Bujadiki bua Muambi Joseph Smith

Miaku ya Muambi Joseph Smith nkayenda bitangila dilopoka dia Mukanda wa Molomo idi:

“Mu dilolo … dia dituku dia makumi abidi ne dimua dia ngondu wa tshitema [1823] … ngakadifila mu disambila ne ditendekena kudi Nzambi wa Bukitu Bonsu. …

“Pamvua nanku mu ngenzedi wa dibikila Nzambi, ngakamona bukenka bumueneka mu nzubu wanyi wa bulalu, buakatungunuka kuvulangana tô ne pavua nzubu wa bulalu mukenka kupita mujalamu wa diba, pakamueneka katataka muntu ku luseka lua bulalu buanyi, muimanyina mu kapepela, bualu makasa enda ka’avua madiata panshi to.

“Uvua muvuala nkanzu mudilekelela wa butoka bupita. Buvua butoka bupita tshintu tshikuabu tshionsu tshintu nkadi mumona; anyi ntshiena ngitabuija ne tshintu tshia pa buloba tshivua mua kumueneshibua tshitoka ne tshiengelela menamena nanku to. Bianza bienda bivua tshianana, ne maboku enda kabidi, kakesa kupita pa tumpombu tua bianza; nanku, kabidi, muvua makasa enda tshianana, bu muvua mikolo yenda, kakesa kupita pa tumpombu. Mutu wenda ne nshingu bivua kabidi tshianana. Mvua mua kumona ne kavua ne tshivualu tshikuabu to amu nkanzu ewu, bualu uvua munzulula, bua ne mvua mua kumona munda muenda.

“Katshivua amu nkanzu wenda uvua mutoka menamena to, kadi mubidi wenda mujima uvua muengeleka kabiyi kuamba to, ne mpala wenda bulelela bu mudi mupenyi. Nzubu wa bulalu uvua ukenka menamena, kadi kayi wengelela bu muntu uvua pabuipi nanyi to. Diambedi pangakamutangila, ngakatshina; kadi ditshina katataka diakanshiya.

“Wakambikila mu dîna, ne wakangambila ne uvua mutumibua kufumina kumpala kua Nzambi, ne dîna dienda divua Moloni; ne Nzambi udi ne mudimu buanyi bua kuenza; ne dîna dianyi nediangatshibua bua buimpa ne bubi munkatshi mua bisamba bionsu, bisa bionsu, ne miakulu yonsu, anyi ne nediakudibua mu buimpa ne bubi munkatshi mua bantu bonsu.

“Wakamba ne kuvua mukanda mutekibua, mufundibua pa bitata bia ngolo, muikala ufila mulubu wa bena malaba â ba kala, ne muaba udibu bapatukila. Wakamba kabidi ne tshiwudi tshia Lumu Luimpa lua kashidi luvuamu, bu muvualu lufidibua kudi Mupandishi kudi benamu ba kala;

“Kabidi, ne kuvua mabua abidi mela mu mata a mpalata—ne mabua â, masuika ku tshibuikilu tshia pa tshiadi, bivua bibikidibua ne Ulima ne Tumima—biteka ne bitata; ne diangata ne dienzela dia mabua â bivua tshivua tshivuija ‘bamonyi’ mu bikondu bia kala anyi bia bishala; ne Nzambi uvua mualongolola bua kipatshila ka diandamuna mukanda ewu. …

“Kabidi, wakangambila, ne pangapeta bitata bivuaye muamba abi—bualu tshikondu tshia kubipeta katshivua tshianji kukumbana to—Ntshivua ne bua kubileja kudi muntu nansha umua to; nansha tshibuikilu tshia pa tshiadi ne Ulima ne Tumima; amu kudi bangapeshibua mukenji bua kubalejabi; bingenza nanku, nembutuka. Pavuaye uyukila nanyi bitangila bitata, tshimônyi tshia kunzuluka mu meji anyi bua ne mvua mua kumona muaba uvua bitata bitekibua, ne mu mushindu mutoka ne mumanyibua menamena bua ne ngakamanya muaba kabidi pangakayaku.

“Kunyima kua dimanyisha edi, ngakamona bukenka mu nzubu wa bulalu bubanga kukunguila pabuipi ne mubidi wa muntu uvua muikala wakula kundi, ne buakatungunuka kuenza nanku tô ne pakashala nzubu wa bulalu kabidi mu mîdima, pa kumbusha amu ku mpenga yenda; ne kabidi ngakamona, musangu umua, bu tshipitshilu tshiunzuluka buludi mu diûlu, ne wakabanda tô ne muakajiminaye yonsu, ne nzubu wa bulalu kushala bu muvuaye kumpala kua bukenka bua mu diûlu ebu kumueneka.

