1 Ne mpindiewu biakalua ne kunyima kua mema, Nefi, muikala mujikija diakula kudi bana betu ba baluma, monayi bakamba kundi: Udi mutumanyisha malu makola, matupita makanda.

2 Ne biakalua ne ngakamba kudibu ne mvua mumanya ne mvua muakula malu makola kudi bena bubi, bilondeshila ku bulelela; ne ndi mbingisha bakana, ne njadika ne nebabandishibua ku dituku dia ndekelu; bua nanku, bapîla badi bamona bulelela ne budi lutatu, bualu budi bubatapa ku mutshima.

3 Ne mpindiewu bana betu ba baluma, bu ne nuvua bakana ne nuitaba bua kumvuila bulelela, ne kuteya ntema kudibu, bua nuenda bôloloka kumpala kua Nzambi, apu kanuakunungana bua bualu bua bulelela to, ne nuamba: Udi wakula malu makola kutudi.

4 Ne biakalua ne mema, Nefi, ngakakankamija bana betu ba baluma, ne dinanukila dionsu, bua kulama mikenji ya Mukalenga.

5 Ne biakalua ne bakadipuekesha nkayabu kumpala kua Mukalenga; mua ne ngakumvua disanka ne matekemena manena kudibu, bua ne benda mu njila ya buakana.

6 Mpindiewu, malu onsu â mambibua ne menjibua bu muvua tatuanyi muikadila mu ntenta mu tshibanda tshivuaye ubikila ne Lemuele.

7 Ne biakalua ne mema, Nefi, ngakangata umua wa ku bana ba bakaji ba Yishemaela ku dibaka; ne kabidi, bana betu ba baluma bakangata ba ku bana ba bakaji ba Yishemaela ku dibaka; ne Zolama kabidi wakangata muana wa buta wa bakaji wa Yishemaela ku dibaka.

8 Ne nanku tatuanyi wakakumbaja mikenji yonsu ya Mukalenga ivua mikala mipeshibua kudiye. Ne kabidi mema, Nefi, mvua muikala mubeneshibua kudi Mukalenga menamena.

9 Ne biakalua ne dîyi dia Mukalenga diakakula kudi tatuanyi butuku, ne kumupesha mukenji ne malaba âsa luendu luenda mutangila mu tshipela.

10 Ne biakalua ne bu muakajuka tatuanyi mu dinda, ne kuya ku tshibi tshia ntenta, wakakema bikola pakamonaye panshi dibulungu mudimu wa bianza wa dikema; ne divua dia tshiamua tshia kalabi tshishema. Ne munda mua dibulungu muvua tulonda tubidi; ne kamua kavua kafunkuna kutuvua ne bua kuya mu tshipela.

11 Ne biakalua ne tuakakunguija pamua bintu bionsu bituvua ne bua kuambula mu tshipela, ne bishadi bionsu bia biakudia bivua Mukalenga mutupesha; ne tuakangata mamînu a nkuaminu yonsu bua tuambula mu tshipela.

12 Ne biakalua ne tuakangata ntenta yetu ne kuya mu tshipela, dinsambu dia musulu wa Lamana.

13 Ne biakalua ne tuakenza luendu bua mutantshi wa matuku anayi, pabuipi ne njila wa ku sude ne sude ne esete, ne tuakâsa ntenta yetu kabidi; ne tuakabikila dîna dia muaba ewu ne Shazele.

14 Ne biakalua ne tuakangata mata etu ne miketa yetu, ne kuya mu tshipela bua kushipa biakudia bua mêku etu; ne kunyima kua tuetu bashipa biakudia bua mêku etu tuakapingana kabidi kudi mêku etu mu tshipela, ku muaba wa Shazele. Ne tuakaya kabidi mu tshipela, tulonda njila wa momumua, tushala mu bitupa bifuka kupita bia mu tshipela, bivua bikala mu mikalu, pabuipi ne Mbuwa Mukunza.

15 Ne biakalua ne tuakenza luendu bua mutantshi wa matuku a bungi, tushipa biakudia mu njila, ne mata etu ne miketa yetu ne mabua etu ne bieledi bietu.

16 Ne tuakalonda njila ya dibulungu, ivua itulombola ku bitupa bipita bufuka bia mu tshipela.

17 Ne kunyima kua tuetu benza luendu bua mutantshi wa matuku a bungi, tuakâsa ntenta yetu bua mutantshi wa diba, bua tudikishisha kabidi ne tupeta biakudia bua mêku etu.

18 Ne biakalua ne bu mumvua mema, Nefi, nya kushipa biakudia, monayi, ngakatshibula buta buanyi, buvua buenjibua ne tshiamua tshikolesha tshishema; ne kunyima kua mema mutshibula buta buanyi, monayi, bana betu ba baluma bakamfîkila tshiji bua bualu bua dijimija dia buta buanyi, bualu katuakapeta biakudia to.

19 Ne biakalua ne tuakapingana ku mêku etu katuyi ne biakudia to, ne bikala batshioka bikola, bua bualu bua luendu luabu, bakakenga bikola bua dipanga dia biakudia.

20 Ne biakalua ne Lamana ne Lemuele ne bana ba baluma ba Yishemaela bakabanga kunungana menamena, bua bualu bua makenga ne ntatu yabu mu tshipela; ne tatuanyi kabidi wakabanga kunungena Mukalenga Nzambi wenda; eyowa, bavua bonsu bikala banyingalala menamena, mena bua ne bakanungena Mukalenga.

