1 Ne biakalua ne pakajikija Yezu mêyi â wakakupa mesu enda ku mpenga yonsu kudi musumba wa bantu, ne wakabambila ne: Monayi, numvu bintu bingalongeshi kumpala kua mema mubanda kudi Tatu wanyi; bua nanku, ewu yonsu udi uvuluka mêyi â ne udi uyenzela, yeya nemmujula ku dituku dia ndekelu.

2 Ne biakalua ne pakamba Yezu mêyi â wakamona ne kuvua bamua munkatshi muabu bavua bakema, ne badiebeja ne tshinyi tshivuaye musua kuenza ne mikenji ya Mose; bualu kabavua bumvua mêyi avua amba ne bintu bia kala bikadi bipita, ne bintu bionsu biakadi bilua bipia-bipia to.

3 Ne wakabambila ne: Kanukemi to bualu nganuambidi ne bintu bia kala bikadi bipita, ne bintu bionsu bikadi bilua bipia-bipia.

4 Monayi, ndi nnuambila ne mikenji ivua mipeshibua kudi Mose yakumbajibu.

5 Monayi, ndi yeya wakafila mikenji, ne ndi yeya wakenza tshipungidi ne bantu banyi Isalele; bua nanku, mikenji idi mikumbajibua kundi, bualu ndi mulua bua kukumbaja mikenji; bua nanku idi ne ndekelu.

6 Monayi, ntshiena nshipa miaku ya bambi to, bualu yonsu idi kayiyi mikumbajibua kundi to, bulelela ndi nnuambila ne, neikumbajibua yonsu.

7 Ne bualu nganuambidi ne bintu bia kala bikadi bipita, ntshiena nshipa bivua biamba bitangila malu atshilualua to.

8 Bualu monayi, tshipungidi tshingakenza ne bantu banyi katshiena tshikumbajibua tshionsu to; kadi mikenji ivua mipeshibua kudi Mose idi ne ndekelu kundi.

9 Monayi, mema ndi mikenji, ne bukenka. Tangilayi kundi, ne nanukilayi tô ne ku ndekelu, ne nenupeta moyo; bualu nempesha moyo wa tshiendelela kudi ewu udi unanukila tô ne ku ndekelu.

10 Monayi, ndi munupesha mikandu; bua nanku lamayi mikandu yanyi. Ne etshi tshidi mikenji ne miaku ya bambi, bualu bulelela bidi bijadika bua bualu buanyi.

11 Ne mpindiewu biakalua ne pakakula Yezu mêyi â, wakambila dikumi ne babidi bakasungulaye abu ne:

12 Nuenu nudi bayidi banyi; ne nuenu nudi bukenka kudi bantu aba, badi bikala tshishadi tshia nzubu wa Yosefe.

13 Ne monayi, ebu budi bulaba bua bupianyi buenu; ne Tatu udi munupeshabu.

14 Ne musangu nansha umua Tatu kavua mumpesha mukenji ne mbuambila bana benu badi ku Yelushalema to.

15 Anyi musangu nansha umua Tatu kavua mumpesha mukenji ne mbambila bitangila bisa bikuabu bia ku nzubu Isalele, bidi Tatu mulombola kula ne bulaba to.

16 Nanku ki mudi Tatu mumpeshela mukenji, ne mbambila etshi:

17 Ndi ne mikoku mikuabu idi kayiyi ya mu tshikumbi etshi to; ndi ne tshia kulua nayi payi, ne neyumvua dîyi dianyi; ne nekuikala tshisumbu tshia mikoko tshimua, ne mulami umua.

18 Ne mpindiewu, bua dîminyina dia nshingu ne dipanga ditabuija kabakumvua dîyi dianyi to; bua nanku Tatu wakampesha mukenji ne tshibambidi bitangila bualu ebu to.

19 Kadi, bulelela, ndi nnuambila ne Tatu uvua mumpesha mukenji, ne ndi nnuambila ne, nuvua batapulula kudibu bua malu mabi abu; bua nanku kabena bamanya bualu buenu to bua malu mabi abu.

20 Ne bulelela, ndi nnuambila kabidi ne Tatu uvua mutapulula bisa bikuabu kudibu; ne kabena bamanya bualu buabu to bua malu mabi abu.

21 Ne bulelela ndi nnuambila ne, nudi bangakamba ne: Ndi ne mikoko mikuabu idi kayiyi ya mu tshikumbi etshi to; yoyi ndi ne tshia kulua nayi payi, ne neyumvua dîyi dianyi; ne nekuikala tshisumbu tshia mikoko tshimua, ne mulami umua.

22 Ne kabakumvua to, bualu bakatshinka ne ivua mikala Bena Bisamba bia Benda; bualu kabakumvua ne Bena Bisamba bia Benda nebakudimuna moyo ku njila wa diyisha diabu to.

23 Ne kabakangumvua to pangakamba ne nebateleja dîyi dianyi; ne kabakumvua ne Bena Bisamba bia Benda kabakuteleja dîyi dianyi nansha musangu umua to—ne ntshiakudileja kudibu to, pa kumbusha bikala ku njila wa Nyuma wa Tshijila.

24 Kadi monayi, nuateleji dîyi dianyi, ne nuammonyi; ne nudi mikoku yanyi, ne nudi nubadibua munkatshi mua aba badi Tatu mumpesha.