Mukanda wa Kumpala wa Nefi
Bumfumu buenda ne Dikuatshila dienda
Mulubu wa Lehi, ne mukaji wenda Saliya, ne bana benda ba baluma banayi, bikala babikidibua, (kubangila ku muana wa kumpala) Lamana, Lemuele, Sama, ne Nefi. Mukalenga udi udimuisha Lehi bua kumbuka ku bulaba bua Yelushalema, bualu bua udi wamba ku Nyuma kudi bantu bitangila malu mabi abu ne badi bakeba bua kuangata moyo wenda. Udi wasa luendu lua matuku asatu mu tshipela ne dîku dienda. Nefi udi wangata bana babu ba baluma ne upinganyina miandiku ya Bena Yuda ku bulaba bua Yelushalema. Mulubu wa makenga abu. Badi bangata bana ba bakaji ba Yishemaela bu bakaji babu. Badi bangata mêku abu ne baya mu tshipela. Makenga ne ntatu yabu mu tshipela. Njila ya ngendu yabu. Badi balua ku mâyi manena. Bana babu ne Nefi ba baluma badi bamutombokela. Udi ubapuwisha, ne wenza buatu. Badi babikila dîna dia muaba ewu ne Buvula. Badi basabuka mâyi manena babuela mu bulaba bulaya, ne bikuabu. Ebi bidi bilondeshila ku mulubu wa Nefi; anyi mu mêyi makuabu, mema, Nefi, ngafundi miandiku eyi.
Shapita 1
Nefi udi ubanga miandiku ya bantu benda—Lehi udi umona mu tshimônyi dikunji dia kapia ne ubala mu mukanda wa mambi—Udi usamuna Nzambi, udianjila kuamba dilua dia Mashiya, ne wamba ku Nyuma bua dibutuka dia Yelushalema—Udi ukengeshibua kudi bena Yuda. Pabuipi ne 600 k.d.K.
1 Mema, Nefi, muikala muledibua kudi baledi bimpa, bua nanku mvua mulongeshibua kakesa mu dimanya dionsu dia tatuanyi; ne muikala mumona ntatu ya bungi mu matuku anyi, nansha nanku, muikala musuibua bikola kudi Mukalenga mu matuku anyi onsu; eyowa, muikala mupeta dimanya dikola dia buimpa ne dia malu masokoka a Nzambi, bua nanku ndi ngenza miandiku ya bienzedi bianyi mu matuku anyi.
2 Eyowa, ndi ngenza miandiku mu muakulu wa tatuanyi, udi muikala wa dimanya dia bena Yuda ne muakulu wa bena Ejipitu.
3 Ne ndi mumanya ne miandiku indi ngenza idi milelela; ne ndi ngenza ne tshianza tshianyi nkayanyi; ne ndi nyenza bilondeshila ku dimanya dianyi.
4 Bualu biakalua ku ntuadijilu wa tshidimu tshia kumpala tshia bumfumu bua Sedekiya, mfumu wa Yuda, (tatuanyi, Lehi, muikala muikadila mu Yelushalema matuku enda onsu); ne mu tshidimu tshiotshimua atshi kuakalua bambi ba bungi, bamba ku Nyuma kudi bantu ne badi ne tshia kukudimuna mutshima, anyi tshimenga tshinena tshia Yelushalema netshibutuka bulelela.
5 Pananku biakalua ne tatuanyi, Lehi, bu muvuaye uya wakasambila Mukalenga, eyowa, mena ne mutshima wenda onsu, bua bantu benda.
6 Ne biakalua ne bu muvuaye usambila Mukalenga, kuakalua dikunji dia kapia ne diakikadila pa dibua kumpala kuenda; ne wakamona ne kumvua bia bungi; ne bua bualu bua malu akamonaye ne kumvuaye, wakakanka ne kuzakala menamena.
7 Ne biakalua ne wakapingana ku nzubu wenda ku Yelushalema; ne wakadiupuila pa bulalu buenda, muikala mutûtshika kudi Nyuma ne kudi malu avuaye mumona.
8 Ne muikala nanku mutûtshika kudi Nyuma, wakambudibua kula mu tshimônyi, mena ne wakamona diûlu diunzuluka, ne wakela meji mumona Nzambi musomba pa nkuasa wenda wa butumbi, munyunguludibua kudi bisumbu bia banjelu kabiyi kubala bamueneka bu bavua bimba misambu ne basamuna Nzambi wabu.
