1 Ne biakalua ne bakakukuila Mukalenga, ne bakaya nanyi; ne tukenza mudimu wa bianza wa mabaya a mitshi wa dikema. Ne Mukalenga wakandeja ku musangu ne musangu mushindu umvua ne bua kuenza mudimu wa mabaya a mitshi bua kuenza buatu.

2 Mpindiewu mema, Nefi, ntshiakenza mudimu wa mabaya a mitshi ku mushindu uvua bantu balonga to, anyi ntshiakenza buatu ku mushindu wa bantu to; kadi ngakabuenza ku mushindu uvua Mukalenga mundeja; bua nanku, kabivua ku mushindu wa bantu to.

3 Ne mema, Nefi, ngakabanda ku mukuna misangu ya bungi, ne ngakasambila Mukalenga misangu mivula; bua nanku Mukalenga wakandeja malu manena.

4 Ne biakalua ne kunyima kua mema mujikija buatu, bilondeshila ku dîyi dia Mukalenga, bana betu ba baluma bakamona ne buvua buimpa, ne mudimu wa bianza wabu uvua mushema menamena; bua nanku, bakadipuekesha kabidi kumpala kua Mukalenga.

5 Ne biakalua ne dîyi dia Mukalenga diakalua kudi tatuanyi, ne tuvua ne bua kujuka ne kubuela mu buatu.

6 Ne biakalua ne malaba, kunyima kua tuetu balongolola bintu bionsu, bimuma ne munyinyi bivula bia mu tshipela, ne buitshi bua bungi, ne biakudia bilondeshila muvua Mukalenga mutupeshela mukenji, tuakabuela mu buatu, ne majitu etu onsu ne mamînu etu, ne tshintu tshionsu tshituvua balua natshi, ne muntu yonsu bilondeshila ku bidimu bienda; pananku, tuakabuela bonsu mu buatu, ne bakaji betu ne bana betu.

7 Ne mpindiewu, tatuanyi uvua mulela bana ba baluma babidi mu tshipela; mukulu uvua mubikidibua ne Yakoba ne muakunyi ne Yosefe.

8 Ne biakalua ne kunyima kua tuetu bonsu babuela mu buatu, ne baya ne biakudia bietu ne bintu bituvua bapeshibua mukenji, tuakaya pa mbuwa ne tuakasakibua kumpala kua lupepela batangila ku bulaba bulaya.

9 Ne kunyima kua tuetu basakibua kumpala kudi lupepela bua mutantshi wa matuku a bungi, monayi, bana betu ba baluma ne bana ba baluma ba Yishemaela ne bakaji babu kabidi bakabanga kusanka, mua ne bakabanga kuja, ne kuimba, ne kuakula ne buakulavi buvula, eyowa, ne bakapua moyo ku bukola kayi bakatuadibua apa; eyowa, bakadibandisha mu buakulavi bupita.

10 Ne mema, Nefi, ngakabanga kutshina menamena ne Mukalenga kalu kutufîkila tshiji, ne atutûta bua bualu bua malu mabi etu, bua ne tudînyibua mu ndondu ya mbuwa; bua nanku, mema, Nefi, ngakabanga kuakula kudibu ne bushindama buvula; kadi monayi bakamfîkila tshiji, bamba: Katuena basua ne muakunyetu wa baluma alua mukôkeshi pa mutu petu to.

11 Ne biakalua ne Lamana ne Lemuele bakangangata ne kunsuika ne mionji, ne bakankengesha ne tshikisu tshikola; nansha nanku, Mukalenga wakalekela nanku bua aleja bukola buenda, ne ku dikumbaja dîyi dienda divuaye muamba bitangila bena bubi.

12 Ne biakalua ne kunyima kua bansuika mua ne ntshivua mua kunyunga to, kaleji njila, kavua kalongolodibua kudi Mukalenga, kakalekela kuenza.

13 Bua nanku, kabakamanya kuvuabu ne bua kuludika buatu to, mua ne kuakajuka mvula wa tshipepela tshikola, eyowa, mvula wa muvimbi munena ne utshinyisha, ne bakasakibua tshianyima pa mutu pa mâyi bua mutantshi wa matuku asatu; ne bakabanga kumvua bôwa menamena ne kabalu kufua mu mbuwa; nansha nanku kabakansulula to.

