1 Ne mpindiewu ndi musua ne numanya, ne kunyima kua tatuanyi, Lehi, mujikija kuamba ku Nyuma bitangila ndelanganyi yenda, biakalua ne Mukalenga wakakula kudiye kabidi, wamba ne kabivua bimpa buenda, Lehi, ne aya ne dîku dienda nkayadi mu tshipela to; kadi ne bana benda ba baluma bangata bana ba bakaji ku dibaka, bua babishila Mukalenga ndelanganyi mu bulaba bua dilaya.

2 Ne biakalua ne Mukalenga wakamupesha mukenji ne mema, Nefi, ne bana betu ba baluma, tupingana kabidi ku bulaba bua Yelushalema, ne tupueka ne Yishemaela ne dîku dienda mu tshipela.

3 Ne biakalua ne mema, Nefi, ne bana betu ba baluma tuakaya kabidi mu tshipela bua kubanda ku Yelushalema.

4 Ne biakalua ne tuakabanda ku nzubu wa Yishemaela, ne tuakasuibua ku mesu kua Yishemaela, mua ne tuakakula kudiye mêyi a Mukalenga.

5 Ne biakalua ne Mukalenga wakatekesha mutshima wa Yishemaela, ne kabidi ba mu nzubu muenda, mua ne bakâsa luendu netu mu tshipela ku ntenta wa tatuanyi.

6 Ne biakalua ne bu mutuvua tuenza luendu mu tshipela, monayi Lamana ne Lemuele, ne babidi ba ku bana ba bakaji ba Yishemaela, ne babidi ba ku bana ba baluma ba Yishemaela ne mêku abu, bakatutombokela; eyowa, mema, Nefi, ne Sama, ne tatuabu, Yishemaela, ne mukaji wenda, ne bana benda ba bakaji bakuabu basatu.

7 Ne biakalua ne mu buntomboji abu bakajinga kupingana ku bulaba bua Yelushalema.

8 Ne mpindiewu mema, Nefi, muikala munyingalala bua dipapa dia mitshima yabu, bua nanku ngakakula kudibu, ngamba, eyowa, mena kudi Lamana ne Lemuele: Monayi nudi bakulu banyi ba baluma, kadi munyi mudibi ne nudi bapapa bikola mu mitshima yenu, ne nudi bafofoma bikola mu meji enu, bua ne nudi nukengela ne mema, muakunyenu, ngakula kunudi, eyowa, ne nuleja tshilejilu?

9 Munyi munudi kanuyi bumvuila dîyi dia Mukalenga to?

10 Munyi munudi bapua moyo ne nuakamona muanjelu wa Mukalenga?

11 Eyowa, ne munyi munudi bapua moyo bintu binena bidi Mukalenga mutuenzela, mu ditupatuisha mu bianza bia Labana, ne kabidi bua ne tupeta miandiku?

12 Eyowa, ne munyi munudi bapua moyo ne Mukalenga udi bua kuenza bintu bionsu bilondeshila ku disua dienda, bua bana ba bantu, bikalabi ne badi benzela ditabuija kudiye? Bua nanku, tuikalayi ne lulamatu kudiye.

13 Ne bikalabi ne tudi ne lulamatu kudiye, netupeta bulaba bua dilaya; ne nenumanya mu tshimua tshikondu tshilualua ne dîyi dia Mukalenga nedikumbajibua bitangila dibutuka dia Yelushalema; bualu malu onsu adi Mukalenga muakula bitangila dibutuka dia Yelushalema adi ne tshia kukumbajibua.

14 Bualu monayi, Nyuma wa Mukalenga udi katataka ulekela kukuata nabu mudimu; bualu monayi, badi bapidia bambi, ne Yelemiya badi bela mu buloko. Ne bakakeba bua kuangata moyo wa tatuanyi, mua ne bakamuipata mu bulaba.

15 Mpindiewu monayi, ndi nnuambila ne nenu bapingana ku Yelushalema nenufua penu nabu. Ne mpindiewu, nuenu basungula, bandayi ku bulaba, ne vulukayi mêyi andi ngakula kunudi, ne binuaya nenufua penu; bualu Nyuma wa Mukalenga udi ungenzeja ne ngakula nanku.

16 Ne biakalua ne pamvua mema, Nefi, muakula kudi bana betu ba baluma mêyi â, bakamfîkila tshiji. Ne biakalua ne bakantua bianza, bualu monayi, bakafîka tshiji menamena, ne bakansuika ne mionji, bualu bavua bakeba bua kuangata moyo wanyi, bua ne banshiya mu tshipela bua kukusudibua kudi nyama ya dîtu.

17 Kadi biakalua ne ngakasambila Mukalenga, ngamba: Ô Mukalenga, bilondeshila ku ditabuija dianyi didi kûdi, umpatuisha mu bianza bia bana betu ba baluma; eyowa, mena umpesha makanda bua ne nkosa mionji eyi indi musuikibua nayi.

18 Ne biakalua ne pangakamba mêyi â, monayi, mionji yakasuluka ku bianza bianyi ne makasa, ne ngakimana kumpala kua bana betu ba baluma, ne ngakakula kudibu kabidi.

19 Ne biakalua ne bakamfîkila tshiji kabidi, ne kukeba kuntua bianza; kadi monayi, umua wa ku bana ba bakaji ba Yishemaela, eyowa, ne kabidi mamuenda, ne umua wa ku bana ba baluma ba Yishemaela, bakasengelela bana betu ba baluma, mua ne bakatekesha mitshima yabu; ne bakalekela kukeba bua kuangata moyo wanyi.

20 Ne biakalua ne bavua ne kanyinganyinga, bua bualu bua bubi buabu, mua ne bakinama kumpala kuanyi, ne bakansengelela ne mbabuikidila bualu buvuabu bangenzela.

21 Ne biakalua ne ngakababuikidila bushuwa bionsu bivuabu benza, ne ngakabakankamija ne basambila Mukalenga Nzambi wabu bua dibuikidila. Ne biakalua ne bakenza nanku. Ne kunyima kua bajikija disambila Mukalenga tuakenza luendu kabidi mu luendu luetu batangila ku ntenta wa tatuetu.

22 Ne biakalua ne tuakalua kuinshi ku ntenta wa tatuetu. Ne kunyima kua mema ne bana betu ba baluma ne bonsu ba mu nzubu mua Yishemaela balua kuinshi ku ntenta wa tatuanyi, bakasakidila kudi Mukalenga Nzambi wabu; ne bakafila mulambu ne milambu miôsha.