1 Ne bulelela, bulelela, ndi nnuambila ne ndi ne mikoku mikuabu, idi kayiyi ya mu bulaba ebu to, anyi ya mu bulaba bua Yelushalema to, anyi mu tshitupa nansha tshimua ku mpenga yonsu ya bulaba abu bumvua muya kusadila to.

2 Bualu bobu bandi ngamba abu kabatu banji kumvua dîyi dianyi to; anyi tshitu muanji kudileja kudibu to.

3 Kadi ndi mupeta mukenji mufumina kudi Tatu ne nenya kudibu, ne nebumvua dîyi dianyi, ne nebabadibua munkatshi mua mikoko yanyi, bua ne kuikala tshisumbu tshia mikoko tshimua ne mulami umua; bua nanku ndi nya kudileja kudibu.

4 Ne ndi nupesha mukenji ne nufunda miaku eyi kunyima kua mema muya, bua ne pikalabi ne bantu banyi badi mu Yelushalema, bavua bammona ne bavua bikala nanyi mu disadila dianyi, kabayi balomba kudi Tatu mu dîna dianyi to, bua ne bapeta dimanya dienu ku Nyuma wa Tshijila, ne bua bisa bikuabu kabidi bidibu kabayi bamanya to, bua ne miaku eyi inuafunda ilamibua ne ifikishibua kudi Bena Bisamba bia Benda, bua ne ku njila wa tshiwudi tshia Bena Bisamba bia Benda, tshishadi tshia ndelanganyi yabu, tshiatangalajibua pa mpala wa buloba bua bualu bua dipanga ditabuija diabu, tshipingajibua koku, anyi tshipingajibua ku dimanya dianyi mema, Musungidi wabu.

5 Ne pashisha nebasangisha kumbukila ku matengu anayi a buloba; ne pashisha nenkumbaja tshipungidi tshivua Tatu muenza ne bantu bonsu ba ku nzubu wa Isalele.

6 Ne Bena Bisamba bia Benda badi babeneshibua bua bualu bua ditabuija diabu kundi, bua ne ku Nyuma wa Tshijila, udi ubajadikila bualu buanyi ne bua Tatu.

7 Monayi, Tatu udi wamba ne, bua bualu bua ditabuija diabu kundi ne bua dipanga dia ditabuija dieba, Ô nzubu wa Isalele, mu dituku dia ku ndekelu bulelela nebulua kudi Bena Bisamba bia Benda, bua ne tshiwudi tshia bintu ebi tshimanyishibua kudibu.

8 Kadi Tatu udi wamba ne, diakabi kudi Bena Bisamba bia Benda badi kabayi bitabuija to—bualu nansha mudibu balua pa mpala wa bulaba ebu, ne badibu batangalaja bantu banyi ba ku nzubu wa Isalele; ne bantu banyi ba ku nzubu wa Isalele badi bipatshibua munkatshi muabu, ne badi badiatakajibua muinshi mua makasa abu;

9 Ne bua midimu ya lusa lua Tatu kudi Bena Bisamba bia Benda, ne kabidi bitungu bia Tatu pa mutu pa bantu banyi badi bikala ba ku nzubu wa Isalele, bulelela, bulelela, ndi nnuambila ne, kunyima kua bionsu ebi, ne ndi muenza ne bantu banyi ba ku nzubu wa Isalele batûtshibua, ne batatshibua, ne bashipibua, ne kuipatshibua munkatshi muabu, ne bakinyibua kudibu, ne nebalua muneku ne muanu munkatshi muabu—

10 Ne nanku Tatu udi mumpesha mukenji ne nnuambila ne: Mu dituku adi penza Bena Bisamba bia Benda mibi bishilangana ne lumu luimpa luanyi, ne nebabenga tshiwudi tshia lumu luimpa luanyi, ne nebikala badibandisha mu diditambisha mu mitshima yabu bu bukua bisamba bionsu, ne kupita bantu bonsu ba pa buloba bujima, ne nebikala buwula ntenta ne mishindu onsu wa mafi, ne didinga, ne dienzelangana dia bibi, ne mishindu yonsu ya mpala ibidi, ne dishipa dia bantu, ne buakuidi bua mafi, ne masandi, ne malu mapita bubi a mu musokoku; ne pikalabu benza bintu ebi bionsu, ne babenga tshiwudi tshia lumu luimpa luanyi, bulelela, monayi, Tatu udi wamba ne, nengumbusha tshiwudi tshia lumu luimpa luanyi munkatshi muabu.

11 Ne pashisha nemvuluka tshipungidi tshianyi tshingakenza ne bantu banyi, Ô nzubu wa Isalele, ne nembatuadila lumu luimpa luanyi.

12 Ne nenkuleja, Ô nzubu wa Isalele, ne Bena Bisamba bia Benda kabakuikala ne bukola kûdi to; kadi nemvuluka tshipungidi tshianyi kûdi, Ô nzubu wa Isalele, ne neufika ku dimanya dia tshiwudi tshia lumu luimpa luanyi.

13 Tatu udi wamba ne, kadi pikala Bena Bisamba bia Benda bakudimuna mutshima ne bapingana kundi, monayi nebabadibua munkatshi mua bantu banyi, Ô nzubu wa Isalele.

14 Ne Tatu udi wamba ne, ntshiakulekela bua ne bantu banyi, badi bikala ba ku nzubu wa Isalele, baya munkatshi muabu, ne babadiatakaja panshi to.

15 Kadi bobu kabayi batangila kundi, ne bumvuila dîyi dianyi to, nembalekela, eyowa, nendekela ne bantu banyi, Ô nzubu wa Isalele, baya munkatshi muabu, ne bua babadiatakaja panshi, ne nebikala bu mudi mukela udi mujimija ditua diawu, ne kubangila apu kawena muimpa bua tshintu nansha tshimua kadi bua kuimanshibua, ne kudiatakajibua mu makasa a bantu banyi, Ô nzubu wa Isalele.

16 Bulelela, bulelela, ndi nnuambila ne, ki mudi Tatu mumpesha mukenji nanku—ne mpesha bantu aba bulaba ebu bua bupianyi buabu.

17 Ne pashisha miaku ya muambi Yeshaya neikumbajibua, idi yamba ne:

18 Batentekedi beba nebabandisha dîyi; nebimba misambu ne dîyi pamua, bualu nebadimuena ne mesu pâpingaja Mukalenga Siona kabidi.

19 Tudikayi ne disanka, imbayi pamua, nuenu miaba mitupu ya Yelushalema; bualu Mukalenga wasambi bantu benda, wasungidi Yelushalema.

20 Mukalenga waleji diboku dienda dia tshijila patoka ku mesu a bisamba bionsu; ne ndekelu ya buloba yonsu neimona lupandu lua Nzambi.