“Ngakalala nnana meji pa disunguluja dia bualu ebu, ne nkema bikola bua bivua bingambila kudi mutumibua wa mushindu mukuabu ewu; pangakajandula musangu umua, munkatshi mua dinana meji anyi, ne nzubu wanyi wa bulalu uvua kabidi muikala ubanga kukenka, ne bu mu kasunsa, mutumibua wa mu diûlu umua awu uvua kabidi ku luseka lua bulalu buanyi.

“Wakatuadija, ne kabidi kulonda malu amua awu avuaye mulonda ku dikumbula dienda dia kumpala, kakuyi dishilangana nansha dikesa to; kunyima kua kuenza nanku, wakamanyisha bua dilumbuluisha dinena divua dilua pa mutu pa buloba, ne kabutu ku tshiyola, muela wa mvita, ne tshipupu; ne dilumbuluisha dikola nedilua pa mutu pa buloba mu tshikondu etshi. Muikala mulonda malu â, wakabanda kabidi bu muvuaye muenza kumpala.

“Musangu ewu, bivua binsomba mu meji bikola, bua ne tulu tuakanyema ku mesu kuanyi, ne ngakalala mutshimunyibua mu dikema bua bimvua mumona ne mumvua. Kadi dikema kayi pangakamona kabidi mutumibua umua awu ku luseka lua bulalu buanyi, ne ku mumvua undondela anyi ungambuluila kabidi malu amua awu bu kumpala; ne wakansakidila mema didimuisha, ungambila ne Satana neakeba bua kuntêta (bua bualu bua bupela bua dîku dia tatuanyi), bua kupeta bitata bua kipatshila ka kunema. Etshi, wakankandika, wamba ne ntshiena ne bua kuikala ne meji makuabu mu diangata dia bitata to kadi bua kutumbisha Nzambi, ne ntshiena bua kuenzejibua kudi dijinga dikuabu to amu dia kuasa bukalenga buenda; kabiyi nanku to, ntshivua mua kubipeta to.

“Kunyima kua dikumbula dienda disatu edi, wakabanda kabidi mu diûlu bu kumpala, ne mvua kabidi mushala nnana meji bua tshibulangenyi tshia bivua bifuma kungenzekela; pabuipi ne katataka kunyima kua mutumibua wa mu diûlu ewu mubanda munshiya bua musangu muisatu, tshitala tshiakasama, ne ngakamona ne butuku bukavu butshia, bua ne miyiki yetu ivua ne tshia kuikala minenga butuku bujima.

“Mutantshi muîpi kunyima kua mema mujuka pa bulalu buanyi, ne, bu tshibidilu, ngakaya kuenza midimu ya nsongu ya mu dituku; kadi, mu didikija kuenza mudimu bu misangu mikuabu, ngakamona bukola buanyi ne buvua butshioka bikola bu ne kunshiya ntshiyi nkumbana. Tatuanyi, uvua ukuata nanyi mudimu, wakajandula ne mvua ne bualu, ne wakangambila ne nya ku mbelu. Ngakâsa luendu ne meji a kuya ku nzubu; kadi, mu didikija dia kusambuka lupangu bua kupatuka mu budimi mutuvua, bukola buanyi buakanjika bonsu, ne ngakakuluka panshi ntshiyi ne bukola to, ne bua mutantshi mukesa muikala bu ntshiyi mumanya tshintu nansha tshimua to.

“Tshintu tshia kumpala tshimvua mua kuvuluka tshivua dîyi diakula kundi, dimbikila mu dîna dianyi. Ngakatangila mûlu, ne kumona mutumibua umua awu muimana kûlu kua mutu wanyi, mujinguluka ne bukenka bu kumpala. Wakangambila kabidi bionsu bivuaye mungambila butuku bushala, ne wakampesha mukenji bua kuya kudi tatuanyi ne kumuambila bua tshimônyi ne mikenji bimvua mupeta.

“Ngakatumikila; ngakapingana kudi tatuanyi mu budimi, ne ngakamulondela bualu bujima. Wakangandamuna ne buvua bua kudi Nzambi, ne wakangambila ne nya ne ngenza mumvua mupeshibua mukenji kudi mutumibua. Ngakashiya budimi, ne ngakaya ku muaba uvua mutumibua mungambila ne bitata bivua bitekibua; ne amu bua butoka bua tshimônyi tshingakamona bua bualu buawu, ngakamanya muaba ewu mu kasunsa kangakafika koku.

