Shapita 25
Ku Dilua Dibidi, baditambishi ne benji ba malu mapita bubi nebôshibua bu mudi nsona—Eliya neapingana kumpala kua dituku dituku dinena ne didi dikuatshisha bôwa adi—Fuanyikija ne Malaki 4. Pabuipi ne 34 p.d.K.
1 Bualu monayi, Mukalenga wa Misumba udi wamba ne, dituku didi dilua dikala diôsha bu mudi kapia ka mu mfulu; ne baditambishi bonsu, eyowa, ne bonsu badi benza malu mapita bubi, nebikala bu mudi nsona; ne dituku didi dilua nedibôsha, bua ne kadiakubashila muji anyi ditamba to.
2 Kadi buenu nuenu badi batshina dîna dianyi, Muana wa Buakana neabika ne londapu mu mapuapua enda; ne nenupatuka ne nenukola bu mudi bana ba ngomba mu tshikumbi.
3 Ne, Mukalenga wa Misumba udi wamba ne, nenudiatakaja benji ba malu mapita bubi mu makasa; bualu nebikala bu mudi butu muinshi mua makasa enu mu dituku dingenza nanku awu.
4 Vulukayi mikenji ya Mose, musadidi wanyi, ungakamupesha mu Holeba bua Isalele yonsu, ne mikandu ne mêyi.
5 Monayi, nennutumina Eliya muambi kumpala kua dilua dia dituku dinena ne didi dikuatshisha bôwa dia Mukalenga;
6 Ne neakudimuna mutshima wa batatu kudi bana, ne mutshima wa bana kudi batatuabu, bua tshilu kulua ne kutûta buloba ne mutshipu.