1 Mpindiewu biakalua ne tshidimu tshia makumi tshitema ne tshimua tshiakapita ne kukavu bidimu nkama isambombo katshia ku tshikondu tshiakumbuka Lehi ku Yelushalema; ne tshivua tshidimu tshivua Lakoneuse muikala mulumbuluishi munena ne ngovena mu bulaba.

2 Ne Nefi, muana wa Helamana, wakumbuka ku bulaba bua Zalahemela, ne uvua mupesha muanenda wa baluma Nefi, uvua muikala muana wa kumpala wenda wa baluma, bujitu bua bitata bia kalabi, ne miandiku yonsu ivua milamibua, ne bintu bionsu bivua bilamibua ne tshijila katshia ku diumbuka dia Lehi ku Yelushalema.

3 Pashisha wakumbuka ku bulaba, ne muntu kena mumanya kua kuakayaye to; ne muanenda Nefi wakalama miandiku pa muaba wenda, eyowa, miandiku ya bantu aba.

4 Ne biakalua ne ku ntuadijilu kua tshidimu tshia makumi tshitema ne tshibidi, monayi, mambi a bambi akabanga kukumbajibua bikola bipita kabidi; bualu kuakabanga kuenzeka bimanyinu binena ne bishima binena munkatshi mua bantu.

5 Kadi kuvua bamua bantu bakabanga kuamba ne diba dikavua dipita bua miaku ivua Samuele, Muena Lamana, kukumbajibuaye.

6 Ne bakabanga kusanka baseka bana babu, bamba ne: Monayi dikadi dipita, ne miaku ya Samuele kayena mikumbajibua to; bua nanku, disanka dienu ne ditabuija dienu bitangila bualu ebu bivua bia tshianana.

7 Ne biakalua ne bakenza diyoyo dikola mu bulaba bonsu; ne bantu bakitabuija bakabanga kunyingalala bikola, ne mu mushindu mukuabu malu â avua mamba ka’alu kufika.

8 Kadi monayi, bakindila ne disuminyina dituku adi, ne butuku abu, ne dituku adi bikala bu dituku dimua bikala bu ne kakuvua butuku to, bua bamanya ne ditabuija diabu kadivua tshianana to.

9 Mpindiewu biakalua ne kuvua dituku ditekibua ku luseka kudi bavua kabayi bitabuija to, bua ne bonsu bavua bitabuija ngikadilu ayi nebashipibua pa kumbusha tshimanyinu tshilua, tshivua tshipeshibua kudi muambi Samuele.

10 Mpindiewu biakalua ne pakamona Nefi, muana wa baluma wa Nefi, bubi bua bantu benda ebu, mutshima wenda wakanyingalala menamena.

11 Ne biakalua ne wakaya ne wakinama pa buloba, ne wakabila ne bukitu kudi Nzambi wenda mu dîna dia bantu benda, eyowa, bavua pabuipi ne kushipibua bua ditabuija diabu dia ngikadilu wa batatuabu abu.

12 Ne biakalua ne wakabila ne bukitu kudi Mukalenga dituku adi dijima; ne monayi, dîyi dia Mukalenga diakalua kudiye, diamba ne:

13 Ambulula mutu weba ne sangala; bualu mona, tshikondu tshidi pabuipi, ne butuku ebu tshimanyinu netshipeshibua, ne malaba ndi ndua pa buloba, bua kuleja ba pa buloba ne nenkumbaja bionsu bimvua muakuishisha ku mukana mua bambi banyi bansantu.

14 Monayi, ndi ndua kudi banyi nkayanyi, bua kukumbaja bintu bionsu bimvua mumanyisha kudi bana ba bantu kumbukila ku tshishimikidi tshia buloba, ne bua kuenza disua, bubidi buadi dia Tatu ne dia Muana—dia Tatu bua bualu buanyi, ne dia Muana bua bualu bua musunyi wanyi. Ne monayi, tshikondu tshidi pabuipi, ne butuku ebu tshimanyinu netshipeshibua.

15 Ne biakalua ne mêyi akalua kudi Nefi akakumbajibua, bilondeshila bu muvuawu mamba; bualu monayi, ku dibuela dia diba kakuvua mîdima to; ne bantu bakabanga kukema bualu kakuvua mîdima pakila butuku to.

16 Ne kuvua ba bungi, bavua kabayi bitabuija miaku ya bambi to, bakapona pa buloba ne bakalua bu ne bavua bafua, bualu bua bakamanya ne dilongolola dinena dia dibutula divuabu bateka bua bavua bitabuija miaku ya bambi divua dinyanguka; bualu tshimanyinu tshivua tshipeshibua tshikavu pabuipi.

