1 Telejayi ne umvuayi bualu ebu, Ô nzubu wa Yakoba, badi babikidibua mu dîna dia Isalele, ne badi bapatuka mu mâyi a Yuda, anyi mu mâyi a ditambula, badi baditshipa ku dîna dia Mukalenga, ne badi batêla Nzambi wa Isalele, kadi kabayi baditshipa mu bulelela anyi mu buakana to.

2 Nansha nanku, badi badibikila ne ba mu tshimenga tshia tshijila, kadi kabena beyemena kudi Nzambi wa Isalele to, udi muikala Mukalenga wa Misumba; eyowa, Mukalenga wa Misumba ndina dienda.

3 Monayi, ngamanyishi malu a kala katshia ku mbangilu; ne avua mapatukila mukana muanyi, ne ngaka’aleja. Ngaka’aleja tshimpitshimpi.

4 Ne ngakenza nanku bualu bua mvua mumanya ne udi ne tshitshu, ne nshingu weba udi mufungu wa tshiamua, ne mpala weba tshiamua tshia kalabi;

5 Ne ndi mukumanyisha mena katshia ku mbangilu; kumpala kua kuluawu ngakakulejawu; ne ngaka’aleja bua kutshina ne kulu kuamba ne—Lupingu luanyi lua’enji, ne tshimfuanyi tshianyi tshisonga, ne tshimfuanyi tshianyi tshifumba tshia’eledi mukenji.

6 Wamonyi ne umvu onsu â; ne kuaku’amanyisha to anyi? Ne ndi mukuleja malu mapia-mapia kumbukila ku tshikondu etshi, mena malu masokoka, ne kuvua muamanya to.

7 Adi menjibua mpindiewu, ne kabiyi kumbukila ku mbangilu to, mena kumpala kua dituku diwumvua kuyi muwumvua to avua mamanyishibua kûdi, bua kulu kuamba ne—Monayi mvua muamanya.

8 Eyowa, ne kuvua mumvua to; eyowa, kuvua mumanya to; eyowa, kumbukila ku tshikondu atshi ditshi dieba kadivua dijikuka to; bualu mvua mumanya ne newibila bikola, ne uvua ubikidibua ne musambuki wa mikenji kumbukila mu difu.

9 Nansha nanku, bua bualu bua dîna dianyi nendadika tshiji tshianyi, ne bua disamuna dianyi nendikuatulula kûdi, bua ne ntshikumbushi to.

10 Bualu, Mona, ndi mukupeluja, ndi mukusungula mu tshikutu tshia lutatu.

11 Bua bualu buanyi nkayanyi, eyowa, bua bualu buanyi nkayanyi nanku, bualu ntshiakulekela ne dîna dianyi dinyangushibua to, ne ntshiakupesha butumbi buanyi kudi mukuabu to.

12 Ngumvuila, Ô Yakoba, ne Isalele undi mubikila, bualu mmema; ndi wa kumpala, ne ndi kabidi wa ndekelu.

13 Tshianza tshianyi tshidi kabidi tshiasa tshishimikidi tshia buloba, ne tshianza tshianyi tshia baluma tshidi tshibuikila diûlu. Ndi mbabikila ne bidi bimana kûlu pamua.

14 Nuenu bonsu, disangishayi, ne umvuayi; nganyi munkatshi muabu uvua mumanyisha malu â kudibu? Mukalenga udi mumunanga; eyowa, ne neakumbaja dîyi dienda divuaye mumanyishila kudibu; ne neenzela Babulona mudiye musua, ne diboku dienda nedilua pa mutu pa Bena Kasada.

15 Kabidi, Mukalenga udi wamba: Mema Mukalenga, eyowa, ndi muakula; eyowa, ndi mumubikila bua kumanyisha, ndi mumutuala, ne neavuija njila wenda mulubuluka.

16 Luayi pabuipi nanyi; ntshiena muakula mu musokoku to; katshia ku mbangilu, katshia ku tshikondu kuvuawu mamanyishibua ngakakula; ne Mukalenga Nzambi, ne Nyuma wenda, udi muntuma.

17 Ne nanku Mukalenga udi wamba, Musungidi weba, Wa Tshijila wa Isalele; ndi mumutuma, Mukalenga Nzambi weba udi ukulongesha bua kupeta tshipeta tshimpa, udi ukulombola ku njila uwudi ne bua kuya, wabuenji.

18 Ô bu wewa bua kumvuila mikenji yanyi—pashisha ditalala dieba divua kuikala bu musulu, ne buakana bueba bu mavuala a mbuwa.

19 Ndelanganyi yeba kabidi ivua kuikala bu lusenga; bana ba munda mueba bu mudi nsoka yenda; dîna dienda kadivua diumbushibua anyi dibutuka kumpala kuanyi to.

20 Patukayi mu Babulona, nyemayi Bena Kasada, ne dîyi dia musambu manyishayi, londayi bualu ebu, akulayi ne ku ndekelu wa buloba; ambayi: Mukalenga wasungidi musadidi wenda Yakoba.

21 Ne kabakumvua ne nyota to; wakabalombola kupitshila mu bipela; wakapatuisha mâyi mu dibua buabu; wakapanda kabidi dibua ne mâyi akatshiumbuka.

22 Ne nansha muvuaye muenza onsu â, ne mapita bunena kabidi, kakuena ditalala to, Mukalenga udi wamba, bua bena bubi.