1 Ne mpindiewu biakalua ne pakamba Yezu bintu ebi wakabiumvuija musumba wa bantu; ne wakabumvuija bintu bionsu, binena ne bikesa.

2 Ne wakamba: Mifundu eyi, inuvua kanuyi nayi to, Tatu uvua mumpesha mukenji bua nnupeshayi; bualu bivua bimpa mu lungenyi luenda bua ne ipeshibua kudi nkongu ya bantu idi ilua.

3 Ne wakumvuija bintu bionsu, mena kumbukila ku mbangilu tô ne ku diba dialuaye mu butumbi buenda—eyowa, mena bintu bionsu bialua pa mpala wa buloba, mena tô ne penguluka bintu ku kapia kakola, ne pâvungibua buloba pamua bu mudi muvungu wa mukanda, ne pâjimina diûlu ne buloba;

4 Ne mena ne ku dituku dinena ne dia ndekelu, pimana bantu bonsu, ne bisa bionsu, ne bisamba bionsu ne miakulu yonsu kumpala kua Nzambi, bua kulumbuluishibua bua midimu yabu, ne idi mikala mimpa anyi ne idi mikala mibi—

5 Bikalayi mimpa, bua kupeta moyo wa kashidi ku dibika; ne bikalayi mibi, bua kupeta dipîshibua ku dibika dia ku lufu; bu mudibi bifuanangana, tshimua ku tshianza etshi ne tshikuabu ku tshianza atshi, bilondeshila ku lusa, ne ku bululama, ne ku bunsantu budi munda mua Kilisto, uvua muikala koku kumpala kua buloba bufukibua.

6 Ne mpindiewu nansha tshitupa tshimua tshia lukama tshia bintu biakalongesha Yezu bulelela bantu katshiena mua kufundibua munda mua mukanda ewu to;

7 Kadi monayi bitata bia Nefi bidi bikala ne tshitupa tshinena tshia bintu biakalongeshaye bantu.

8 Ne ndi mufunda bintu ebi, bidi bikala tshitupa tshipita bukesa tshia bintu biakalongeshaye bantu; ne ndi mubifunda ne dijinga dia ne babituadila kabidi kudi bantu aba, biumbukila kudi Bena Bisamba bia Benda, bilondeshila ku mêyi avua Yezu muakula.

9 Ne pikalabu bapeta ebi, bidi bikengedibua ne babipeta kumpala, bua kutêta ditabuija diabu, ne pikalabi ne nebitabuija bintu ebi pashisha bintu bipita bunena nebimanyishibua kudibu.

10 Ne bikalabi ne badi babenga kuitabuija bintu ebi, nanku bintu bipita bunena nebibapadibua, bua dipîshibua diabu.

11 Monayi, mvua pabuipi ne kubifunda, bionsu bivua bikanunyibua pa bitata bia Nefi, kadi Mukalenga wakankandika, wamba ne: Nentêta ditabuija dia bantu banyi.

12 Bua nanku mema, Molomo, ndi mfunda bintu Mukalenga mumpeshela mukenji. Ne mpindiewu mema, Molomo, ngajikiji miaku yanyi, ne ntungunuka ne kufunda bintu bivuaye mumpeshela mukenji.

13 Bua nanku, ndi musua bua numona ne bulelela Mukalenga wakalongesha bantu, bua mutantshi wa matuku asatu; ne kunyima kuaku wakadileja kudibu misangu mivula, ne wakakosolola diampa misangu mivula, ne wakadibenesha, ne wakabapeshadi.

14 Ne biakalua ne wakalongesha ne wakasadila bana ba musumba wa bantu uvua muakudibua, ne wakasulula ndimi yabu, ne bakambila batatuabu malu manena ne a dikema, mena manena kupita avua mabuluidibua kudi bantu; ne wakasulula ndimi yabu bua ne bakumbana bua kuakula.

15 Ne biakalua ne kunyima kua kubandaye mu diûlu—uvua musangu muibidi wakadilejaye kudibu, ne wakaya kudi Tatu, kunyima kua kôndopaye babêdi babu bonsu, ne balema babu, ne kutabejaye mesu a mpofu yabu ne kumvuijaye bapata matshi, ne kuenzaye diôndopa dia mushindu onsu munkatshi muabu, ne kubishaye muntu ku bafua, ne kubaleja bukola buenda, ne kubandaye kudi Tatu—

16 Monayi, biakalua ne pakatshiabu, musumba wa bantu wakadisangisha pamua, ne bakamona ne bakumvua bana aba; eyowa, mena bana batshivua bâmua bakabulula mikana yabu ne bakamba bintu bia dikema; ne malu akakulabu avua makandikibua ne muntu ka’afundi to.

17 Ne biakalua ne bayidi bavua Yezu musungula bakabanga katshia ku tshikondu atshi kutambuisha ne kulongesha bonsu bakalua kudibu; ne bonsu bakatambuishibua mu dîna dia Yezu bakuwula ne Nyuma wa Tshijila.

18 Ne ba bungi ba ku bobu bakamona ne bakumvua bintu bivua kabiyi kuamba to, bivua muntu nansha umua kayi ne dianyisha bua kubifunda to.

19 Ne bakalongesha, ne bakasadilangana; ne bavua ne bintu bionsu pamua munkatshi muabu, muntu yonsu musomba biakana ne mukuenda.

20 Ne biakalua ne bakenza bintu bionsu mena bu muvua Yezu mubapesha mukenji.

21 Ne bavua batambuishibua mu dîna dia Yezu bakabikidibua ne ekelezia wa Kilisto.