1 Ne mpindiewu biakalua ne bantu ba Bena Nefi bakapingana bonsu ku malaba abu nkayabu mu tshidimu tshia makumi abidi ne tshisambombo, muntu yonsu ne dîku dienda, bisumbu bia bimuna bikesa ne binena bienda, tubalu tuenda ne ngomba yenda, ne bintu bikuabu bionsu bivua bikala biabu.

2 Ne biakalua ne kabavua badia biakudia biabu bionsu to; bua nanku bakaya ne bionsu bivuabu kabayi badia to, ntenta yabu yonsu ya mushindu onsu, ne ngolo yabu, ne mpalata yabu, ne bintu biabu bia mushinga bionsu, ne bakapingana ku malaba abu ne ku bintu biabu, ku ku node ne ku sude, ku buloba bua ku bulaba bua ku node ne ku bulaba bua ku sude.

3 Ne bakapesha banyengi bavua babuela mu tshipungidi tshia kulama ditalala dia mu bulaba, bavua bajinga kushala Bena Lamana, malaba, bilondeshila ku bungi buabu, bua bapeta, ku dikuata diabu dia mudimu, biakudidîshabu nabi; ne nanku bakashikika ditalala mu bulaba bonsu.

4 Ne bakabanga kabidi kulubuluka ne kulua bantu banena; ne bidimu makumi abidi ne bisambombo ne makumi abidi ne muanda muteketa biakapita, ne kuakadi bulongama bunena mu bulaba; ne bavua bateka mêyi abu bilondeshila ku bujalama ne bululama.

5 Ne mpindiewu, kakuvua tshintu nansha tshimua mu bulaba to bua kukandika bantu bua kutungunuka kulubuluka, pa kumbusha bapona mu disambuka dia mikenji.

6 Ne mpindiewu Gidigidoni ne mulumbuluishi, Lakoneuse, ne bavuabu basungula bu mudi balombodi abu, ki bavua bashikika ditalala dia bungi edi mu bulaba.

7 Ne biakalua ne kuvua bimenga bia bungi bivuabu bibakilula, ne kuvua bimenga bia kala bia bungi bivuabu bakaja.

8 Ne kuvua bibeba bia bungi bivuabu bibaka, ne njila ya bungi ivuabu benza, bivua bilombola ku tshimenga ne ku tshimenga, ne ku bulaba ne ku bulaba, ne ku muaba ne ku muaba.

9 Ne ki muakapita tshidimu tshia makumi abidi ne tshia muanda mukulu nanku, ne bantu bavua ne ditalala ditungunuka.

10 Kadi biakalua ne mu tshidimu tshia makumi abidi ne tshia tshitema kuakabanga kuikala matandu munkatshi mua bantu; ne bamua bavua badibandisha mu diditambisha ne didiamba bua mabanji abu mapita bungi, eyowa, mena ne ku dikengeshangana dikola;

11 Bualu kuvua bangenda mushinga ba bungi mu bulaba, ne kabidi balumbuluidi ba bungi, ne bampulushi ba bungi.

12 Ne bantu kusunguludibua ku milongu, bilondeshila ku mabanji abu ne dikasa dimpa dia kulonga kuabu kua tulasa; eyowa, bamua bavua bapangila dimanya bua bupela buabu, bakuabu bavua ne dimanya dia bungi bua mabanji abu.

13 Bamua bakadibandisha mu diditambisha, ne bakuabu bavua bikala badipuekeshi menamena; bamua bavua bapingaja kupenda ne kupenda, pavua bakuabu bakenga kupenda ne dikengeshibua ne mishindu yonsu ya ntatu, ne kabavua bakudimuka ne bapenda pabu to, kadi bavua badipuekeshi ne bakudimuna mutshima kumpala kua Nzambi.

14 Ne nanku kuakalua dishilangana dinena mu bulaba bonsu, mua ne ekelezia wakabanga kukosolokangana; eyowa, mua ne mu tshidimu tshia makumi asatu ekelezia uvua mukosolokangana mu buloba bonsu amu pa kumbusha munkatshi mua Bena Lamana bakesa bavua bakudimuna moyo ku ditabuija dilelela; ne kabavua badilekela to, bualu bavua bakamakana, ne basuminyina, ne kabayi banyungana to, bitaba bua kulama mikenji ya Mukalenga ne dinanukila dionsu.

15 Mpindiewu tshiena bualu tshia malu mabi a bantu â tshivua nanku—Satana uvua ne bukola bua bungi, bua kusonsola bantu ku dienza dia mishindu yonsu ya malu a bubi, ne bua kubuwuja ne diditambisha, ubatêta bua kukeba bukalenga, ne bukôkeshi, ne mabanji, ne bintu bia tshianana bia pa buloba.

