1 Ne mpindiewu monayi, kakuvua muntu wa moyo nansha umua munkatshi mua bantu ba Bena Nefi bonsu wekela mpata nansha mikesa ku miaku ya bambi bansantu bonsu bavua bakula to; bualu bavua bamanya ne bivua bikengedibua ne ivua ne tshia kukumbajibua.

2 Ne bavua bamanya ne bivua bikengedibua ne Kilisto uvua ne tshia kulua, bua bimanyinu bia bungi bivua bifila, bilondeshila ku miaku ya bambi; ne bua bintu bikavua bimana kuenzeka bavua bamanya ne bivua bikengedibua ne bintu bionsu bilua bilondeshila ku bivua biamba.

3 Buana nanku bakalekela mibi yabu yonsu, ne malu mapita bubi abu, ne masandi abu, ne bakasadila Nzambi munya ne butuku dinanukila dionsu.

4 Ne biakalua ne pakakuatabu banyengi bonsu bena lukanu, mua ne nansha umua uvua kayi mushipa to kakanyema to, bakela bena lukanu babu mu buloko, ne bakenzeja ne babayisha dîyi dia Nzambi; ne bonsu bavua bakudimuna mutshima ku mibi yabu ne babuela mu tshipungidi ne kabakushipa kabidi bantu to bakabalekela.

5 Kadi bonsu bavua kabayi babuela mu tshipungidi, ne bakatshivua batungunuka kuikala ne meji a kushipa bantu mu musokoku awu mu mitshima yabu, eyowa, bonsu bavuabu basangana bakanyina bana babu bakapîshibua ne kupeshibua dinyoka bilondeshila ku mikenji.

6 Ne nanku bakajikija â bipungidi bibi, ne bia mu musokoku, ne bia malu mapita bubi bionsu abi, muvua muikala muenzeka bubi bupita bungi, ne dishipa dia bantu dipita bungi.

7 Ne ki muakapita tshidimu tshia makumi abidi ne tshibidi nanku, ne tshia makumi abidi ne tshisatu kabidi, ne tshia makumi abidi ne tshinayi, ne tshia makumi abidi ne tshitanu; ne ki muakapita bidimu makumi abidi ne bitanu nanku.

8 Ne kuvua bintu bia bungi bivua bienzeka, mu dimona dia bamua, bivua bikala binena ne bia dikema; nansha nanku, kabena mua kubifunda bionsu mu mukanda ewu to; eyowa, nansha tshitupa tshia lukama tshimua tshia biakenzeka munkatshi mua bantu ba bungi nanku mu mutantshi wa bidimu makumi abidi ne bitanu katshivua bua kukumbana mu mukanda ewu to;

9 Kadi monayi kudi miandiku idi mikala ne bienzedi bionsu bia bantu aba; ne mulubu muipi bikola kadi mulelela uvua mupeshibua kudi Nefi.

10 Bua nanku ndi mufunda miandiku yanyi ya malu â bilondeshila ku miandiku ya Nefi, ivua mikanunyibua pa bitata bivua bibikidibua ne bitata bia Nefi.

11 Ne monayi, ndi muenza miandiku eyi pa bitata bimvua muenza ne bianza bianyi nkayanyi.

12 Ne monayi, ndi mbikidibua ne Molomo, bualu mvua muinyikila bulaba bua Molomo, mu bulaba muakashikika Alama ekelezia munkatshi mua bantu, eyowa, ekelezia wa kumpala uvuabu bashikika munkatshi muabu kunyima kua disambuka dia mikenji diabu.

13 Monayi, ndi muyidi wa Yezu Kilisto, Muana wa Nzambi. Ndi mubikidibua kudiye bua kumanyisha muaku wenda munkatshi mua bantu benda, bua bapeta moyo wa kashidi.

14 Ne biakakengedibua ne ngenza miandiku ya malu avua menjibua â, bilondeshila ku disua dia Nzambi, bua ne masambila a bakadi baya, bavua bikala bansantu, akumbajibua bilondeshila ku ditabuija dietu—

15 Eyowa, miandiku mikesa ya bionsu bivua bienzeka katshia ku tshikondu tshivua Lehi mumbuka ku Yelushalema, mena tô ne ku tshikondu etshi.

16 Bua nanku ndi ngenza miandiku yanyi bilondeshila ku milubu ivua bantu bavua bikalaku kumpala kuanyi bafunda, tô ne ku ntuadijilu kua matuku anyi;

17 Ne pashisha ndi ngenza miandiku ya malu amvua mumona ne mesu anyi nkayanyi.

18 Ne ndi mumanya ne miandiku indi ngenza idi mikala ya bushuwa ne milelela; nansha nanku kudi bintu bia bungi, bitudi katuyi bua kufunda to bua bualu bua muakulu wetu.

19 Ne mpindiewu ngajikiji kuakula kuanyi, kudi nkutangila mema nkayanyi, ne ndi ntungunuka kuamba mulubu wanyi wa malu akavuaku kumpala kuanyi.

20 Ndi Molomo, ne ndi kankanunuina kalelela ka Lehi. Ndi ne kipatshila ka kubenesha Nzambi wanyi ne Mupandishi wanyi Yezu Kilisto, bualu wakapatula batatuetu mu bulaba bua Yelushalema (ne muntu nansha umua kavua mumanya bualu ebu to amu pa kumbusha yeya nkayenda ne abu bavuaye mupatula mu bulaba ebu) ne udi mutupesha mema ne bantu banyi dimanya dia bungi didi dikumbana bua kupeta lupandu lua anyima yetu.

21 Bushuwa udi mubenesha nzubu wa Yakoba, ne udi ne lusa kudi ndelanganyi ya Yosefe.

22 Ne monsu muvua bana ba Lehi balama mikenji yenda uvua mubabenesha ne mubalubuluja bilondeshila ku dîyi dienda.

23 Eyowa, ne bushuwa neafikisha kabidi tshishadi tshia ndelanganyi ya Yosefe ku dimanya dia Mukalenga Nzambi wabu.

24 Ne bushuwa bu mudi Mukalenga ne moyo, neasangishamu tshishadi tshionsu tshia ndelanganyi ya Yakoba kumbukila ku matengu anayi a buloba, badi batangalaka kula pa mpala onsu wa buloba.

25 Ne bu muvuaye muenza tshipungidi ne nzubu yonsu wa Yakoba, mena nanku tshipungidi tshivuaye muenza ne nzubu wa Yakoba netshikumbajibua mu tshikondu tshimukumbanyina nkayenda, ne ku dipinguluja dia nzubu yonsu wa Yakoba ku dimanya dia tshipungidi tshivuaye muenza nabu.

26 Ne pashisha nebamanya Musungidi wabu, udi muikala Yezu Kilisto, Muana wa Nzambi; ne pashisha nebasangishibua kumbukila ku matengu anayi a buloba ne ku malaba abu nkayabu, kuvuabu batangalajibua; eyowa, bu mudi Mukalenga ne moyo nanku nebikala. Amena.