17 Ne bakabanga kumanya ne Muana wa Nzambi uvua ne tshia kumueneka katataka; eyowa, mu tshikosu, bantu bonsu ba pa mpala wa buloba bujima kubangila ku wesete tô ne ku esete, mu bulaba bua ku node ne mu bulaba bua ku sude, bakakema menamena bua ne bakapona pa buloba.

18 Bualu bavua bamanya ne bambi bavua bajadika bua bintu ebi bidimu bia bungi, ne tshimanyinu tshivua tshifidibua tshikavu pabuipi; ne bakabanga kutshina bua malu mabi abu ne dipanga ditabuija diabu.

19 Ne biakalua ne kakuvua mîdima butuku abu bonsu to, kadi kuvua bukenka bu mudi diba dia mujalamu. Ne biakalua ne diba diakapatuka mu dinda kabidi, bilondeshila ku mushindu wadi; ne bakamanya ne divua dituku dialedibua Mukalenga, bua tshimanyinu tshivua tshifidibua.

20 Ne biakalua ne, eyowa, malu onsu, kaleta konsu, bilondeshila ku miaku ya bambi.

21 Ne biakalua kabidi ne mutotu mupia-mupia wakamueneka, bilondeshila ku muaku.

22 Ne biakalua ne katshia ku tshikondu etshi kuakabanga kuikala mafi matuma munkatshi mua bantu, kudi Satana, bua kupapisha mitshima yabu, bua kipatshila ka ne kabitabuiji bimanyinu ne malu a dikema bivuabu bamona abi to; kadi nansha muvuaku mafi ne didinga ebi tshitupa tshinena tshia bantu tshiakitabuija, ne bakakakudimuna moyo kudi Mukalenga.

23 Ne biakalua ne Nefi ne bakuabu kabidi ba bungi bakaya munkatshi mua bantu, batambuisha bua dikudimuna dia mutshima, muvua muikala ne dilekedibua dinena dia mibi. Ne ki muakabanga bantu kupeta kabidi ditalala mu bulaba nanku.

24 Ne kakuvua makokangana to, amu pa kumbusha bantu bakesa bakabanga kuyisha, bakeba bua kujadika ne mifundu ya Nzambi ne kabitshivua bikengedibua kabidi bua kulama mikenji ya Mose to. Mpindiewu bakenza bakapambuka mu bualu ebu, bua kabavua bumvua mifundu ya Nzambi to.

25 Kadi biakalua ne bakakudimuna moyo katataka, ne bakitabujijibua bitangila ditupakana divuabu nadi, bualu biakamanyishibua kudibu ne mikenji kayivua mianji kukumbajibua to, ne idi ne bua kukumbajibua ku katupa konsu; eyowa, dîyi diakalua kudibu ne idi ne bua kukumbajibua; eyowa, ne nansha kaleta anyi katoba kamua kabiakujimina to, tô ne pakumbajibuayi yonsu; bua nanku mu tshidimu tshia momumua etshi bakafika ku dimanya dia ditupakana diabu ne bakatonda bilema biabu.

26 Ne ki muakapita tshidimu tshia makumi tshitema ne tshibidi nanku, tshituadila bantu mukenji mulenga bua bimanyinu biakenzeka, bilondeshila ku miaku ya buambi ya bambi bonsu bansantu.

27 Ne biakalua ne tshidimu tshia makumi tshitema ne tshisatu tshiakapita kabidi mu ditalala, amu pa kumbusha kabiyi bua banyengi ba Gadiantona, bavua basomba mu mikuna, bavua buwula mu bulaba; bualu bua miaba yabu mikolesha ne miaba yabu ya musokoku ivua mikala mikola bikola bua ne bantu kabavua mua kubatamba bukola to; ki bua bualu kayi bakashipa bantu ba bungi, ne bakatapa bikola munkatshi mua bantu.

28 Ne biakalua ne mu tshidimu tshia makumi tshitema ne tshinayi bakabanga kuvula mu tshipimu tshinena, bualu kuvua batapuluki ba bungi ba Bena Nefi bakanyemena kudibu, tshiakapesha Bena Nefi bakashala mu bulaba kanyinganyinga ka bungi.

29 Ne kuvua kabidi tshiena bualu tshiakenzeja kanyinganyinga ka bungi munkatshi mua Bena Lamana; bualu monayi, bavua ne bana ba bungi bakakola ne bakabanga kubandila mu bidimu, bua ne bakavua badiangatshila bujitu buabu nkayabu, ne bakapambuishibua kudi bamua bavua Bena Zolama, ku mafi abu ne ku lubombu luabu, bua kudisangishabu kudi banyengi ba Gadiantona.

30 Ne nanku ki muakatatshishibua Bena Lamana pabu, ne bakabanga kukepela mu ditabuija ne buakana buabu, bua bubi bua lukongu lua bantu luvua lulua.