9 Ne biakalua ne wakamona Umua utulukila munkatshi mua diûlu, ne wakamona ne dikenka dienda divua dipita edi dia diba mu mujalamu.
10 Ne wakamona kabidi dikumi ne babidi bakuabu bamulonda, ne dikenka diabu divua dipita dia mitoto mûlu.
11 Ne bakalua panshi ne bakaya pa mpala wa buloba; ne wa kumpala wakalua ne wakimana kumpala kua tatuanyi, ne wakamupesha mukanda, ne wakamuambila ne abala.
12 Ne biakalua ne bu muvuaye ubala, wakuwula ne Nyuma wa Mukalenga.
13 Ne wakabala, wamba: Diakabi, diakabi kudi Yelushalema, bualu ngamonyi malu mapita bubi eba! Eyowa, ne tatuanyi wakabala malu a bungi bitangila Yelushalema—ne neabutuka, ne benamu; ba bungi nebafua ku muela wa mvita, ne ba bungi nebambudibua bakuatshibu ku Babulona.
14 Ne biakalua ne pakabala tatuanyi ne pakamonaye malu a bungi manena ne a dikema, wakamba mu kutua tshikemu malu a bungi kudi Mukalenga; a bu nanku: Midimu yeba idi minena ne ya dikema, Ô Mukalenga Nzambi wa Bukitu Bonsu! Nkuasa weba wa butumbi udi kûlu mu diûlu, ne bukola, ne buimpa, ne lusa bieba bidi pa mutu pa bena pa buloba bonsu; ne, bualu bua udi ne lusa, kuakulekela ne badi balua kûdi, bafua to!
15 Ne ku mushindu ewu ki muvua ngakuilu wa tatuanyi mu disamuna dia Nzambi wenda; bualu anyima wenda wakasanka, ne mutshima wenda mujima uvua muwula, bua bualu bua malu avuaye mumona, eyowa, avua Mukalenga mumuleja.
16 Ne mpindiewu mema, Nefi, ntshiena ngenza mulubu mujima wa malu adi tatuanyi mufunda, bualu udi mufunda malu a bungi akamonaye mu bimônyi ne mu bilota; ne udi kabidi mufunda malu a bungi akambaye ku Nyuma ne akakulaye kudi bana benda, angabenga kufundila mulubu mujima.
17 Kadi nengenza mulubu wa bienzedi bianyi mu matuku anyi. Monayi, ndi ngenza tshikosu tshia miandiku ya tatuanyi, pa bitata bindi muenza ne bianza bianyi nkayanyi; pananku, kunyima kua mema kujikija kukosolola miandiku ya tatuanyi, pashisha nengenza mulubu wa moyo wanyi nkayawu.
18 Bua nanku, ndi musua ne numanya, ne kunyima kua Mukalenga muleja malu a bungi a dikema kudi tatuanyi, Lehi, eyowa, bitangila dibutuka dia Yelushalema, monayi wakaya munkatshi mua bantu, ne wakabanga kuamba ku Nyuma ne kumanyisha kudibu bitangila malu avuaye mumona ne mumvua.
19 Ne biakalua ne bena Yuda bakamuseka bua bualu bua bubi ne malu akajadikaye buabu; bualu bulelela wakajadika bua bubi buabu ne bua malu mapita bubi abu; ne wakajadika ne malu akamonaye ne akumvuaye, ne kabidi malu akabalaye mu mukanda, mamueneshibua patoka bua dilua dia Mashiya, ne kabidi disungila dia ba pa buloba.
20 Ne pakumvua Bena Yuda malu â bakamufîkila tshiji; eyowa, mena bu ne bambi ba kala, bakipatabu, ne bakasabu mabua, ne bakashipabu; ne bakakeba kabidi moyo wenda, bua bawangata. Kadi monayi, mema, Nefi, nendeja kunudi ne midimu mimpa ya lusa lua Mukalenga idi pa bonsu badiye musungula, bua bualu bua ditabuija diabu, bua kubavuija ne bukitu mena ne ku bukola bua didipatuisha.