1 Bualu, monayi, biakalua ne Mukalenga wakakula kudi tatuanyi, eyowa, mena mu tshilota, ne wakamba kudiye: Udi mubeneshibua Lehi, bua bualu bua malu awudi muenza; ne bualu bua udi muikala ne lulamatu ne mumanyisha bantu malu angakakupeshela mukenji, Mona, badi bakeba bua kuangata moyo weba.

2 Ne biakalua ne Mukalenga wakapesha tatuanyi mukenji, mena mu tshilota, ne angata dîku dienda ne aya mu tshipela.

3 Ne biakalua ne wakatumikila dîyi dia Mukalenga, bua nanku wakenza muakamupeshela Mukalenga mukenji.

4 Ne biakalua ne wakaya mu tshipela. Ne wakashiya nzubu wenda, ne bulaba bua bupianyi buenda, ne ngolo wenda, ne mpalata wenda, ne bintu bienda bia mushinga, ne kakaya ne tshintu nansha tshimua to, amu bikala dîku dienda, ne biakudia, ne ntenta, ne wakaya mu tshipela.

5 Ne wakapueka ku mikalu pabuipi ne muelelu wa Mbuwa Mukunza; ne wakenda mu tshipela mu mikalu idi pabuipi menamena ne Mbuwa Mukunza; ne wakenda mu tshipela ne dîku dienda, divua dikala ne mamuanyi, Saliya, ne bakulu banyi ba baluma, bavua bikala Lamana, Lemuele, ne Sama.

6 Ne biakalua ne pavuaye muenda matuku asatu mu tshipela, wakâsa ntenta wenda mu tshibanda ku mpenga wa musulu wa mâyi.

7 Ne biakalua ne wakibaka tshiôshelu tshia mabua, ne wakafila mulambu kudi Mukalenga, ne wakasakidila kudi Mukalenga Nzambi wetu.

8 Ne biakalua ne wakabikila dîna dia musulu, ne Lamana, ne uvua mupongoloka mu Mbuwa Mukunza; ne tshibanda tshivua mu mikalu pabuipi ne mukana muawu.

9 Ne pakamona tatuanyi ne mâyi a musulu avua mapongoloka mu mpokolo wa Mbuwa Mukunza, wakakula kudi Lamana, wamba: Ô ne wikala bu mudi musulu ewu, upueka ne ditungunuka ku mpokolo wa buakana bonsu!

10 Ne wakakula kabidi kudi Lemuele: Ô ne wikala bu mudi tshibanda etshi, mukamakana ne musuminyina, ne kutshinyungi mu dilama dia mikenji ya Mukalenga!

11 Mpindiewu ebi wakakula bua bualu bua dîminyina dia nshingu dia Lamana ne Lemuele; bualu monayi, bakanungena tatuabu mu malu a bungi, bualu bua uvua muntu wa bimônyi, ne uvua mubapatula mu bulaba bua Yelushalema, bua kushiya bulaba bua bupianyi buabu, ne ngolo yabu, ne mpalata yabu, ne bintu biabu bia mushinga, bua kufuila mu tshipela. Ne ebi bakamba uvua muenza bua bualu bua meji masenji a mu mutshima wenda.

12 Ne nanku Lamana ne Lemuele, bikala bakulu, bakanungena tatuabu. Ne bakanungana bualu bua kabavua bamanya ngenzelu wa Nzambi awu wakabafuka to.

13 Nansha kabakitabuija ne Yelushalema, tshimenga tshinena atshi, tshivua mua kubutuka bilondeshila ku mêyi a bambi to. Ne bavua bu mudi Bena Yuda bavua ku Yelushalema, bavua bakeba bua kuangata moyo wa tatuanyi.

14 Ne biakalua ne tatuanyi wakakula kudibu mu tshibanda tshia Lemuele, ne bukola, muikala muwula ne Nyuma, tô ne pakabukuka mibidi yabu kumpala kuenda. Ne wakabapuwisha, bua ne kabakakima kuakula kudiye to; bua nanku, bakenza bu muakabapeshaye mukenji.

15 Ne tatuanyi uvua muikadila mu ntenta.

16 Ne biakalua ne mema, Nefi, muikala nsonga menamena, nansha nanku muikala ne mubidi munena, ne kabidi muikala ne majinga manena a kumanya malu masokoka a Nzambi, bua nanku, ngakabila kudi Mukalenga; ne monayi wakankumbula, ne wakatekesha mutshima wanyi bua ne ngakitabuija mêyi onsu avua tatuanyi muakula; bua nanku, ntshiakamutombokela to bumuvua bana betu ba baluma.

17 Ne ngakakula kudi Sama, muikala mmanyisha kudiye malu avua Mukalenga mumuenesha kundi ku Nyuma wa Tshijila wenda. Ne biakalua ne wakitabuija mêyi anyi.

18 Kadi, monayi, Lamana ne Lemuele bakabenga kumvuila mêyi anyi; ne muikala munyingalala bualu bua dipapisha dia mitshima yabu ngakabila kudi Mukalenga buabu.

19 Ne biakalua ne Mukalenga wakakula kundi, wamba: Udi mubeneshibua, Nefi, bua bualu bua ditabuija dieba, bualu udi munkeba ne dinanukila, ne bupuekela bua mutshima.

20 Ne monsu munualama mikenji yanyi, nenulubuluka, ne nenulombodibua ku bulaba bua dilaya; eyowa, mena bulaba bundi mulongolola buenu; eyowa, bulaba budi bua disungula ku mutu kua malaba makuabu onsu.

21 Ne monsu muakutombokela bana benu ba baluma, nebakoshibua ku mpala kua Mukalenga.

22 Ne monsu muwalama mikenji yanyi, newenjibua mukôkeshi ne mulongeshi pa bana benu ba baluma.

23 Bualu mona, mu dituku diantombokelabu adi, nembatshipa mena ne mutshipu mukola, ne kabakuikala ne bukôkeshi pa ndelanganyi yeba to pa kumbusha bobu pabu bantombokela.

24 Ne bikalabi ne badi bantombokela, nebikala munyasu kudi ndelanganyi yeba, bua kubasonsola mu njila ya divuluka.