1 Ne biakalua ne wakapesha musumba wa bantu mukenji ne balekela kusambila, ne bayidi benda kabidi. Ne wakabapesha mukenji ne kabalekedi kusambila mu mitshima yabu to.

2 Ne wakabapesha mukenji ne bajuka ne bimana kûlu pa makasa abu. Ne bakajuka ne bakimana pa makasa abu.

3 Ne biakalua ne wakakosolola diampa kabidi ne wakadibenesha, ne wakapesha bayidi benda bua kudia.

4 Ne pakadiabu wakabapesha mukenji ne bakosolola diampa, ne badipesha musumba wa bantu.

5 Ne pakapeshabu musumba wa bantu wakabapesha kabidi mvinyo bua kunua, ne wakabapesha mukenji ne bamupesha musumba wa bantu.

6 Mpindiewu, kakuvua diampa to, anyi mvinyo, bivua bayidi anyi musumba wa bantu batuala;

7 Kadi bulelela wakabapesha diampa bua kudia, ne kabidi mvinyo bua kunua.

8 Ne wakabambila ne: Udi udia diampa edi udi udia mubidi wanyi bua anyima wenda; ne udi unua mvinyo ewu udi unua mashi anyi bua anyima wenda; ne anyima wenda kakufua ne nzala anyi nyota nansha, kadi neukutshibua.

9 Mpindiewu, pakadia musumba wa bantu ne pakanuawu onsu, monayi, bakuwula ne Nyuma; ne bakabila ne dîyi dimua, ne bakatumbisha Yezu, uvuabu bamona ne uvuabu bumvua.

10 Ne biakalua ne pakatumbishabu bonsu Yezu, wakabambila ne: monayi mpindiewu ngakumbaji mukenji uvua Tatu mumpesha bua bantu aba, badi bikala tshishadi tshia nzubu wa Isalele.

11 Nudi nuvuluka ne ngakakula kunudi, ne ngakamba ne pâkumbajibua miaku ya Yeshaya—idi mifundibua, nudi nayi kumpala kuenu, bua nanku ikebululayi—

12 Ne bulelela, bulelela, ndi nnuambila ne, pâkumbajibuayi pashisha tshipungidi tshivua Tatu muenza ne bantu benda netshikumbajibua, Ô nzubu wa Isalele.

13 Ne pashisha bishadi, biatangalajibua kula pa mutu pa mpala wa buloba, nebisangishibua kumbukila ku esete ne ku wesete, ne kumbukila ku sude ne ku node; ne nebafikishibua ku dimanya dia Mukalenga Nzambi wabu, wakabasungila.

14 Ne Tatu udi mumpesha mukenji ne nnupesha bulaba ebu, bu bupianyi buenu.

15 Ne ndi nnuambila ne, pikala Bena Bisamba bia Benda kabayi bakudimuna mutshima kunyima kua dibenesha diapetabu to, kunyima kua kutangalajabu bantu banyi—

16 Pashisha, nuenu badi bikala tshishadi tshia nzubu wa Yakoba, nenuye munkatshi muabu; ne nenuikala munkatshi muabu muikalabu ba bungi; ne nenuikala munkatshi muabu bu mudi ntambua munkatshi mua nyama ya mu dîtu, ne bu mudi muana wa ntambua munkatshi mua bisumbu bia mikoku, udi, padiye ubuelamu udi uyidiatakaja panshi ne uyipandakaja bipesa, ne muntu nansha umua kayi mua kuyipatuisha to.

17 Tshianza tshieba netshijudibua pa mutu pa baluishi beba, ne bena lukuna beba bonsu nebashipibua.

18 Ne nensangisha bantu banyi pamua bu mudi muntu usangisha minyaku yenda mu tshituilu.

19 Bualu nengenza ne nsengu ya bantu bavua tatuanyi muenza tshipungidi nabu, eyowa, nengenza ne ilua ya tshiamua tshifika, ne nengenza bikonu bieba bia tshiamua tshia kalabi. Ne neubotesha bantu ba bungi; ne nenjidila tshipeta tshimpa tshiabu bua Mukalenga, ne bintu biabu bua Mukalenga wa buloba bujima. Ne monayi, mema ki udi wenza nanku.

20 Ne Tatu udi wamba ne, nebilua ne, ne muela wa mvita wa bululama buanyi neulembelela pa mutu pabu dituku adi; ne amu pa kumbusha bobu bakudimuna mutshima neubakulukila, bu mudi tatu wamba, eyowa, mena pa mutu pa bisamba bionsu bia Bena Bisamba bia Benda.

21 Ne nebilua ne nenshikika bantu banyi, Ô nzubu wa Isalele.

22 Ne monayi, nenshikika bantu aba mu bulaba ebu, bua tshipungidi tshindi muenza ne tatu wenu Yakoba tshikumbajibua; ne nebuikala Yelushalema Mupia-mupia. Ne bukola bua mu diûlu nebuikala munkatshi mua bantu aba; eyowa, nengikala mena munkatshi muenu.

23 Monayi, mema uvua Mose muakula, wamba ne: Mukalenga Nzambi wenu neanubishila muambi ku bana benu, bu mundi; yeya nenumuteleja ku bintu bionsu bianuambilaye. Ne nebilua ne muntu onsu wabenga kuteleja muambi awu neakoshibua munkatshi mua bantu.

24 Bulelela ndi nnuambila ne, eyowa, bambi bonsu kubangila kudi Samuele ne badi balonda kunyima abu, bonsu bavua bakula, bavua bajadika buanyi.

