1 Ne biakalua ne wakabapesha mukenji ne bafunda miaku ivua Tatu mupesha Malaki, ivuaye mubambila. Ne biakalua ne kunyima kua kufundibuayi wakabumvuijayi. Ne eyi ki mêyi akabambilaye, wamba ne: Tatu wakambila Malaki nanku—Monayi, nentuma mutumibua wanyi, ne nealongolola njila kumpala kuanyi, ne Mukalenga unudi nukeba nealua katataka ku ntempelo wenda, mena mutumibua wa tshipungidi, unudi ne disanka nenda; monayi, nealua.

2 Kadi nganyi udi mua kushindama mu dituku dia dilua dienda, ne nganyi wimana pamuenekaye? Bualu udi bu mudi kapia ka mupeluji wa biamua, ne nsabanga wa musukudi wa bilamba.

3 Ne neasomba panshi bu mudi kapia ka mupeluji ne mukezudi wa tshiamua tshia mpalata; ne neakezula bana ba Lewi, ne neabatâta bu mudi ngolo ne mpalata, bua balambula Mukalenga mulambu mu buakana.

4 Pashisha mulambu wa Yuda ne Yelushalema neusankisha Mukalenga, bu muvuawu mu matuku a kala, ne bu muvuawu mu bidimu biakapita.

5 Ne, Mukalenga wa Misumba udi wamba ne, nendua pabuipi nuenu bua dilumbuluisha; ne nengikala mujadiki udi utuisha bena mupongu lukasa, ne bendi ba masandi, ne baditshipi ba mafi, ne bonsu badi bakengesha musadidi bua difutu dienda, mukaji mukamba ne muana wa nshiya, ne badi bipata muenyi, ne badi kabayi bantshina to.

6 Bualu ndi Mukalenga, ntshiena nshintuluka to; ki bualu nuenu bana ba Yakoba kanuena nubutuka to.

7 Mena katshia ku matuku a batatuenu nuakalekela mikenji yanyi, ne kanuena bayilama to. Mukalenga wa Misumba udi wamba ne, Pinganayi kundi ne nempingana kunudi. Kadi nudi nuamba ne: Netupingana munyi?

8 Muntu neiba Nzambi anyi? Kadi nuangibi. Kadi nudi nuamba: Tudi bakuiba munyi? Mu tshia dikumi ne milambu.

9 Nudi batshipibua ne mutshipu, bualu nudi bangiba, mena tshisamba etshi tshijima.

10 Mukalenga wa Misumba udi wamba ne, tualayi tshia dikumi tshionsu ku nzubu wa dibutshila, bua kuikala biakudia mu nzubu muanyi; ne ntêtayi mpindiewu nanku, ne ntshiakununzuluila madidishi a mu diûlu, ne ntshiakunupumuina dibenesha bua ne kakuakuikala muaba mukumbana bua kudiangata to.

11 Ne, Mukalenga wa Misumba udi wamba ne, nenkanyina munyangi bua bimpa bienu, ne kakunyangakaja bimuma bia mu buloba buenu; anyi mitshi ya mvinyo yenu kayakuponesha bimuma biawu mu madimi kumpala kua tshikondu to.

12 Ne, Mukalenga wa Misumba udi wamba ne, bisamba bionsu nebinubikila ne babeneshibua, bualu nenuikala ne bulaba busanguluka.

13 Mukalenga udi wamba ne, miaku yenu idi mikala mikola kundi. Kadi nudi nuamba ne: Ntshinyi tshitudi bamba tshibi kûdi?

14 Nudi bamba ne: Bidi tshianana bua kusadila Nzambi, ne tshipeta tshimpa kayi tshituapetshi bua kulama mikenji yenda ne bua patuvua tuenda ne madilu kumpala kua Mukalenga wa Misumba?

15 Ne mpindiewu tudi tubikila baditambishi ne mba diakalenga; eyowa, badi benza malu mapita bubi badi baya kumpala; eyowa, badi batêta Nzambi badi mena bapatuishibua.

16 Pashisha bavua batshina Mukalenga bavua bakula misangu mivula muntu ne mukuenda, ne Mukalenga wakateleja ne kumvua; ne mukanda wa tshivulukilu wakafundibua kumpala kuenda bua bavua batshina Mukalenga, ne bavua banemeka dîna dienda.

17 Ne, Mukalenga wa Misumba udi wamba ne, nebikala banyi, mu dituku adi dingikala nkunguija masanga anyi; ne nembepelesha bu mudi muntu wepelesha muanenda wa baluma udi umusadila.

18 Pashisha nenupingana ne nujingulula pankatshi pa bakana ne bena bubi bupita, pankatshi pa udi usadila Nzambi ne udi kayi umusadila to.