14 Ne mu dituku dinayi, dituvua basakibua tshianyima, tshipepela tshiakabanga kulua tshikola menamena.

15 Ne biakalua ne tukavua pabuipi ne kudînyibua mu ndondu ya mbuwa. Ne kunyima kua tuetu basakibua tshianyima pa mâyi bua mutantshi wa matuku anayi, bana betu ba baluma bakabanga kumona ne bitungu bia Nzambi bivua pa mutu pabu, ne bavua ne tshia kufua amu bobu bakudimuna mutshima ku malu mabi abu; bua nanku, bakalua kundi, ne bakasulula mionji ivua ku tumpombu tua bianzabianyi, ne monayi avua muwula menamena; ne tumpombu tuanyi tuvua tuwula kabidi bikola, ne kusâma kukola kuvua kuabi.

16 Nansha nanku, ngakatangidila Nzambi wanyi, ne ngakamusamuna dituku dijima; ne ntshiakanungena Mukalenga bua bualu bua ntatu yanyi to.

17 Mpindiewu tatuanyi, Lehi, uvua muamba malu a bungi kudibu, ne kabidi kudi bana ba baluma ba Yishemaela; kadi, monayi, bakakanyina bikola ewu onsu uvua ungakuila; ne baledi banyi, bakavua batûtshika bua bidimu bia bungi, ne bikala bakenga ne dibungama divula bua bualu bua bana babu, bakakuluishibua panshi, eyowa, mena pa malalu a babêdi.

18 Bua dibungama ne kanyinganyinga kavula, ne malu mabi a bana betu ba baluma, bakavuishibua pabuipi mena ne kuyishibua diba edi kumonangana ne Nzambi wabu; eyowa, nsuki yabu mitoka ivua pêpi ne kupuekeshibua bua kuladila panshi mu lupuishi; eyowa, mena bavua pabuipi ne kuedibua mu lukita lua mâyi ne kanyinganyinga.

19 Ne Yakoba ne Yosefe kabidi, bikala bateketa, bikala bajinga didishibua dia bungi, bakabungama bua bualu bua ntatu ya mamuabu; ne mukaji anyi kabidi ne binsonji bienda ne masambila enda, ne bana banyi kabidi, kabakatekesha mitshima ya bana betu ba baluma to bua ne bansulula.

20 Ne kakuvua tshintu to amu bikala bukola bua Nzambi, buvua bubakanyina ne lufu, tshivua kutekesha mitshima yabu; bua nanku, pakamonabu ne bavua pêpi ne kudînyibua mu ndondu ya mbuwa bakakudimuna mutshima ku bualu buvuabu benza, mua ne bakansulula.

21 Ne biakalua ne kunyima kua bansulula, monayi, ngakangata kaleji njila, ne kakenda mumvua musua. Ne biakalua ne ngakasambila Mukalenga; ne kunyima kua mema musambila mpepela yakalekela, ne mvula wa tshipepela wakalekela, ne kuvua ditukija dinena.

22 Ne biakalua ne mema, Nefi, ngakaludika buatu, bua ne tuakenda pa mâyi kabidi batangila ku bulaba bulaya.

23 Ne biakalua ne kunyima kua tuetu benda pa mâyi bua mutantshi wa matuku a bungi tuakafika ku bulaba bulaya; ne tuakadiata pa bulaba, ne tuakâsa ntenta yetu; ne tuakabubikila ne bulaba bulaya.

24 Ne biakalua ne tuakabanga kudima buloba, ne tuakabanga kukuna mamînu; eyowa, tuakela mamînu etu onsu mu buloba, atuvua batuala kumbukila ku bulaba bua Yelushalema. Ne biakalua ne akakola menamena; bua nanku, tuakabeneshibua bikola.

25 Ne biakalua ne tuakasangana pa mutu pa bulaba bua dilaya, bu mutuvua tuenza luendu mu tshipela, ne kuvua nyama mu mêtu ya mishindu yonsu, bubidi bua ngomba mukaji ne ngomba muluma, ne mpunda ne kabalu, ne mbuji ne mbuji wa dîtu, ne mishindu yonsu ya nyama ya dîtu, ivua bua dikuatshisha kudi bantu. Ne tuakasangana mishindu yonsu ya biamua, eyowa bionsu bia ngolo, ne bia mpalata, ne bia kabanda.