1 Ne mpindiewu biakalua ne mu tshidimu tshia dikumi ne tshisambombo kumbukila ku dilua dia Kilisto, Lakoneuse, ngovena wa mu bulaba, wakapeta mukanda mufumina kudi mulombodi ne ngovena wa tshisumbu etshi tshia banyengi; ne eyi ki miaku ivuayi mufunda:

2 Lakoneuse, mutamba bunena ne ngovena munena wa mu bulaba, mona, ndi nkufundila mukanda ewu, ne ndi nkusamuna bikola menamena bua dikamakana dieba, ne kabidi bua dikamakana dia bantu beba, bitangila dikuba dia binudi nutshinka ne bidi bikala bunema ne budishikaminyi buenu; eyowa, nudi nukankamana bimpa, bu ne kudi tshianza tshia umua nzambi kampanda tshidi tshinukuatshisha, bua disungidila dia budishikaminyi buenu, ne dia bintu bienu, ne dia ditunga dienu, anyi dia binudi nubikila nanku.

3 Ne bidi bimueneka bibi kundi, mutamba bunena Lakoneuse, bua wewa kuikala mupota ne muditambishi nanku awu bua kutshinka ne nudi mua kukandamena bantu ba dikima ba bungi nanku badi ku bulombodi buanyi, badi mpindiewu bimana ne biluilu biabu bia mvita, ne badi bindila ne mutshima muipi dîyi dia ne: Puekelayi Bena Nefi ne babutulayi.

4 Ne mema, bualu ndi mumanya dikima diabu didi kadiyi bua kutshimunyibua to, bualu nkadi mubatêta mu mutumba wa mvita, ne ndi mumanya lukinu luabu lua kashidi kunudi bua malu mabi a bungi anuvua babenzela, bua nanku pikalabu bua kunupuekela, nebanukumbula ne dibutuka dijima.

5 Bua nanku ngafundi mukanda ewu, mu kutua tshiala ne tshianza tshianyi nkayanyi, ngela meji bua diakalengela dienu, bua bualu bua dikamakana dienu mu tshinudi nuitabuija ne tshidi tshikala tshiakana atshi, ne nyuma yenu minena mu mpata ya mvita.

6 Bua nanku ndi nkufundila, bualu ndi njinga ne nufila bimenga bienu, ne malaba enu, ne bintu bienu kudi bantu banyi aba, pamutu pa bobu kunukumbula ne muela wa mvita ne dibutuka kunufikila.

7 Anyi mu miaku mikuabu, difilayi kutudi, ne disangayi kutudi ne numanya midimu yetu ya mu musokoku, nulua bana betu bua nuikala bu mutudi—kanuyi bapika betu to, kadi bana betu ne tuabanyinangana nuenu bintu bietu bionsu.

8 Ne mona, ndi nditshipa kûdi ne mutshipu ne, panuikala kanuyi benza nanku kanuakubutuka to; kadi panuikala kanuyi benza nanku to, ndi nditshipa kûdi ne mutshipu ne ngondu udi ulonda nengela mukenji bua misumba yanyi ya basalayi ipueka bua kunuluisha, ne kalaminyina bianza biabu to ne kabakunuepelesha to, kadi ne binushipa, ne nebalekela muela wa mvita upona pa mitu yenu tô ne panuabutuka.

9 Ne mona, ndi Gidiani; ne ndi ngovena wa tshisumbu tshia mu musokoku tshia Gadiantona etshi; tshisumbu ne midimu bindi mumanya ne bidi bimpa; ne mbiaku kala ne bivua bitushila.

10 Ne ndi nkufundila mukanda ewu, Lakoneuse, ne ndi ntekemena ne nenufila malaba ne bintu bienu, kakuyi dimatshisha dia mashi to, bua bantu banyi aba, bavua batapuluka kunudi bua bubi buenu bua munua kabanyenga manema abu ne bukalenga buabu, bapetulula manema abu a bukalenga, ne amu nuenu benza nanku, nensombuela malu mabi anuvua babenzela. Ndi Gidiani.

11 Ne mpindiewu biakalua ne pakapeta Lakoneuse mukanda ewu wakakema menamena bua dikima divua Gidiani ulomba nadi bua kuangata bulaba bua Bena Nefi, ne kabidi bua dikanyina dia bantu bua kusombuela bantu bavua kabayi benzela bualu bubi nansha bumua to, amu pa kumbusha ne bavua badienzela bibi bobu nkayabu ku ditapuluka bua kudisangisha kudi bantu babi ne banyengi bena bubi ne ba malu mapita bubi abu.

12 Mpindiewu monayi, Lakoneuse ewu, ngovena, uvua muntu mululama, ne kavua bua kumvua bôwa bua milombu ne dikanyina dia munyenganganyi wa bintu to; bua nanku kakumvuila mukanda wa Gidiani, ngovena wa banyengi to, kadi wakenzeja ne bantu benda babila kudi Mukalenga bua bukola bua kudilongolola bua tshikondu tshiabapuekela banyengi.

