu: Ndayi; kudi badi basomba mu mîdima: Dilejayi. Nebadia mu njila, ne mashinda abu neikala mu miaba yonsu ya kûlu.

10 Kabakumvua nzala anyi nyota, nansha luya anyi munya kabiakubatûta to; bualu yeya udi ne lusa kudibu neabalombola, mena pabuipi ne mishimi ya mâyi neabaludika.

11 Ne nemvuija mikuna yanyi yonsu njila, ne bibeba bianyi nebibandishibua.

12 Ne pashisha, Ô nzubu wa Isalele, Mona, aba nebafumina kula; ne Mona, aba nebafumina ku node ne ku wesete; ne aba nebafumina ku bulaba bua bena Siene.

13 Imba, Ô diûlu; ne sanka, Ô buloba; bualu makasa a badi ku esete neashindamijibua; ne tudikayi mu kuimba, Ô mikuna; bualu kabakutûtshibua kabidi to; bualu Mukalenga wasambi bantu benda, ne neafuila batatshishibua benda lusa.

14 Kadi, Mona, Siona wambi: Mukalenga wandekedi, ne Mukalenga wanyi wampu moyo—kadi nealeja ne kena to.

15 Bualu mukaji udi mua kupua muanenda udi wamua moyo, bua ne kena muikala ne moyo wa lusa kudi muana wa mu difu dienda anyi? Eyowa, badi mua kupua moyo, kadi mema tshia kukupua moyo to, Ô nzubu wa Isalele.

16 Mona, ndi mukuandika munda mua bianza bianyi; bimanu bieba bidi diba dionsu kumpala kuanyi.

17 Bana beba nebalua kuluisha lukasa bakubutudi; ne bobu badi bakunyanga nebumbuka kûdi.

18 Bandisha mesu eba ku mpenga yonsu ne tangila; bonsu aba badi badisangisha pamua, ne nebalua kûdi. Ne bu mundi ne moyo, Mukalenga udi wamba, neudivuadisha bushuwa nabu bonsu, bu ne busanga, ne udisuika nabu mena bu mukaji ukadi pa kusedibua.

19 Bualu miaba yeba minyanguka ne miaba ya mitupu yeba, ne bulaba bua dibutuka dieba, neikala mena mpindiewu mibumbakana bua benamu; ne bobu bavua bakumina nebikala kula bikola.

20 Bana bawalela, kunyima kua wewa mujimija ba kumpala, nebamba kabidi mu matshi eba: Muaba ewu udi mufinakana bikola buanyi; mpesha muaba bua ne nsomba.

21 Pashisha newamba mu mutshima weba: Nganyi wandeledi aba, bualu ndi mujimija bana banyi, ne ndi nkumba, mukuatshibu, ne ntambakana eku ne eku? Ne nganyi udi mukolesha aba? Monayi, mvua mushala nkayanyi; aba, bavua penyi?

22 Mukalenga Nzambi udi wamba: Monayi, nembandisha tshianza tshianyi kudi Bena Bisamba bia Benda, ne nembandika dibendela dianyi kudi bantu; ne nebatuala bana beba ba baluma mu maboku abu, ne bana beba ba bakaji nebambudibua pa makaya abu.

23 Ne bamfumu nebikala batatueba balami, ne bamfumu bakaji babu bamamueba balami; nebakuinamina ne mpala yabu mitua pa buloba, ne nebalaka lupuishi lua ku makasa eba; ne neumanya ne ndi Mukalenga; bualu badi bantekemena kabakufuishibua bundu to.

24 Bualu nebanyenga muena bukitu tshidiye mukuata mu mvita, anyi bakuatshibu mu dîyi nebapatuishibua anyi?

25 Kadi nanku Mukalenga udi wamba ne, mena bakuatshibu ba muena bukitu nebanyengibua, ne tshidi mutshinyishi mukuata mu mvita netshipatuishibua; bualu nenduisha udi ukuluisha, ne nempandisha bana beba.

26 Ne nendisha badi bakukengesha musunyi wabu nkayabu; nebakuatshika ne mashi abu nkayabu bu ne mvinyo mushema; ne musunyi onsu neumanya ne mema, Mukalenga, ndi Mupandishi weba ne Musungidi weba, Wa Bukitu wa Yakoba.