1 Bualu biakalua ne kunyima kua mema kujinga bua kumanya malu avua tatuanyi mumona, ne kuitabuija ne Mukalenga uvua ne mukumbana bua ku amanyisha kundi, bu mumvua musomba nnana meji mu mutshima wanyi mvua muyishibua kula mu Nyuma wa Mukalenga, eyowa, ku mukuna mula menamena, umvua ntshiyi muanji kumona kumpala, ne pamvua ntshiyi muanji kudiata dikasa to.

2 Ne Nyuma wakamba kundi: Mona, udi ujinga tshinyi?

3 Ne ngakamba: Ndi njinga kumona malu avua tatuanyi mumona.

4 Ne Nyuma wakamba kundi: Udi witabuija ne tatueba uvua mumona mutshi uvuaye muakuila anyi?

5 Ne ngakamba: Eyowa, udi mumanya ne ndi ngitabuija mêyi onsu a tatuanyi.

6 Ne pa ngakakula mêyi â, Nyuma wakabila ne dîyi dikola, wamba: Hozana kudi Mukalenga, Nzambi mutamba kûlu; bualu udi Nzambi pa mutu pa buloba bonsu, eyowa, mena kupita bionsu. Ne udi mubeneshibua, Nefi, bualu bua udi witabuija Muana wa Nzambi mutamba kûlu; pananku neumona malu awajingi.

7 Ne Mona bualu ebu nebupeshibua kûdi bua tshimanyinu, ne kunyima kua wewa mumona mutshi wakakuama tshimuma tshivua tatueba mulabula, neumona kabidi muntu utulukila mu diûlu, ne yeya neumumona; ne kunyima kua wewa mumumona neujadika ne udi Muana wa Nzambi.

8 Ne biakalua ne Nyuma wakamba kundi: Tangila! Ne ngakatangila ne kumona mutshi; ne uvua bu mudi mutshi uvua tatuanyi mumona; ne buimpa kumona buawu buvua bupita bikola, eyowa, kupita buimpa kumona bonsu; ne butoka buawu buvua bupitshila butoka bua neige mutangalaka.

9 Ne biakalua ne kunyima kua mema mumona mutshi, ngakamba kudi Nyuma: Ngamonyi wandeji mutshi wa mushinga kupita bionsu.

10 Ne wakamba kundi: Udi ujinga tshinyi?

11 Ne ngakamba kudiye: Bua kumanya bujinguludi buawu—bualu mvua ngakula kudiye bu mudi muntu wakula; bualu mvua mumona ne uvua mu tshimfuanyi tshia muntu; kadi nansha nanku, mvua mumanya ne tshivua Nyuma wa Mukalenga; ne uvua wakula kundi bu mudi muntu wakula ne mukuabu.

12 Ne biakalua ne wakamba kundi: Tangila! Ne ngakatangila bu bua kutangila kudiye, ne ntshiakamumona to; bualu uvua mujimina ku mpala kuanyi.

13 Ne biakalua ne ngakatangila ne ngakamona tshimenga tshinena tshia Yelushalema, ne kabidi bikuabu bimenga. Ne ngakamona tshimenga tshia Nazaleta; ne mu tshimenga tshia Nazaleta ngakamona muana wa bakaji utshidi kamama, ne uvua mulengela ne mutoka menamena.

14 Ne biakalua ne ngakamona diûlu diunzuluka; ne muanjelu wakapueka ne wakimana kumpala kuanyi; ne wakamba kundi: Nefi, udi umona tshinyi?

15 Ne ngakamba kudiye: Muana wa bakaji utshidi kamama, mupita buimpa kumona ne bulengela kupita bana ba bakaji bakuabu bonsu batshidi tumama.

16 Ne yeya wakamba kundi: Udi mumanya bupuekela bua Nzambi anyi?

17 Ne ngakamba kudiye: Ndi mumanya ne udi munanga bana benda; nansha nanku, ntshiena mumanya diumvuija dia malu onsu to.

18 Ne wakamba kundi: Mona, muana wa bakaji utshidi kamama uwudi umona udi mamuenda wa Muana wa Nzambi, ku mushindu wa mu musunyi.

19 Ne biakalua ne ngakamona ne wakambudibua kula mu Nyuma; ne kunyima kua muikala muambudibua kula mu Nyuma bua mutantshi wa diba muanjelu wakakula kundi, wamba: Tangila!

20 Ne ngakatangila ne kumona kabidi muana wa bakaji utshidi kamama, muambula muana mu maboku enda.

21 Ne muanjelu wakamba kundi: Mona Muana wa Mukoku wa Nzambi, eyowa, mena Muana wa Tatu wa Tshiendelela! Udi mumanya diumvuija dia mutshi uvua tatueba mumona anyi?