25 Ne monayi, nudi bana ba bambi; ne nudi ba ku nzubu wa Isalele; ne nudi ba ku tshipungidi tshiakenza Tatu ne batatuenu, wambila Abalahama ne: Ne bisa bionsu bia pa buloba nebibeneshibua kupitshila ku ndelanganyi yeba.

26 Tatu mumana kunjula bua kulua kunudi kumpala, ne udi muntuma bua kunubenesha bua kulekeja muntu yonsu wa kunudi malu mabi enda; ne nanku bualu nudi bana ba mu tshipungidi—

27 Ne kunyima kua nuenu babeneshibua pashisha Tatu neakumbaja tshipungidi tshidiye muenza ne Abalahama, wamba: Ne bisa bionsu bia pa buloba nebibeneshibua kupitshila ku ndelanganyi yeba—ku ditshikija dia Nyuma wa Tshijila pa mutu pa Bena Bisamba bia Benda kupitshila kundi, dibenesha edi nedipesha Bena Bisamba bia Benda bukitu kupita bantu bakuabu bonsu, tô ne ku ditangalaja dia bantu banyi, Ô nzubu wa Isalele.

28 Ne, Tatu udi wamba ne, nebikala munyasu bua bantu ba mu bulaba ebu. Nansha nanku, pikalabu bapeta tshiwudi tshia lumu luimpa luanyi, pashisha biampapishilabu mitshima yabu, nembapingajila malu mabi abu pa mitu yabu nkayabu.

29 Ne, Tatu udi wamba ne, nemvuluka tshipungidi tshimvua muenza ne bantu banyi; ne mvua muenza tshipungidi nabu ne nembasangisha pamua mu diba dianyi nkayanyi, ne nembapesha kabidi bulaba a batatuabu bua bupianyi buabu, adi mikala bulaba bua Yelushalema, adi mikala bulaba bulaya kudibu bua kashidi.

30 Ne nebilua ne tshikondu tshilualua, tshiayishibua tshiwudi tshia lumu luimpa luanyi kudibu;

31 Ne nebangitabuija, ne mema ndi Yezu Kilisto, Muana wa Nzambi, ne nebasambila Tatu mu dîna dianyi.

32 Pashisha batentekedi babu nebela dîyi diabu, ne nebimba ne dîyi pamua; bualu nebadimuena ne mesu.

33 Pashisha Tatu neabasangisha kabidi pamua, ne neabapesha Yelushalema bu mudi bulaba bua bupianyi buabu.

34 Pashisha nebatudika ne disanka—Imbayi pamua, nuenu miaba ya bikulu ya Yelushalema; bualu Tatu wasambi bantu benda, wasungila Yelushalema.

35 Tatu waleji diboku dienda dia tshijila patoka ku mesu kua bisamba bionsu; ne ndekelu ya buloba yonsu neimona lupandu lua Tatu; ne Tatu ne mema badi tshintu tshimua.

36 Ne pashisha tshidi tshifundibua netshivuijibua: Bika, bika kabidi, ne uluata bukola bueba, Ô Siona; uluata bilamba bieba bilengela, Ô Yelushalema, tshimenga tshia tshijila, bualu bua kubangila apa muntu udi kayi mutengula ne muntu wa bukoya kabakulua kabidi munda mueba to.

37 Ditutula ku lupuishi; juka, somba, Ô Yelushalema; disulula mionji ya mu nshingu mueba, wewa muana wa bakaji mukuatshibu wa Siona.

38 Bualu Mukalenga udi wamba nanku: Nuakadipanyisha bua tshianana, ne nenusungidibua kabiyi ne makuta to.

39 Bulelela, bulelela, ndi nnuambila ne, bantu banyi nebamanya dîna dianyi; eyowa, mu dituku adi nebamanya ne mema udi wakula.

40 Ne pashisha nebamba: Bu mudiwu malengela pa mikuna makasa a ewu udi utuala lumu luimpa, udi utangalaja ditalala; udi utuala lumu luimpa lua buimpa kudibu, udi utangalaja lupandu; udi wambila Siona ne: Nzambi weba udi ukôkesha!

41 Ne pashisha lubila neluya: Umbukayi, umbukayi, patukayi pa muaba awu, kanulengi tshintu tshia bukoya to; patukayi munkatshi muatshi; ikalayi ne mankenda nuenu badi bambula malongu a Mukalenga.

42 Kadi kanuakupatuka tshimpitshimpi anyi kanuakuya lubilu to; bualu Mukalenga neaya kumpala kuenu, ne Nzambi wa Isalele neikala mulami kunyima kuenu.

43 Monayi, musadidi wanyi neikala ne budimu; neabandishibua mûlu ne neatamba kuikala mûlu mula.

44 Bu muvua ba bungi bakukema—mpala wenda uvua munyanguka, kupita muntu yonsu, ne tshimfuanyi tshienda kupita tshia bana ba baluma ba bantu—

45 Nanku neamiamina bisamba bia bungi mashi; bamfumu nebabuikila mikana yabu bualu buenda, bualu nebamona tshivuabu kabayi banji kubambila to; ne nebelangana meji pa malu avuabu kabayi banji kumvua to.

46 Bulelela, bulelela, ndi nnuambila ne, bintu ebi bionsu bushuwa nebilua, mena bu mudi Tatu mumpesha mukenji. Pashisha tshipungidi etshi tshiakenza Tatu ne bantu benda netshikumbajibua; ne pashisha bantu banyi nebasomba kabidi mu Yelushalema, ne nebuikala bulaba bua bupianyi buabu.