Tshibangilu

Mukanda wa Molomo udi mupiku wa mifundu ya tshijila mifuanangana ne Bibiliya. Udi miandiku ya malanda a Nzambi ne bena ku ma’Amelika ba kala ne udimu ne tshiwudi tshia lumu luimpa lua kashidi.

Mukanda uvua mufundibua kudi bambi ba kala ba bungi ku nyuma wa buambi ne dibuluila. Miaku yabu, mifundibua pa bitata bia ngolo, ivua miambuludibua ne mikosolodibua kudi muambi mulondi wa malu a kala wa dîna ne Molomo. Miandiku idi ilonda mulubu wa manshidimukilu manena abidi. Dimua divua difumina ku Yelushalema mu 600 k.d.K. ne kunyima kutapuluka mu bisamba bibidi, bimanyibua bu Bena Nefi ne Bena Lamana. Dikuabu divua didianjila kala pavua Mukalenga mubuejakaja miakulu ku Kaleya ka Babela. Tshisumbu etshi tshidi tshimanyibua bu Bena Yalede. Kunyima kua bidimu binunu, bonsu bakabutudibua amu kumbusha Bena Lamana, ne badi bikala munkatshi mua bankambua ba Bena ku Indi ba ku Amelika.

Muanda munena udi muandikibua mu Mukanda wa Molomo udi disadila dia Mukalenga Yezu Kilisto nkayenda munkatshi mua Bena Nefi katataka kunyima kua dibika dienda ku lufu. Udi umvuija malongesha a lumu luimpa, uleja dilongolola dia lupandu, ne wambila bantu tshidibu ne tshia kuenza bua kupeta ditalala mu matuku a moyo â ne lupandu lua tshiendelela mu matuku a moyo alualua.

Kunyima kua Molomo mujikija difunda dienda, wakafila mulubu kudi muanenda wa baluma Moloni, wakatenteka miaku yenda nkayenda mikesa ne kusokoka bitata mu mukuna wa Kumola. Mu ngondu wa tshitema dituku dia 21, 1823, Moloni umua awu, apu muntu mutumbishibua, mubika ku bafua, wakamuenekela Muambi Joseph Smith ne kumuambila bantu bitangila miandiku ya kala ne diandamuna diayi mu muakulu wa Angele didi dilongolodibua.

Mu tshikondu tshikumbanyina bitata biakafidibua kudi Joseph Smith, wakabiandamuna ku dipa ne bukola bua Nzambi. Miandiku idi mpindiewu mipatudibua mu miakulu ya bungi bu bujadiki bupia-bupia ne bukuabu ne Yezu Kilisto udi Muana wa Nzambi wa moyo ne bonsu balua kudiye ne batumikila mêyi ne milulu ya lumu luimpa luenda bapandishibua.

Bitangila miandiku eyi Muambi Joseph Smith wakamba ne: “Ndi muambila bana betu ne Mukanda wa Molomo udi muakana kupita mukanda onsu mukuabu pa buloba, ne dibua dikulu dia ntendelelu wetu, ne muntu nealua pabuipi menamena ne Nzambi ku dilaminyina dia malongesha awu, kupita mukanda mukuabu onsu.”

Kunyima kua Joseph Smith, Mukalenga uvua mulongolola bua dikumi ne umua bakuabu bua kudimuenabu nkayabu bitata bia ngolo ne kuikala bajadiki ba pa buabu ba bulelela ne buena nzambi bua Mukanda wa Molomo. Majadiki abu mafunda adi munda emu bu “Bujadiki bua Bajadiki Basatu” ne “Bujadiki bua Bajadiki Muanda Mukulu.”

Tudi tubikila bantu bonsu konsu kudibu bua kubala Mukanda wa Molomo, bua kunana meji mu mitshima yabu dîyi didimu, ne pashisha kuebeja kudi Nzambi, Tatu wa Tshiendelela, mu dîna dia Kilisto mukanda ewu ne udi mulelela. Badi balonda njila ewu ne bebeja mu ditabuija nebapeta bujadiki bua bulelela ne buena nzambi buawu ku bukola bua Nyuma wa Tshijila. (Tangila ku Moloni 10:3–5.)

Badi bapeta bujadiki bua kudi Nzambi ebu kumbukila ku Nyuma wa Tshijila nebalua kabidi kumanya ku bukola bumua ebu ne Yezu Kilisto udi Mupandishi wa ba pa buloba, ne Joseph Smith udi mubuluidi ne muambi wenda mu matuku a ndekelu, ne Ekelezia wa Yezu Kilisto wa Bansantu ba Matuku a Ndekelu udi bukalenga bua Mukalenga bushikikibua tshia kabidi pa buloba, mu dilongolola dia Kulua Kuibidi kua Mashiya.