“Pabuipi ne musoku wa Manchester, comté wa Ontario, New York, kudi kakuna ka bunena bukumbana kimana, ne kabanduluka kupita tukuabu tonsu mu mutumba. Ku luseka lua ku wesete lua kakuna aka, kula to ne ku mutu, muinshi mua dibua dia bunena bukumbana, kuvua kusomba bitata, biteka mu musheta wa dibua. Dibua edi divua ne mupimbu ne divungama munkatshi mua luseka lua mûlu, ne dikepela ku mielelu, mua ne tshitupa tshia munkatshi tshiadi tshivua tshimueneka pa mutu pa bulaba, kadi muelelu nseka yonsu uvua mubuikidibua ne buloba.

“Muikala mumbusha buloba, ngakapeta luambuidi, lungakela muinshi mua dibua, ne ngakaditakula ne dibueja dikesa. Ngakatangilamu, ne ngakamonamu bushuwa bitata, Ulima ne Tumima, ne tshibuikilu tshia pa tshiadi, bu muvua mutumibua muamba. Musheta muvuabi bisomba uvua muenza mu diasa dia mabua pamua mu mushindu wa siman. Mu ntaku wa musheta muvua musomba mabua abidi matshiamakana mu musheta, ne pa mabua abidi â pavua basomba bitata ne bikuabu bintu nabi.

“Ngakidikija kubipatula, kadi ngakakandikibua kudi mutumibua, ne mvua kabidi mumanyishibua ne tshikondu tshia kubilopola katshivua tshianji kufika to, nansha katshiakulua to, tô ne bidimu binayi kumbukila ku tshikondu etshi; kadi wakangambila ne mvua ne bua kulua ku muaba ewu menamena tshidimu tshimua kumbukila ku tshikondu etshi, ne neasambakenaku nanyi, ne mvua ne bua kutungunuka kuenza nanku tô ne palua tshikondu tshia kupeta bitata ebi.

“Bilondeshila bu mumvua mupeshibua mukenji, ngakaya ku ndekelu kua tshidimu tshionsu, ne musangu onsu ngakasanganaku mutumibua umua awu, ne kupeta mayisha ne meji kudiye ku miyuki yonsu, bitangila tshivua Mukalenga ulua kuenza, ne munyi ne mu mushindu kayi bukalenga buenda buvua kulombodibua mu matuku a ndekelu. …

“Ku ndekelu tshikondu tshia kupeta bitata, Ulima ne Tumima, ne tshibuikilu tshia pa tshiadi tshiakafika. Mu dituku dia makumi abidi ne abidi dia ngondu wa tshitema, tshidimu tshinunu ne nkama muanda mukulu ne makumi abidi ne muanda muteketa, muikala muya bu tshibidilu ku ndekelu kua tshidimu tshikuabu ku muaba uvuabi bitekibua, mutumibua wa mu diûlu umua awu wakabifila kundi ne bujitu: ne mvua ne bua kubilama bimpa; ne bingabilekelela ku dipanga disumpakana, anyi ku dilengulula dianyi dia nansha mushindu kayi, nenkoshibua; kadi ne bingenzela makanda anyi onsu bua kubikuba, tô ne pabiangataye, mutumibua ewu, nebikubibua.

“Mema katataka kujandula tshiena bualu tshimvua mupeshibua bujitu bukola bua kubilama bimpa, ne bua tshinyi bivua ne mutumibua uvua muamba ne pangenza tshivua tshikengedibua ku tshianza tshianyi, neabiangata. Bualu katataka kumanyikabi ne mvua nabi, makanda mapita bukola akenjibua bua kubiangata kundi. Bulongolodi bonsu buvua bua kuenjibua buvua bua kipatshila aku. Dikengeshibua diakalua bululu kupita ne dikola kupita kumpala, ne misumba ya bantu ivua ne ntema ya munanunanu bua kubiangata kundi, ikalabi bukumbana. Kadi ku lungenyi lua Nzambi, biakashala bikubibua mu bianza bianyi, tô ne pangakakumbaja nabi tshivua tshikengedibua ku tshianza tshianyi. Bilondeshila ku diumvuangana, pakabilomba mutumibua, ngakabifila kudiye; ne udi nabi mu bulami buenda tô ne dituku edi, dikala dituku dibîdi dia ngondu muitanu, tshidimu tshinunu tshimua ne nkama muanda mukulu ne makumi asatu ne muanda mukulu.”

Bua mulubu mujima, tangila mu Joseph Smith—Mulubu mu Busanga bua Mushinga Mukola.

Miandiku ya kala milopodibua nanku ku buloba bu mudi dîyi dia bantu diakula ku lupuishi, ne miandamunyibua mu ngakuilu mupia-mupia ku dipa ne bukola bua Nzambi bijadikibua ne ngitabilu wa Nzambi, ivua diambedi mipatudibua bua ba pa buloba mu Angele mu tshidimu tshia 1830 bu The Book of Mormon.