16 Ne nanku Satana wakapambuisha mitshima ya bantu bua kuenza mishindu yonsu ya malu a bubi; bua nanku bakasanka bua ditalala bua bidimu bikesa.

17 Ne nanku, ku ntuadijilu wa tshidimu tshia makumi asatu—bantu bikala badifila bua mutantshi wa tshikondu tshila bua matêtshibua a diabulu aya nabu konsu kuvuaye unjiga bua kuya nabu, ne bua kuenza malu mabi onsu avuaye ujinga ne benza—ne nanku ku ntuadijilu kua tshidimu tshia makumi asatu etshi, bavua mu ngikadilu wa bubi budi butshinyisha.

18 Mpindiewu kabavua benza mibi mu dipanga to, bualu bavua bamanya disua dia Nzambi bibatangila, bualu divua dibalongesha; bua nanku bavua batombokela Nzambi muvuabu basua.

19 Ne mpindiewu bivua mu matuku a Lakoneuse, muana wa Lakoneuse, bualu Lakoneuse uvua musomba mu nkuasa wa tatuenda ne uvua ulombola bantu tshidimu atshi.

20 Ne kuakabanga kuikala bantu bapetela meji kudi diûlu ne batumibua, bimana munkatshi mua bantu mu bulaba bonsu, bayisha ne bajadika ne dikima bua mibi ne malu mabi a bantu, ne ubajadikila bitangila disungila divua Mukalenga wenza bua bantu benda, anyi mu miaku mikuabu, dibika dia ku lufu dia Kilisto; ne bakajadika ne dikima bua lufu luenda ne makenga enda.

21 Mpindiewu kuvua ba bungi ba ku bantu bavua bafîka tshiji menamena bua bualu bua aba bavua bajadika bua bintu ebi; ne aba bavua bafîka tshiji bavua bikala nangananga balumbuluishi banena, ne aba bavua bikala bakuidi banena ne balumbuluidi; eyowa, bonsu bavua bikala balumbuluidi bavua bafîkila aba bavua bajadika bintu ebi tshiji.

22 Mpindiewu kakuvua mulumbuluidi nansha umua anyi mulumbuluishi anyi muakuidi munena uvua ne bukôkeshi bua kukosela muntu lufu to amu dipîshibua diabu dituibua tshiala kudi ngovena wa mu bulaba.

23 Mpindiewu kuvua bantu ba bungi ba ku bavua bajadika bua bintu bivua bitangila Kilisto bavua bajadika ne dikima, bakakuatabu ne bakashipabu mu musokoku kudi balumbuluishi, bua ne dimanya dia lufu luabu kadiakalua kudi ngovena wa bulaba to tô ne kunyima kua lufu luabu.

24 Mpindiewu monayi, ebi bivua bishilangana ne mêyi a mu bulaba, ne kabena bashipa muntu to, pa kumbusha bobu bapeta bukôkeshi kudi ngovena wa mu bulaba—

25 Bua nanku difunda diakaya ku bulaba bua Zalahemela, kudi ngovena wa mu bulaba, bua kufunda balumbuluishi bavua bakosela bambi ba Mukalenga lufu abu, kabiyi bilondeshila mikenji to.

26 Mpindiewu biakalua ne bakabakuata ne bakalua nabu ku mpala kua mulumbuluishi, bua kulumbushibuabu bua bubi buvuabu benza, bilondeshila mikenji ivua bantu bateka.

27 Mpindiewu biakalua ne balumbuluishi abu bavua ne balunda ba bungi ne malela; ne bavua bashala, eyowa, mena pabuipi ne balumbuluidi bonsu ne bakuidi banena, bakadisangisha pamua, ne bakadisanga ne malela a balumbuluishi bavua ne bua kulumbuluishibua bilondeshila ku mikenji.

28 Ne bakabuela mu tshipungidi muntu ne mukuenda, eyowa, mena tshipungidi tshivua bantu ba kala bashiya, tshina tshipungidi tshivua tshipeshibua ne tshitshipishibua kudi diabulu, bua kusangidila buakana bonsu.

29 Bua nanku bakadisanga bua kuluisha bantu ba Mukalenga, ne babuela mu tshipungidi tshia kubashipa, ne kupatuisha bavua bapîla bua dishipa dia bantu bavua kabayi bua kubafuka ku bululama to, buvuabu pabuipi ne kuenzela bilondeshila ku mikenji.

30 Ne bakelangana mpata ne mikenji ne manema a ditunga diabu; ne bakenza tshipungidi muntu ne mukuenda bua kushipa ngovena, ne kushikika mfumu ku mutu kua bulaba, bua ne bulaba kabuikadi kabidi ne budishikaminyi to, kadi buikala bubatshikibua kudi bamfumu.