Shapita 23
Yezu udi witaba miaku ya Yeshaya—Udi upesha bantu bua kukebulula bambi—Badi basakidila miaku ya Samuele Muena Lamana idi mitangila Dibika dia ku lufu ku miandiku yabu. Pabuipi ne 34 p.d.K.
1 Ne mpindiewu, monayi, ndi nnuambila ne, nudi ne tshia kukebulula bintu ebi. Eyowa, ndi nupesha mukenji ne nukebulula bintu ebi ne dinanukila; bualu miaku ya Yeshaya idi ne mushinga mukola.
2 Bualu uvua muakula bua bintu bionsu bidi bitangila bantu banyi badi bikala ba ku nzubu wa Isalele; bua nanku bidi bikengela ne udi ne tshia kuakula kabidi kudi Bena Bisamba bia Benda.
3 Ne bintu bionsu biakakulaye biakenzeka ne nebienzeka, mena bilondeshila ku miaku yakakulaye.
4 Bua nanku teyayi ntema ku mêyi anyi; fundayi bintu binganuambidi; ne nebiya kudi Bena Bisamba bia Benda bilondeshila ku diba ne disua dia Tatu.
5 Ne ewu yonsu umvuila mêyi anyi ne wakudimuna mutshima ne watambuishibua, muina awu neapandishibua. Kebululayi bambi, bualu kudi ba bungi badi bajadika malu a.
6 Ne mpindiewu biakalua ne pakamba Yezu mêyi â wakabambila kabidi, kunyima kua yeya mubumvuija mifundu ya Nzambi yonsu ivuabu bapeta, wakabambila ne: Monayi, ndi musua ne nufunda mifundu ya Nzambi mikuabu inudi kanuyi bafunda to.
7 Ne biakalua ne wakambila Nefi ne: Tuala miandiku inudi balama.
8 Ne pakatuala Nefi miandiku, ne pakayitekaye kumpala kuenda, wakakupa mesu kudibu ne wakamba ne:
9 Bulelela ndi nnuambila ne, ngakapesha musadidi wanyi Samuele, Muena Lamana, mukenji ne ajadikila bantu aba, ne ku dituku diatumbisha Tatu dîna dienda kundi ne nekuikala bansantu ba bungi bâbika ku bafua, ne bâmueneka kudi bantu ba bungi, ne bâbasadila. Ne wakabakonka ne: Kabivua nanku anyi?
10 Ne bayidi benda bakamuandamuna ne bakamba ne: Eyowa, Mukalenga, Samuele wakamba ku Nyuma bilondeshila ku mêyi eba, ne akakumbajibua onsu.
11 Ne Yezu wakabambila ne: Munyi munudi kanuyi bafunda bualu ebu to, ne bansantu ba bungi bakabika ne bakamuenekela bantu ba bungi ne bakabasadila?
12 Ne biakalua ne Nefi wakavuluka ne bualu ebu kabuvua bufundibua to.
13 Ne biakalua ne Yezu wakapesha mukenji ne bufundibua; bua nanku bakabufunda bilondeshila bu muvuaye mufila mukenji.
14 Ne mpindiewu biakalua ne pakabumvuija Yezu mifundu ya Nzambi yonsu pamua, ivuabu bafunda, wakabapesha mukenji ne balongesha malu avuaye mubumvuija.