1 Ne mpindiewu biakalua ne pakamba Yezu mêyi â wakakudimuka kabidi kudi musumba wa bantu, ne wakabulula mukana muenda kudibu kabidi, wamba ne: Bulelela, bulelela, ndi nnuambila ne, kanulumbuluishi bakuabu to, bua kabanulumbuluishi penu to.

2 Bualu ne dilumbuluisha dinudi nulumbuluisha, nebanulumbuluisha kabidi nadi; ne ne mpiminu unudi nupima, nebanupima kabidi nenda.

3 Ne bua tshinyi udi utangila kasonsa kadi mu disu dia muanenu, kadi kuyi mukamba udi mu dieba disu to?

4 Kadi munyi mûdi mua kuambila muanenu ne: Lekela nkumbusha kasonsa kadi mu disu dieba—ne mona, mukamba muikala mu dieba disu?

5 Wewa muntu wa mpala ibidi, kumpala umbusha mukamba udi mu disu dieba; ne pashisha neumona bimpa bua kumbusha kasonsa kadi mu disu dia muanenu.

6 Kanupeshi mbua tshintu tshia tshijila to, anyi kanuimanshi masanga kumpala kua nguluba to, bua kayilu kuadiatakaja muinshi mua makasa ayi, ne kayikudimuki kabidi ne kayinupandakaji.

7 Lombayi, ne nebanupesha; kebayi, ne nenupeta; kokolayi, ne netshiunzuludibua kunudi.

8 Bualu yonsu udi ulomba, udi upeta; ne udi ukeba, udi umona; ne udi ukokola, badi bamunzuluila.

9 Kadi muntu kayi wa kunudi, pikala muanenda wa baluma ulomba diampa, yeya neamupesha dibua anyi?

10 Anyi pikalaye ulomba mushipa, yeya neamupesha nyoka anyi?

11 Panuikala nuenu, badi bikala bantu babi, bamanya bua kupesha bana benu bintu bimpa, Tatu wenu udi mu diûlu kena utamba kupesha badi bamulomba bintu bimpa anyi?

12 Bua nanku, bintu bionsu binudi basua ne bantu banuenzela, benzelayi momumua, bualu etshi tshidi mikenji ne bambi.

13 Buelelayi ku tshibuelelu tshifinakana; bualu tshibuelelu tshidi tshinena, ne njila udi mualabala, udi ulombola ku dibutuka, ne kudi ba bungi badi babuelelaku;

14 Bualu tshibuelelu tshidi tshifinakana, ne njila udi mubumbakana, udi ulombola ku moyo, ne kudi bakesa badi bamupeta.

15 Dimukilayi bambi ba mafi, badi balua kunudi bavuala biseba bia mikoku, kadi munda muabu bikala mibuabua ya lonji.

16 Ne nenubamanyina ku bimuma biabu. Bantu batu bapola tumuma tua mvinyo ku mionji ya meba, anyi mfigi ku mingonga anyi?

17 Mena nanku mutshi muimpa onsu udi ukuama bimuma bimpa; kadi mutshi munyanguka udi ukuama bimuma bibi.

18 Mutshi muimpa kawena mua kukuama bimuma bibi to, anyi mutshi munyanguka kawena mua kukuama bimuma bimpa to.

19 Mutshi onsu udi kawuyi ukuama bimuma bimpa udi upudibua, ne udi wimanshibua mu kapia.

20 Bua nanku, nenubamanyina ku bimuma biabu.

21 Muntu yonsu udi umbikila ne, Mukalenga, Mukalenga, kakubuela mu bukalenga bua mu diûlu to; kadi amu udi wenza disua dia Tatu wanyi udi mu diûlu.

22 Ba bungi nebangambila dituku adi ne: Mukalenga, Mukalenga, katuakamba ku Nyuma mu dîna dieba, ne mu dîna dieba katuakipata badiabulu, ne mu dîna dieba kuenza midimu ya bungi ya dikema anyi?

23 Ne pashisha nembambila patoka ne: Ntshitu munumanya nansha; umbukayi kundi, nuenu benji ba malu mabi.

24 Bua nanku, ewu yonsu udi umvua mêyi anyi â ne udi uyenzela, nemmufuanyikija ne muntu wa lungenyi, wakibaka nzubu wenda pa mutu pa dibua—

25 Ne mvula wakaloka, ne mâyi a nkoka akalua, ne mpepa yakalua, ne biakadikuma ku nzubu awu; ne kakupuka to, bualu uvua muibakila pa mutu pa dibua.

26 Ne muntu yonsu udi umvua mêyi anyi â ne kena uyenzela to neafuanyikijibua ne muntu mupota, wakibaka nzubu wenda pa mutu pa lusenga—

27 Ne mvula wakaloka, ne mâyi a nkoka akalua, ne mpepa yakalua, ne biakadikuma ku nzubu awu; ne wakupuka, ne diupuka dienda divua dikola.