1 Ne bulelela ndi nnuambila ne, ndi nupesha tshimanyinu, bua ne numanya diba dienzeka bintu ebi—dingasangisha mômu bantu banyi, Ô nzubu wa Isalele, ku ditangalaka diabu dia mutantshi mula, ne nenshikika kabidi Siona wanyi munkatshi muabu;

2 Ne monayi, etshi tshidi tshintu tshinganupesha bua tshimanyinu—bualu bulelela ndi nnuambila ne pakumbana bintu ebi bindi nnumanyisha, ne binganumanyisha mema nkayanyi kunyima eku, ne ku bukola bua Nyuma wa Tshijila buanupeshabu kudi Tatu, bimanyibua kudi Bena Bisamba bia Benda bua bamanya bitangila bantu aba badi bikala tshishadi tshia nzubu wa Yakoba, ne bitangila bantu banyi aba bâtangalajibua kudibu;

3 Bulelela, bulelela, ndi nnuambila ne, pâbamanyisha Tatu bintu ebi, ne pâpatukidibua kudi Tatu, biumbukila kudibu ne bilua kunudi;

4 Bualu bidi lungenyi kudi Tatu ne bishikikibua mu bulaba ebu, ne bikala bantu badikadila ku bukola bua Tatu, bua ne bintu ebi bipatukila kudibu bua kulua kudi tshishadi tshia ndelanganyi yenu, bua ne tshipungidi tshia Tatu tshivuaye muenza ne bantu benda tshikumbajibua, Ô nzubu wa Isalele;

5 Nanku, pâpatukila midimu eyi ne midimu yenzeka munkatshi muenu kunyima eku kudi Bena Bisamba bia Benda, iya kudi ndelanganyi yenu yashinguluka mu dipanga dia ditabuija bua bualu bua malu mabi;

6 Bualu nanku bidi bikumbanyina Tatu mbua ne ilopokela kudi Bena Bisamba bia Benda, ne aleja bukola buenda kudi Bena Bisamba bia Benda, bua bualu ebu ne Bena Bisamba bia Benda, bobu kabayi bapapisha mitshima yabu, bua ne bakudimuna mutshima ne balua kundi ne batambuishibua mu dîna dianyi ne bamanya bitupa bilelela bia diyisha dianyi, ne babadibua munkatshi mua bantu banyi, Ô nzubu wa Isalele;

7 Ne pafika bintu ebi, mu mushindu wa ne ndelanganyi yenu neibanga kumanya bintu ebi—netshikala tshimanyinu kudiyi, bua bamanya ne mudimu wa Tatu ukadi mumana kutuadija bua dikumbajibua dia tshipungidi tshivuaye muenza ne bantu badi bikala ba ku nzubu wa Isalele.

8 Ne pâlua dituku adi, nebilua ne bamfumu nebabuikila mikana yabu; bualu bua nebamona tshivuabu kabayi banji kubambila to; ne nebelangana meji pa tshivuabu kabayi banji kumvua to.

9 Bualu mu dituku adi, Tatu neenza mudimu buanyi, wikala mudimu munena ne wa dikema munkatshi muabu; ne nekuikala munkatshi muabu bikala kabayi bawitabuija to, nansha mua bamanyisha muntu.

10 Kadi monayi, moyo wa musadidi wanyi newikala mu tshianza tshianyi; bua nanku kabakumuenzela bibi to, nansha yeya munyanguka bualu buabu. Kadi nemmôndopa, bua mbaleja ne lungenyi luanyi ludi lunena kupita budimu bua diabulu.

11 Nanku nebilua ne ewu yonsu wikala kayi muitabuija mêyi anyi to, mema udi muikala Yezu Kilisto, yenzeja Tatu ne musadidi wanyi atuadila Bena Bisamba bia Benda, ne neamupesha bukola bua ayituadila Bena Bisamba bia Benda, (nebienzeka bu muvua Mose muamba) nebakoshibua ku bantu banyi badi bikala ba mu tshipungidi.

