1 Ne mpindiewu mema, Nefi, ndi ntungunuka ne kufunda mulubu wa bienzedi bianyi pa bitata ebi, ne bumfumu buanyi ne disadila dianyi; pananku, bua kutungunuka ne mulubu wanyi, ndi ne tshia kuakula kakesa bua malu a tatuanyi, ne kabidi bua a bana betu ba baluma.

2 Bualu monayi, biakalua ne kunyima kua tatuanyi muakula mêyi a mu tshilota tshienda, ne kabidi bua kubakankamija bua kuikala ne dinanukila dionsu, wakakula kudibu bitangila Bena Yuda—

3 Ne kunyima kua babutuka, mena tshimenga tshinena tshia Yelushalema atshi, ne ba bungi bambudibua mu bukuatshibu ku Babulona, bilondeshila ku tshikondu tshikumbanyina Mukalenga nkayenda, nebapingana kabidi, eyowa, mena kulopokibua ku bukuatshibu; ne kunyima kua balopokibua ku bukuatshibu nebâsa kabidi mu bulaba bua bupianyi buabu.

4 Eyowa, mena bidimu nkama isambombo katshia ku tshikondu tshiakumbuka tatuanyi ku Yelushalema, muambi Nzambi neabisha munkatshi mua Bena Yuda—mena Mashiya, anyi, mu mêyi makuabu, Mupandishi wa ba pa buloba.

5 Ne wakakula kabidi bitangila bambi, bunena bua bungi buabu buvua bujadika bua malu â, bitangila Mashiya ewu, uvuaye muakula, anyi Musungidi wa ba pa buloba.

6 Pananku, bukua bantu bonsu buvua mu ngikadilu wa dijimina ne dipona, ne buvua bua kushala nanku kashidi, amu beyemena kudi Musungidi ewu.

7 Ne wakakula kabidi bitangila muambi walua kumpala kua Mashiya, bua kulongolola njila wa Mukalenga—

8 Eyowa, mena neaya ne abila mu tshipela wamba: Longololayi njila wa Mukalenga, ne lulamijayi njila yenda; bualu kudi umua munkatshi muenu muimana unudi kanuyi bamanya to; ne udi ne bukitu kumpita, muena nshinga wa tshisabata undi ntshiena mukumbana bua kusulula to. Ne tatuanyi wakakula bia bungi bitangila bualu ebu.

9 Ne tatuanyi wakamba ne neatambuisha mu Betabala, dishiya dia Yadene; ne wakamba kabidi ne neatambuisha ne mâyi; mena ne neatambuisha Mashiya ne mâyi.

10 Ne kunyima kua yeya mutambuisha Mashiya ne mâyi, neamanya ne kujadika ne wakatambuisha Muana wa Mukoku wa Nzambi, udi ne tshia kumbusha mibi ya ba pa buloba.

11 Ne biakalua ne kunyima kua tatuanyi mêyi â wakakula kudi bana betu ba baluma bitangila lumu luimpa luayishibua munkatshi mua Bena Yuda, ne kabidi bitangila dishinguluka dia Bena Yuda mu dipanga dia ditabuija. Ne kunyima kua bashipa Mashiya, walua, ne kunyima kua muikala mushipibua neajuka ku bafua, ne neadimuenesha, ku Nyuma wa Tshijila, kudi Bena Bisamba bia Benda.

12 Eyowa, mena tatuanyi wakakula bia bungi bitangila Bena Bisamba bia Benda, ne kabidi bitangila nzubu wa Isalele, ne neafuanyikijibua bu mudi ne mutshi wa olive, wa matamba atuka ne atangalaka pa mpala onsu wa buloba.

13 Bua nanku, wakamba bidi bikengedibua ne tulombodibua ne dipunga dimua ku bulaba bua dilaya, mu dikumbaja dia dîyi dia Mukalenga, ne tutangalaka pa mpala onsu wa buloba.

14 Ne kunyima kua nzubu wa Isalele mutangalaka, nebasangishibua pamua kabidi; anyi, mu tshikosu, kunyima kua Bena Bisamba bia Benda bapeta tshiwudi tshia Lumu Luimpa, matamba a ntuadijilu a mutshi wa olive, anyi bishadi bia nzubu wa Isalele, nealamatshishibuaku, anyi nebilua ku dimanya dia Mashiya mulelela, Mukalenga wabu ne Musungidi wabu.

15 Ne ku mushindu wa ngakuilu ewu tatuanyi wakamba ku Nyuma ne kuakula kudi bana betu ba baluma, ne kabidi malu makuabu a bungi andi ntshiyi mfunda mu mukanda ewu to; bualu ndi mufunda bungi buawu onsu avua akengela buanyi mu mukanda wanyi mukuabu.

16 Ne malu onsu â, andi muakuila, avua menzeka bu muvua tatuanyi muikadila mu ntenta, mu tshibanda tshia Lemuele.

17 Ne biakalua kunyima kua mema, Nefi, muikala mumvua mêyi onsu a tatuanyi, bitangila malu onsu avuaye mumona mu tshimônyi, ne kabidi malu avuaye muakula ku bukola bua Nyuma wa Tshijila, bukola buvuaye mupetela ku ditabuija kudi Muana wa Nzambi—ne Muana wa Nzambi uvua Mashiya walua—mema, Nefi, ngakajinga kabidi ne mmona, ne ngumvua, ne mmanya malu â, ku bukola bua Nyuma wa Tshijila, udi dipa dia Nzambi kudi bonsu badi bamukeba ne dinanukila, momumua mu bikondu bia kala ne mu tshikondu tshiadimueneshaye kudi bana ba bantu.

18 Bualu udi momumua makelela mushala, lelu, ne bua kashidi; ne njila udi mulongolodibua bua bantu bonsu ku tshishimikidi tshia buloba, bikalabi ne badi bakudimuna mutshima ne balua kudiye.

19 Bualu bua udi ukeba ne dinanukila neapeta; ne malu masokoka a Nzambi neabuludibua kudibu, ku bukola bua Nyuma wa Tshijila, momumua mu bikondu ebi ne mu bikondu bia kala, ne momumua mu bikondu bia kala ne mu bikondu bitshilualua; bua nanku, njila wa Mukalenga udi tshijengu tshimua tshia tshiendelela.

20 Bua nanku vuluka, Ô muntu, bua bienzedi bieba bionsu neuvuishibua mu dilumbuluisha.

21 Bua nanku, biwikala mukeba kuenza bubi mu matuku a ditêtshibua dieba, apu neusanganyibua ne manyanu kumpala kua nkuasa wa tshilumbuluilu wa Nzambi; ne tshintu nansha tshimua tshia manyanu katshiena mua kuikadila ne Nzambi to; bua nanku, udi ne tshia kuimanshibua bua kashidi.

22 Ne Nyuma wa Tshijila udi upesha bukôkeshi ne ngakula malu â, ne ntshi’avidi to.