21 Mpindiewu biakalua ne mema, Nefi, muikala mutatshishibua kudi bana betu ba baluma bua bualu bua dijimija dia buta buanyi, ne mata abu mikala majimija nkamba yawu, biakabanga kuikala bikola menamena, eyowa, mua ne katuvua mua kupeta biakudia to.

22 Ne biakalua ne mema, Nefi, ngakakula bikola kudi bana betu ba baluma, bualu bua bavua bapapisha mitshima yabu kabidi, mena ne ku didiwula Mukalenga Nzambi wabu.

23 Ne biakalua ne mema, Nefi, ngakenza buta kuangatshila ku mutshi, ne kuangatshila ku kasanzu kalulama, muketa; bua nanku, ngakadipaya ne buta ne muketa, ne tshieledi ne ne mabua. Ne ngakamba kudi tatuanyi: Kunyi kungaya bua kupeta biakudia?

24 Ne biakalua ne wakebeja kudi Mukalenga, bualu bavua badipuekesha bua bualu bua mêyi anyi; bualu mvua muamba malu a bungi kudibu ne makanda a anyima wanyi.

25 Ne biakalua ne dîyi dia Mukalenga diakalua kudi tatuanyi; ne uvua bulelela mutandishibua bua bualu bua dinungena Mukalenga dienda, mua ne uvua muvuishibua panshi mu ndondu ya kanyinganyinga.

26 Ne biakalua ne dîyi dia Mukalenga diakamba kudiye: Tangila pa mutu pa dibulungu, ne Mona malu adi mafundibua.

27 Ne biakalua ne pakamona tatuanyi malu avua mafundibua pa mutu pa dibulungu, wakatshina ne kuzakala menamena, ne kabidi bana betu ba baluma ne bana ba baluma ba Yishemaela ne bakaji betu.

28 Ne biakalua ne mema, Nefi, ngakamona tulonda tuvua mu dibulungu, ne tuvua tuenda bilondeshila ku ditabuija ne dinanukila ne ntema bituakafila kuditu.

29 Ne kuvua kabidi mfundilu mupia-mupia mufundibua pa mutu patu, uvua muikala muteketa bua kubala, wakatupesha ngumvuilu bitangila njila ya Mukalenga; ne uvua ufundibua ne ushintuludibua ku musangu ne ku musangu, bilondeshila ku ditabuija ne dinanukila dituvua tumupesha. Ne nanku tudi tumona ne ku njila mikesa Mukalenga udi ukumbaja malu manena.

30 Ne biakalua ne mema, Nefi, ngakaya ku musongu wa mukuna, bilondeshila ku njila ivua mipeshibua pa mutu pa dibulungu.

31 Ne biakalua ne ngakashipa nyama ya dîtu, mua ne ngakapeta biakudia bua mêku etu.

32 Ne biakalua ne ngakapingana ku ntenta yetu, muambula nyama imvua mushipa; ne mpindiewu pakamonabu ne mvua mupeta biakudia, bu muvuadi dinena disanka diabu! Ne biakalua ne bakadipuekesha kumpala kua Mukalenga, ne bakela tuasakidila kudiye.

33 Ne biakalua ne tuakâsa kabidi luendu luetu, tuenza luendu pabuipi ne njila wa momumua bu wa ku mbangilu; ne kunyima kua tuetu benza luendu bua mutantshi wa matuku a bungi tuakâsa ntenta yetu kabidi, bua ne tutudila mutantshi wa dibua.

34 Ne biakalua ne Yishemaela wakafua, ne wakajîkibua mu muaba uvua ubikidibua ne Nahoma.

35 Ne biakalua ne bana ba bakaji ba Yishemaela bakadila menamena, bua bualu bua dijimija dia tatuabu, ne bua bualu bua ntatu yabu mu tshipela; ne bakanungena tatuanyi, bualu bua uvua mubapatuisha ku bulaba bua Yelushalema, bamba: Tatuetu wafu; eyowa, ne tudi batambakana bikola mu tshipela, ne tudi bakenga ne ntatu, nzala, nyota, ne ditshioka bia bungi; ne kunyima kua makenga onsu â tudi ne tshia kufua mu tshipela ne nzala.

36 Ne nanku bakanungena tatuanyi, ne kabidi mema; ne bakajinga kupingana kabidi ku Yelushalema.

37 Ne Lamana wakamba kudi Lemuele ne kabidi kudi bana ba baluma ba Yishemaela: Monayi, tushipayi tatuetu, ne kabidi muanetu wa baluma Nefi, udi mudiangatshila bua kuikala mukôkeshi wetu ne mulongeshi wetu, tuetu badi bakulu benda.

38 Mpindiewu, udi wamba ne Mukalenga udi muakula nenda, ne kabidi banjelu badi bamusadila. Kadi monayi, tudi bamanya ne udi ushima kutudi; ne udi ulonda malu â, ne udi wenza malu a bungi ku ngenzelu wa budimu wenda, bua adinga mesu etu, wela meji, pamuapa, ne atupambula mu tshipela tshienyi; ne kunyima kua mutupambula, udi wela meji bua kudienza mfumu ne mukôkeshi pa mutu petu, bua enza netu bilondeshila ku disua anyi ku nsankilu wenda. Ne ku mushindu ewu muanetu wa baluma Lamana wakasonsola mitshima yabu ku tshiji.

39 Ne biakalua ne Mukalenga uvua netu, eyowa, mena dîyi dia Mukalenga diakalua ne diakakula mêyi a bungi kudibu, ne diakabatandisha menamena; ne kunyima kua batandishibua kudi dîyi dia Mukalenga bakalekela tshiji tshiabu, ne bakakudimuna mutshima ku mibi yabu, mua ne Mukalenga wakatubenesha kabidi ne biakudia, bua ne katufu to.