1 Ne mpindiewu monayi, biakalua ne bantu bonsu ba mu bulaba bakumvua mêyi â, ne bakajadika buatshi. Ne kunyima kua mêyi â kuvua bupudikila mu bulaba bua mutantshi wa meba a bungi;

2 Bantu bakalekela didilakana ne diela mikunda bua dijimija dia malela abu avuabu bashipa bualu tshikemu tshivua tshipita bunena; bua nanku kakuvua mutoyi mu bulaba bonsu to bua mutantshi wa meba a bungi.

3 Ne biakalua ne dîyi diakalua kabidi kudi bantu, ne bantu bonsu bakadiumvua ne bakajadika buadi, diamba ne:

4 Ô nuenu bantu ba mu bimenga ebi binena bidi bipona, badi bikala tunkanunuina tua Yakoba, eyowa, badi bikala ba mu nzubu wa Isalele, bu mudiyi ya bungi misangu imvua munusangisha bu mudi nzolu wa tshikuka usangisha bana benda muinshi mua mapuapua enda, ne mumvua munudisha.

5 Ne kabidi, bu mudiyi ya bungi misangu imvua mua kunusangisha bu mudi nzolu wa tshikuka usangisha bana benda muinshi mua mapuapua enda, eyowa, Ô nuenu bantu ba mu nzubu wa Isalele, badi bapona; Ô nuenu bantu ba mu nzubu wa Isalele, nuenu badi basomba mu Yelushalema, ne nuenu badi bapona, eyowa, bu mudiyi ya bungi misangu imvua mua kunusangisha bu mudi nzolu wa tshikuka usangisha bana benda muinshi mua mapuapua enda, kadi nuakabenga.

6 Ô nuenu nzubu wa Isalele undi muepelesha, bu mudiyi ya bungi misangu inganusangisha bu mudi nzolu wa tshikuka usangisha bana benda muinshi mua mapuapua enda, panuikala bakudimuna mutshima ne bapingana kundi ne mutshima mujima.

7 Tshianana, Ô nzubu wa Isalele, miaba inudi basomba neilua mitupu tô ne diba dia dikumbajibua dia tshipungidi tshindi muenza ne batatuenu.

8 Ne mpindiewu biakalua ne kunyima kua bantu bumvua mêyi â, monayi, bakabanga kudila ne kuela mikunda kabidi bua dijimija dia malela ne balunda babu.

9 Ne biakalua ne ki muakapita matuku asatu nanku. Ne bivua mu dinda, ne mîdima yakajika pa mpala wa bulaba, ne buloba bua kalekela kuzakala, ne mabua a kalekela kupandika, ne mikemu ivua mikuatshisha bôwa yakajika, ne mitoyi ya diyoyi yakajika.

10 Ne buloba bua kalamatangana pamua kabidi, mu mushindu wa ne buakashala bukola; ne madilu, ne muadi, ne didilakana dia bantu bavua bepeleshibua ne moyo biakajika; ne madilu abu akakudimuka disanka, ne didilakana diabu diakalua disamuna ne disakidila dia Mukalenga Yezu Kilisto, Musungidi wabu.

11 Ne tô ne diba adi, mifundu ya Nzambi ivua bambi bakula ivua mikumbajibua.

12 Ne tshitupa tshia bantu tshivua tshipita buakana ki tshivua tshipandishibua, ne ki bobu bavua bakidila bambi ne bavua kabayi babâsa mabua to; ne bobu ki bavua kabayi bamatshisha mashi a bansantu to, bavua bepeleshibua—

13 Ne bavua bepeleshibua ne kabavua bidîna ne bajîkibua mu buloba to; ne kabavua bafua mu ndondu ya mbuwa to; ne kabavua bôshika ku kapia to, anyi kakuvua tshintu tshikuluka pa mutu pabu ne tshibazâza ku lufu to; ne kabavua bambula kudi mvunda to; anyi kabavua batambibua bukola kudi dibungibungi dia muishi ne dia mîdima to.

14 Ne mpindiewu, ewu yonsu udi ubala, umvua; ewu udi ne mifundu, ayikebulula, ne atangila ne amona ne lufu ne dibutuka ebi bionsu bia ku kapia, ne ku muishi, ne ku bipepela, ne ku mvunda, ne ku diunzuluka dia buloba bua kubadinyisha, ne bintu bionsu ebi ne kabiena dikumbajibua dia mambi a bambi bansantu ba bungi to anyi.

15 Monayi, ndi nnuambila ne, Eyowa, ba bungi bavua bajadika bua bintu ebi pa dilua dia Kilisto, ne bavua bashipibua bualu bakajadika bua bintu ebi.

16 Eyowa, muambi Zenose uvua mujadika bua bintu ebi, ne Zenoke kabidi uvua muakula bitangila bintu ebi, bualu bakajadika nangananga bitutangila, tuetu badi bikala tshishadi tshia ndelanganyi yabu.

17 Monayi, tatuetu Yakoba uvua kabidi mujadika bitangila tshishadi tshia ndelanganyi ya Yosefe. Ne monayi, katuena tshishadi tshia ndelanganyi ya Yosefe anyi? Ne bintu ebi bidi bijadika buetu kabiena bifunda pa bitata bia tshiamua tshia kalabi biakalua nabi tatuetu Lehi ku Yelushalema anyi?

18 Ne biakalua ne ku ndekelu kua tshidimu tshia makumi asatu ne tshinayi, monayi, nennuleja ne bantu ba Nefi bavua bepeleshibua, ne kabidi bavuabu babikila ne Bena Lamana, bavua bikala bepeleshibua abu, bakalejibua masanka manena, ne mabenesha manena mapumuinyibua pa mitu yabu, mua ne katataka kunyima kua dibanda dia Kilisto mu diûlu wakadileja bulelela kudibu—

19 Ubaleja mubidi wenda, ne ubalongesha; ne nendonda mulubu wa disadila dienda kunyima. Bua nanku bua mpindiewu ngajikiji miaku yanyi.