13 Eyowa, wakatuma dimanyisha munkatshi mua bantu bonsu, ne basangisha pamua bakaji babu ne bana babu, bisumbu bia bimuna bikesa ne binena biabu, ne bintu biabu bionsu, amu pa kumbusha bulaba buabu, pa muaba umua.

14 Ne wakenzeja ne bibaka miaba mikolesha ku mpenga yabu yonsu, ne mujobu wabu wikala mukola menamena. Ne wakenzeja ne bateka misumba ya basalayi, ya Bena Nefi ne ya Bena Lamana, anyi ya bonsu bavuabu babala munkatshi mua Bena Nefi, bu mudi balami ku mpenga yonsu bua kubalama, ne bua ku bakuba kudi banyengi butuku ne munya.

15 Eyowa, wakabambila ne: Bu mudi Mukalenga ne moyo, pa kumbusha nuenu bakudimuna mutshima ku malu mabi enu onsu, ne babila kudi Mukalenga, kanuakupatuishibua mu bianza bia banyengi ba Gadiantona abu to nansha bishi.

16 Ne miaku ne mambi a Lakoneuse ivua minena ne ya dikema bua ne biakapesha bantu bonsu bôwa; ne bakadienzeja ku bukola buabu bua kuenza bilondeshila ku miaku ya Lakoneuse.

17 Ne biakalua ne Lakoneuse wakasungula tupita tunena ku mutu kua misumba yonsu ya basalayi ya Bena Nefi, bua kubalombola diba diapatuka banyengi mu tshipela bua kubaluisha.

18 Mpindiewu kapita kanena kupita munkatshi mua tupita tunena ne komanda munena wa misumba ya basalayi ya Bena Nefi wakasungudibua, ne dîna diaku divua dikala Gidigidoni.

19 Mpindiewu tshivua tshibidilu munkatshi mua Bena Nefi tshia kusungula tupita tuabu tunena, (amu pa kumbusha mu tshikondu tshiabu tshia bubi) muntu uvua ne nyuma wa dibuluila ne wa buambi kabidi; bua nanku, Gidigidoni ewu uvua muambi munena munkatshi muabu, bu muvuaye kabidi mulumbuluishi munena.

20 Mpindiewu bantu bakambila Gidigidoni ne: Sambila kudi Mukalenga, ne tubandayi pa mikuna ne mu tshipela, bua tubunda banyengi ne kubabutula mu malaba abu nkayabu.

21 Kadi Gidigidoni wakabambila: Mukalenga mmukandika; bualu tuetu babanda bua kubaluisha Mukalenga neatufila mu bianza biabu; bua nanku netudilongolola munkatshi-nkatshi mua malaba etu, ne netusangisha misumba yetu ya basalayi yonsu pamua, ne katuakuya kubaluisha to, kadi netuindila tô ne paluabu kutuluisha; bua nanku bu mudi Mukalenga ne moyo, tuetu benza nanku neabafila mu bianza bietu.

22 Ne biakalua ne mu tshidimu tshia dikumi ne tshia muanda muteketa, ku nshikidilu kua tshidimu, dimanyisha dia Lakoneuse diakaya pa mpala onsu wa bulaba, ne bakangata tubalu tuabu, ne makalu abu a mvita, ne ngomba yabu, ne bisumbu bia bimuna bikesa biabu bionsu, ne bia bimuna binena biabu, ne nteta yabu, ne bintu biabu bionsu, ne bakâsa luendu mu bisumbu bia binunu ne bia makumi a binunu, tô ne pakayabu bonsu ku muaba uvua musungula bua badisangisha pamua, bua kudisungidilabu kudi bena lukuna babu.

23 Ne bulaba buvua busungula buvua bulaba bua Zalahemela, ne buloba buvua buikala pankatshi pa bulaba bua Zalahemela ne bulaba bua Buvula, eyowa, tô ne ku mushonyi uvua pankatshi pa bulaba bua Buvula ne bulaba bua Kabutu.

24 Ne kuvua binunu bia bantu bipita bungi bivua bibikidibua ne Bena Nefi, biakadisangisha pamua mu bulaba ebu. Mpindiewu Lakoneuse wakenzeja ne badisangisha pamua mu buloba bua ku sude, bua mutshipu mukola uvua pa mutu pa bulaba bua ku node.

25 Ne bakadikolesha bua kuluisha bena lukuna babu; ne bakasomba mu bulaba bumua, ne mu tshisumbu tshimua, ne batshina mêyi avua Lakoneuse muakula, mua ne bakakudimuna mutshima ku mibi yabu yonsu; ne bakela masambila abu kudi Mukalenga Nzambi wabu, ne abapatuisha diba diapatuka bena lukuna babu bua kubaluisha mvita.

26 Ne bavua ne kanyinganyinga menamena bua bena lukuna babu. Ne Gidigidoni wakenzeja ne benza biluilu bia mvita bia mushindu onsu, ne bikala ne makanda ne biluilu, ne ne ngabu, ne ne ngabu ya pa maboku, ku mushindu uvuaye mubambila.