12 Ne bantu banyi badi bikala tshishadi tshia Yakoba nebikala munkatshi mua Bena Bisamba bia Benda, eyowa, munkatshi muabu bu mudi ntambua munkatshi mua nyama ya mu dîtu, bu mudi muana wa ntambua munkatshi mua bisumbu bia mikoku, udi, padiye ubuela mômu udi uyidiata ne uyipandakaja mu bipesa, ne muntu nansha umua kena mua kuyipatuisha to.

13 Tshianza tshiabu netshijudishibua pa mutu pa baluishi babu, ne bena lukuna babu bonsu nebashipibua.

14 Eyowa, diakabi dikala kudi Bena Bisamba bia Benda pa kumbusha bobu bakudimuna mutshima; bualu nebilua mu dituku adi, mudi Tatu wamba, ne nembutula tubalu tuenu munkatshi muenu, ne nennyangakaja matempu enu;

15 Ne nembutula bimenga bia mu bulaba buenu, ne nengûpula miaba yenu mikolesha yonsu;

16 Ne nembutula bu mpaka manga budi mu bulaba buenu, ne kanuakuikala kabidi ne bena lubuku to;

17 Mpingu yenu misonga nembutula kabidi, ne mpingu yenu mimana nempatula munkatshi muenu, ne kanuakutendelela kabidi midimu ya ku bianza bienu to;

18 Ne nenjula bipuka bienu idi munkatshi muenu; nembutula bimenga bienu nanku awu.

19 Ne nebilua ne mafi onsu, ne didinga, ne malakana, ne luntûta lua bungi, ne buakuidi bua mafi, ne masandi, nebijika.

20 Bualu Tatu udi wamba ne, nebilua ne, ne dituku adi bonsu bikala kabayi bakudimuna mutshima ne kuitabuija Muananyi Munanga, bobu nembakosa munkatshi mua bantu banyi, Ô nzubu wa Isalele;

21 Ne nendisombuela ne tshiji tshikola kudibu, kudi bampakanyi, bu mutubu kabayi banji kumvua to.

22 Kadi pikalabu bakudimuna mutshima ne bumvuila mêyi anyi, ne kabayi bapapisha mitshima yabu to, nenshikika ekelezia wanyi munkatshi muabu, ne nebabuela mu tshipungidi ne nebabadibua munkatshi mua tshishadi tshia Yakoba, tshindi mupesha bulaba ebu bua bupianyi buatshi;

23 Ne nebambuluisha bantu banyi, tshishadi tshia Yakoba, ne ba bungi kabidi ba ku nzubu wa Isalele nebalua, bua bibaka tshimenga, tshiabikidibua ne Yelushalema Mupia-mupia.

24 Ne pashisha nebambuluisha bantu banyi, badi bikala bamuangalaka pa mpala onsu wa bulaba, bua ne basangishibua munda mua Yelushalema Mupia-mupia.

25 Ne pashisha bukola bua mu diûlu nebupueka munkatshi muabu; ne nengikala kabidi munkatshi muabu.

26 Ne pashisha mudimu wa Tatu neutuadija dituku adi, mena pâyishibua lumu luimpa elu munkatshi mua tshishadi tshia bantu aba. Bulelela ndi nnuambila ne, dituku adi mudimu wa Tatu neutuadija munkatshi mua bonsu ba ku bantu banyi bavua batangalaka, eyowa, mena bisa bivua bikala bijimina, bivua Tatu mupatula mu Yelushalema.

27 Eyowa, mudimu neutuadija munkatshi mua bantu banyi bonsu bavua batangalaka, ne Tatu nâlongolola njila wa kuluilabu kundi, bua babikila Tatu mu dîna dianyi.

28 Eyowa, ne pashisha mudimu neutuadija, ne Tatu neikala munkatshi mua bisamba bionsu bua dilongolola dia njila wa bantu benda kudisangishabu ku mbelu mu bulaba bua bupianyi buabu.

29 Ne Tatu udi wamba ne, nebapatukila ku bisamba bionsu; ne kabakupatuka mu lubilu to, ne anyi kabakuya ne kunyema to, bualu nenya kumpala kuabu, ne nengikala mulami kunyima kuabu.