22 Ne ngakamuandamuna, ngamba: Eyowa, udi dinanga dia Nzambi didi didimuangalaja kula mu mitshima ya bana ba bantu; bua nanku, didibu mua kujinga kupita malu onsu.

23 Ne wakakula kundi, wamba: Eyowa, ne dia disanka dipita kudi anyima.

24 Ne kunyima kua yeya muamba mêyi â, wakamba kundi: Tangila! Ne ngakatangila, ne ngakamona Muana wa Nzambi uya munkatshi mua bana ba bantu; ne ngakamona ba bungi bapona panshi ku makasa enda ne bamukukuila.

25 Ne biakalua ne ngakamona ne mulonda wa tshiamua, uvua tatuanyi mumona, uvua dîyi dia Nzambi, uvua ulombola ku mpokolo wa mâyi a moyo, anyi ku mutshi wa moyo; mâyi mina adi tshimueneshelu tshia dinanga dia Nzambi; ne ngakamona kabidi ne mutshi wa moyo uvua tshimueneshelu tshia dinanga dia Nzambi.

26 Ne muanjelu wakamba kundi kabidi: Tangila ne Mona bupuekela bua Nzambi!

27 Ne ngakatangila ne ngakamona Musungidi wa ba pa buloba, uvua tatuanyi muakula; ne ngakamona kabidi muambi walongolola njila kumpala kuenda. Ne Muana wa Mukoku wa Nzambi wakaya ne wakatambuishibua kudiye; ne kunyima kua mutambuishibua, ngakamona diûlu diunzuluka, ne Nyuma wa Tshijila utulukila mu diûlu ne utudila pa mutu penda mu tshimfuanyi tshia nkudimba.

28 Ne ngakamona ne wakaya ulongesha bantu, mu bukola ne butumbi bunena; ne misumba ya bantu ivua misangishibua pamua bua kumumvua; ne ngakamona ne bakamuipata munkatshi muabu.

29 Ne ngakamona kabidi bakuabu dikumi ne babidi bamulonda. Ne biakalua ne bavua bambudibua kula mu Nyuma ku mpala kuanyi, ne ntshiakabamona kabidi to.

30 Ne biakalua ne muanjelu wakakula kundi kabidi, wamba: Tangila! Ne ngakatangila, ne ngakamona diûlu diunzuluka kabidi, ne ngakamona banjelu kudi bana ba bantu; ne bakabasadila.

31 Ne wakakula kundi kabidi, wamba: Tangila! Ne ngakatangila, ne ngakamona Muana wa Mukoku wa Nzambi uya munkatshi mua bana ba bantu. Ne ngakamona misumba ya bantu bavua bikala babêdi, ne bavua bikala batatshishibua ne mishindu yonsu ya mabêdi, ne ne badiabulu ne nyuma ya bukoya; ne muanjelu wakakula ne kuleja malu â onsu kundi. Ne bakôndopibua ku bukola bua Muana wa Mukoku wa Nzambi; ne badiabulu ne nyuma ya bukoya bakipatshibua.

32 Ne biakalua ne muanjelu wakakula kundi kabidi, wamba: Tangila! Ne ngakatangila ne ngakamona Muana wa Mukoku wa Nzambi, ne uvua mukuatshibua kudi bantu ; eyowa, Muana wa Nzambi wa Tshiendelela wakalumbuluishibua kudi ba pa buloba ; ne ngakamona ne ndi njadika.

33 Ne mema, Nefi, ngakamona ne wakabandishibua pa mutshi mutshiamakana ne kushipibua bua mibi ya ba pa buloba.

34 Ne kunyima kua mushipibua ngakamona misumba ya pa buloba, ne ivua misangishibua pamua bua kuluisha bapostolo ba Muana wa Mukoku; bualu ki muakabikibua dikumi ne babidi kudi muanjelu wa Mukalenga.

35 Ne misumba ya pa buloba ivua misangishibua pamua; ne ngakamona ne ivua mu nzubu munena ne mualabala, mufuanangana ne nzubu uvua tatuanyi mumona. Ne muanjelu wa Mukalenga wakakula kundi kabidi, wamba: Mona ba pa buloba ne lungenyi luabu; eyowa, Mona nzubu wa Isalele udi mudisangisha pamua bua kuluisha bapostolo dikumi ne babidi ba Muana wa Mukoku.

36 Ne biakalua ne ngakamona ndi njadika, ne nzubu munena ne mualabala uvua diditambisha dia ba pa buloba; ne wakupuka, ne diupuka dienda divua dinena menamena. Ne muanjelu wa Mukalenga wakakula kundi kabidi, wamba: Ki muikala dibutuka dia bisamba bionsu, bisa bionsu, miakulu yonsu ne bantu bonsu, baluisha bapostolo dikumi ne babidi ba Muana wa Mukoku.