1 Ne biakalua ne mema, Nefi, kunyima kua kuakula ne Mukalenga, ngakapingana ku ntenta wa tatuanyi.

2 Ne biakalua ne wakakula kundi, wamba: Mona, ndi mulota tshilota, munda muatshi Mukalenga mumpesha mukenji ne wewa ne bana benu ba baluma nupingana ku Yelushalema.

3 Bualu mona, Labana udi ne miandiku ya Bena Yuda ne kabidi bulondanganyi bua bankambua banyi, ne bidi bidi bikanunyibua pa bitata bia kalabi.

4 Bua nanku, Mukalenga mumpesha mukenji ne wewa ne bana benu ba baluma nuya ku nzubu wa Labana, ne nukeba miandiku eyi, ne nuyituala apa mu tshipela.

5 Ne mpindiewu, mona bana benu ba baluma badi banungana, bamba, ebu budi bualu bukola bundi mulomba kudibu; kadi mona ntshiena mubulomba kudibu to, kadi udi mukenji wa kudi Mukalenga.

6 Bua nanku ndâku, muananyi wa baluma, ne neusuibua kudi Mukalenga, bualu bua kuena munungana to.

7 Ne biakalua ne mema, Nefi, ngakamba kudi tatuanyi: Nenya ne nengenza bintu bidi Mukalenga mumpeshela mukenji, bualu ndi mumanya ne Mukalenga kena upesha mikenji kudi bana ba bantu to, amu yeya mulongolola njila bua bobu kukumbaja tshintu tshidiye mubapeshela mukenji.

8 Ne biakalua ne pakumvua tatuanyi mêyi â wakasanguluka menamena, bualu wakamanya ne mvua muikala mubeneshibua kudi Mukalenga.

9 Ne mema, Nefi, ne bana betu ba baluma, tuakâsa luendu luetu mu tshipela, ne ntenta yetu, bua kubanda ku bulaba bua Yelushalema.

10 Ne biakalua ne patuakabanda ku bulaba bua Yelushalema, mema ne bana betu ba baluma tuakebejangana.

11 Ne tuakela nshobu—nganyi wa kutudi waya ku nzubu wa Labana. Ne biakalua ne nshobu wakakuata Lamana; ne Lamana wakabuela mu nzubu wa Labana, ne wakayikila nenda bu muvuaye musomba mu nzubu muenda.

12 Ne wakajinga kupeta kudi Labana miandiku ivua mikanunyibua pa bitata bia kalabi, ivua mikala ne bulondanganyi bua bankambua batatuanyi.

13 Ne monayi, biakalua ne Labana wakafîka tshiji, ne wakamuipata ku mpala kuenda; ne kakasua ne angata miandiku eyi to. Bua nanku, wakamba kudiye: Mona udi munyengi, ne nenkushipa.

14 Kadi Lamana wakanyema ku mpala kuenda, ne wakalonda malu avua Labana muenza, kutudi. Ne tuakabanga kuikala ne kanyinganyinga menamena, ne bana betu ba baluma bavua pabuipi ne kupingana kudi tatuanyi mu tshipela.

15 Kadi monayi ngakamba kudibu ne: Bu mudi Mukalenga ne moyo, ne bu mutudi ne moyo, katuakupueka kudi tatuetu mu tshipela to tô ne patudi tukumbaja bualu budi Mukalenga mutupeshela mukenji.

16 Pananku, tuikalayi ne lulamatu mu dilama dia mikenji ya Mukalenga; bua nanku tupuekayi ku bulaba bua bupianyi bua tatuetu, bualu monayi udi mushiya ngolo, ne mpalata, ne mishindu yonsu ya mabanji. Ne muenza bionsu ebi bua mikenji ya Mukalenga.

17 Bualu uvua mumanya ne Yelushalema neabutuka bulelela, bua bubi bua bantu.

18 Bualu monayi, badi bapidia mêyi a bambi. Bua nanku, bu tatuanyi mushala mu bulaba ebu kunyima kua yeya mupeshibua mukenji bua kunyema bulaba ebu, monayi, uvua penda ufua. Bua nanku, bivua bikengedibua ne anyema bulaba ebu.

19 Ne monayi, bidi lungenyi kudi Nzambi ne tupeta miandiku eyi, bua ne tukubila bana betu muakulu wa batatuetu;

20 Ne kabidi bua ne tubakubila mêyi adi mikala makudibua mukana mua bambi bansantu bonsu, adi mikala mafidibua kudibu ku Nyuma ne bukola bua Nzambi, katshia buloba buabanga, mena ne tshikondu tshia lelu etshi.

21 Ne biakalua ne ku mushindu wa ngakuilu ewu ngakitabujija bana betu ba baluma, ne bikala ne lulamatu mu dilama mikenji ya Nzambi.

22 Ne biakalua ne tuakapueka ku bulaba bua bupianyi buetu, ne tuakasangisha ngolo wetu pamua, ne mpalata yetu, ne bintu bietu bia mushinga.

23 Ne kunyima kua tuetu basangisha bintu ebi pamua, tuakabanda kabidi ku nzubu wa Labana.

24 Ne biakalua ne tuakabuela kudi Labana, ne tuakajinga kudiye ne atupesha miandiku ivua mikanunyibua pa bitata bia kalabi, bituvua kumupeshela ngolo wetu, ne mpalata yetu, ne bintu bietu bionsu bia mushinga.

25 Ne biakalua ne pakamona Labana bintu bietu, ne bivua bia bungi menamena, wakabiumvuila lukuka, mua ne wakatuipata, ne wakatuma basadidi benda bua kutushipa, bua angata bintu bietu.

26 Ne biakalua ne tuakanyema kumpala kua basadidi ba Labana, ne tuakenzejibua bua kushiya bintu bietu panyima, ne biakapona mu bianza bia Labana.

27 Ne biakalua ne tuakanyema mu tshipela, ne basadidi ba Labana kabakatukuata to, ne tuakasokoma munda mua lubuebua.

28 Ne biakalua ne Lamana wakamfîkila tshiji, ne tatuanyi kabidi; ne kabidi Lemuele wakamfîkila tshiji, bualu wakumvuila mêyi a Lamana. Bua nanku Lamana ne Lemuele bakakula mêyi makola kutudi, bakunyi babu ba baluma, ne bakatutûta mena ne mulangala.

29 Ne biakalua ne bu muvuabu batutûta ne mulangala, monayi, muanjelu wa Mukalenga wakalua ne kuimana kumpala kuabu, ne wakakula kudibu, wamba: Bua tshinyi nudi nutûta muakunyenu ne mulangala? Kanuena bamanya ne Mukalenga udi mumusungula bua kuikala mukôkeshi pa mutu penu, ne ebi bua malu mabi enu anyi? Monayi bandayi kabidi ku Yelushalema, ne Mukalenga neafila Labana mu bianza bienu.

30 Ne kunyima kua muanjelu muakula netu, wakaya.

31 Ne kunyima kua muanjelu muya, Lamana ne Lemuele bakabanga kabidi kunungana, bamba: munyi mudibi mua kuenzeka ne Mukalenga neafila Labana mu bianza bietu? Monayi, udi muntu wa bukitu, ne udi mua kupesha bantu mukenji, eyowa, mena udi mua kushipa makumi atanu; kadi bua tshinyi tuetu to?