1 Monayi, mpindiewu biakalua ne ne pakakula Yezu mêyi â, wakatangila musumba onsu wa bantu kabidi, ne wakabambila ne: Monayi, diba dianyi dikadi pabuipi.

2 Ndi mmona ne nudi bateketa, bua ne kanuena mua kumvua mêyi anyi onsu avua Tatu mumpesha mukenji bua kunuambila diba edi to.

3 Bua nanku, pinganayi ku mbelu, ne nunana meji bitangila bia malu anganuambidi, ne nuebeja Tatu, mu dîna dianyi, bua nuenu kumvua, ne kulongolola meji enu bua malaba, ne ndi ndua kabidi kunudi.

4 Kadi mpindiewu ndi nya kudi Tatu, ne bua kudileja kabidi kudi bisa bijimina bia Isalele, bualu bua Tatu kabena bajimina to, bualu udi mumanya kudiye muya nabu.

5 Ne biakalua ne pakakula Yezu nanku, wakakupa mesu enda kabidi ku mpenga yonsu kudi musumba wa bantu, ne wakamona ne bavua ne binsonji, ne bakamutangila ne disuminyina bikala bu bavua basua kumulomba bua kushala nabu katantshi kala.

6 Ne wakabambila ne: Monayi, munda muanyi mudi muwula ne moyo wa lusa buenu.

7 Nudi ne babêdi munkatshi muenu anyi? Luayi nabu apa. Nudi ne bibombu, anyi mpofu, anyi batebuki, anyi badi balema, anyi bena nsudi, anyi badi ne bitupa bifulama, anyi bapata matshi, anyi badi batatshishibua mu mushindu onsu anyi? Luayi nabu apa ne nembôndopa, bualu ndi ne moyo wa lusa buenu; munda muanyi mudi muwula ne lusa.

8 Bualu ndi mmona ne nudi nujinga ne nnuleja tshindi muenzela bana benu ku Yelushalema, bualu ndi mmona ne ditabuija dienu didi dikumbana bua mema kunôndopa.

9 Ne biakalua ne pakakulaye nanku, musumba onsu wa bantu, wakasemena patshimua ne babêdi babu ne batatshishibua babu, ne balema babu, ne ne mpofu yabu, ne ne tumama tuabu, ne ne babu bonsu bavua batatshishibua mu mushindu onsu; ne wakabôndopa bonsu bu muvuabu balua nabu kudiye.

10 Ne bonsu buabu, bavua bôndopibua ne bavua ne bukola bua mubidi, bakinama ku makasa enda, ne bakamukukuila; ne bonsu bavua mua kulua nansha muvuaku musumba wa bantu bakatua makasa enda mishiku, mua ne bakasukula makasa enda ne binsonji biabu.

11 Ne biakalua ne wakabapesha mukenji ne batuala bana babu bakesa.

12 Nanku bakatuala bana babu bakesa ne bakabateka panshi ku mpenga yenda yonsu, ne Yezu wakimana munkatshi muabu; ne musumba wa bantu wakunzulula njila tô ne pakabatualabu bonsu kudiye.

13 Ne biakalua ne pakabatualabu, ne pakimana Yezu munkatshi muabu, wakapesha musumba wa bantu mukenji bua batua binu panshi.

14 Ne biakalua ne pakatuabu binu panshi, Yezu wakela mikemu munda muenda, ne wakamba ne: Tatu, ndi mutatshishibua bua bubi bua bantu ba mu nzubu wa Isalele.

15 Ne pakambaye mêyi â, yeya nkayenda penda wakatua binu panshi; ne monayi wakasambila Tatu, ne bintu biakasambidilaye kabiena mua kufundibua to, ne musumba wa bantu bakamuteleja, wakajadika.

16 Ne mu mushindu ewu badi bajadika: Disu kaditu dianji kumona to, anyi ditshi kaditu dianji kumvua to, katshia, bintu binena ne bia dikema nanku to bu bituakumvua ne bituakamona Yezu wambila Tatu;

17 Ne ludimi kaluena mua kuamba to, anyi muntu nansha umua kena mua kubifunda to, anyi mitshima ya bantu kayena mua kuela meji a bintu bipita bunena ne bia dikema nanku bu bituakamona ne bituakumvua Yezu wamba to; ne muntu nansha umua kena mua kuela meji a disanka diakuwuja anyima yetu diba dituakamumvua usambila Tatu buetu.

18 Ne biakalua ne pakashikija Yezu kusambila Tatu, wakajuka; kadi disanka dia musumba wa bantu divua dipita bunena tô ne bakatûtshika.

19 Ne biakalua ne Yezu wakakula nabu, ne wakabambila ne bajuka.

20 Ne bakajuka panshi, ne wakabambila ne: Nudi babeneshibua bua ditabuija dienu. Ne mpindiewu monayi, disanka dianyi ndiwula ntenta.

21 Ne pakambaye mêyi â, wakadila, ne musumba wa bantu wakajadika buatshi, ne yeya wakangata bana babu bateketa, ku umua ku umua, ne wakababenesha, ne wakasambila Tatu buabu.

22 Ne pakenzaye nanku wakadila kabidi;

23 Ne wakambila musumba wa bantu, ne wamba ne: monayi bana benu bateketa.

24 Ne bu muakatangilabu bua kumona bakabandisha mesu abu mu diûlu, ne bakamona diûlu diunzuluka, ne bakamona banjelu batuluka mu diûlu bu ne bavua munkatshi mua kapia; ne bakapueka panshi ne bakanyungulula bana bakesa abu ku mpenga yonsu, ne bakanyunguludibua ku mpenga yonsu ne kapia; ne banjelu bakabasadila.

25 Ne musumba wa bantu wakamona ne wakumvua ne wakajadika; ne badi bamanya ne bujadiki buabu budi bulelela bualu bonsu buabu bakamona ne kumvua, muntu yonsu buenda nkayenda; ne bavua bantu pabuipi ne bungi binunu bibidi ne nkama itanu; ne bavua bantu baluma, bantu bakaji, ne bana.