1 Ne biakalua ne ki muakapita kabidi tshidimu tshia makumi tshitema ne tshitanu nanku, ne bantu bakabanga kupua moyo bimanyinu ne malu a dikema bivuabu bumvua, ne bakabanga kuikala ku kakesa ku kakesa kabayi bakema bua tshimanyinu anyi bualu bua dikema bidi bifumina mu diûlu to, mua ne bakabanga kupapa mu mitshima yabu, ne kufofoma mu meji abu, ne bakabanga kubenga kuitabuija bionsu bivuabu bumvua ne bamona—

2 Bakela amua meji a tshianana mu mitshima yabu, ne bantu bakapetela bimanyinu ne malu a kukema ku bukola bua diabulu, bua kupambuisha ne kudinga mitshima ya bantu; ne ki muakakuata kabidi Satana mitshima ya bantu nanku, mua ne wakafofomija mesu abu ne wakabapambula bua bitabuija ne dilongesha dia Kilisto divua tshintu tshipota ne tshia tshianana.

3 Ne biakalua ne bantu bakabanga kukolakana mu bubi ne mu malu mapita bubi; ne kabakitabuija ne bimanyinu anyi malu a dikema bivua kabidi mua kufidibua to; ne Satana uvua wendakana, mu kupambuisha mitshima ya bantu, mu kubatêta ne kubenzeja ne benza bubi bua bungi mu bulaba.

4 Ne ki muakapita tshidimu tshia makumi tshitema ne tshisambombo nanku; ne tshia makumi tshitema ne tshia muanda muteketa kabidi; ne tshia makumi tshitema ne tshia muanda mukulu kabidi; ne tshia makumi tshitema ne tshia tshitema kabidi;

5 Ne kabidi bidimu lukama bivua bipita katshia ku matuku a Mosiya, uvua muikala mfumu ku mutu kua bantu Bena Nefi.

6 Ne bidimu nkama isambombo ne tshitema bivua bipita katshia Lehi umbuka ku Yelushalema.

7 Ne bidimu tshitema bivua bipita katshia ku tshikondu tshivua tshimanyinu tshifidibua, tshivua bambi bamba ne, Kilisto nealua pa buloba.

8 Mpindiewu Bena Nefi bakabanga kubala diba diabu katshia ku tshikondu etshi tshivua tshimanyinu tshifidibua, anyi katshia ku dilua dia Kilisto; bua nanku, bidimu tshitema bivua bipita.

9 Ne Nefi, uvua muikala tatuenda wa Nefi, uvua ne bujitu bua miandiku, kakapingana ku bulaba bua Zalahemela to, ne kabakamusangana muaba nansha umua to mu bulaba bonsu.

10 Ne biakalua ne bantu batshiakashala mu bubi, nansha muvuaku mayisha bungi ne mambi a bungi avua Nzambi mutuma munkatshi muabu; ne ki muakapita kabidi tshidimu tshia dikumi; ne tshidimu tshia dikumi ne tshimua tshiakapita kabidi mu malu mabi.

11 Ne biakalua ne mu tshidimu tshia dikumi ne tshisatu kuakabanga kuikala mvita ne makokangana mu bulaba bonsu; bualu banyengi ba Gadiantona bakavua balua bapita bungi, ne bakashipa bantu bipita bungi, ne bakabutula bimenga bia bungi, ne bakatangalaja lufu lupita bungi ne dishipangana mu bulaba bonsu, bua ne biakakengedibua ne bantu bonsu, Bena Nefi ne Bena Lamana bambula biluilu bia mvita bua kubaluisha.

12 Bua nanku, Bena Lamana bonsu bavua bakudimuna moyo kudi Mukalenga bakadisanga kudi bana babu, Bena Nefi, ne bakabenzeja bua kuambula biluilu bia mvita bua kuluisha banyengi ba Gadiantona abu, bua bukubi bua mioyo yabu ne bua bakaji babu ne bua bana babu, eyowa, ne bua kukuba kabidi manema abu, ne diakalengela dia ekelezia wabu ne ditendelela diabu, ne budikadila buabu ne budishikaminyi buabu.

13 Ne biakalua ne kumpala kua tshidimu tshia dikumi ne tshisatu etshi kupitatshi, Bena Nefi bakakanyinyibua ku dibutuka dijima bua bualu bua mvita eyi, ivua milua mikola menamena.

14 Ne biakalua ne Bena Lamana bavua badisanga ne Bena Nefi abu bakabala munkatshi mua Bena Nefi;

15 Ne mutshipu wabu wakumbushibua kudibu, ne dikoba diabu diakalua ditoka bu dia Bena Nefi;

16 Ne bansongaluma babu ne bana babu ba bakaji bakalua balenga menamena, ne bakabala munkatshi mua Bena Nefi, ne bakababikila ne Bena Nefi. Ne ki muakajika tshidimu tshia dikumi ne tshisatu nanku.

17 Ne biakalua ne ku ntuadijilu kua tshidimu tshia dikumi ne tshinayi, mvita ya pankatshi pa banyengi ne bantu ba Nefi yakatungunuka ne yakalua mikola menamena; nansha nanku, bantu ba Nefi bakatamba banyengi bukola kakesa, mua ne bakabapingaja panyima ku malaba abu mu mikuna ne ne mu miaba yabu ya mu musokoku.

18 Ne nanku ki muakajika tshidimu tshia dikumi ne tshinayi. Ne mu tshidimu tshia dikumi ne tshitanu bakalua kuluisha bantu ba Nefi; ne bua bubi bua bantu ba Nefi, ne bua makokangana ne matapuluka abu a bungi, banyengi ba Gadiantona bakabatamba bukola bua bungi.

19 Ne nanku ki muakajika tshidimu tshia dikumi ne tshitanu, ne nanku ki muvua bantu mu ngikadilu wa ntatu ya bungi; ne muela wa mvita wa dibutula uvua mubalembelela pa mutu pabu, mua ne uvua pabuipi ne kubakuluisha panshi, ne ebi bua malu mabi abu.