1 Ne biakalua ne ku nshikidilu kua tshidimu tshia dikumi ne tshia muanda mukulu misumba ya basalayi ya banyengi ayi ivua midilongolola bua mvita, yakabanga kupueka ne kulopoka mu tukuna, ne mu mikuna, ne mu tshipela, ne mu miaba yabu mikolesha ne mu miaba yabu ya musokoku, ne bakabanga kuangata malaba, avua mu bulaba bua ku sude ne avua mu bulaba bua ku node, ne bakabanga kuangata malaba onsu avua Bena Nefi bashiya, ne bimenga bivuabu bashiya bitupu.

2 Kadi monayi, kakuvua nyama ya mu tshisuku anyi nyama ya dîtu mu malaba awu avua Bena Nefi balekela to, ne kakuvua nyama ya dîtu bua banyengi to amu pa kumbusha mu tshipela.

3 Ne banyengi bavua mua kuikala amu mu tshipela, bua dipanga dia biakudia; bualu Bena Nefi bavua bashiya malaba abu matupu, ne bavua basangisha bisumbu bia bimuna bikesa ne binena biabu ne bintu biabu bionsu, ne bavua mu tshisumbu tshimua.

4 Bua nanku, kakuvua mushindu nansha umua bua banyengi kupawula ne kupeta biakudia to, amu pa kumbusha bua kulua kuluisha Bena Nefi mvita patoka; ne Bena Nefi bavua mu tshisumbu tshimua, ne bualu bavua bikala bungi bupita, ne bavua badilamina biakudia, ne tubalu ne ngomba, ne bisumbu bia bimuna bia mushindu onsu, bua kudidishabu bua mutantshi wa bidimu muanda muteketa, muvuabu batekemena bua kubutula banyengi pa mpala wa bulaba; ne ki muakapita tshidimu tshia dikumi ne tshia muanda mukulu nanku.

5 Ne biakalua ne mu tshidimu tshia dikumi ne tshia tshitema Gidiani wakamona ne bivua bikengedibua bua aya kuluisha Bena Nefi mvita, bualu kakuvua mushindu nansha umua wa bobu kudidisha to amu pa kumbusha bua kupawula ne kunyengangana bintu ne kushipa bantu.

6 Ne kabakakima kutangalaka pa mpala wa bulaba mua ne bakuna nteta to, bua Bena Nefi kabalu kubabunda ne kubashipa to; bua nanku Gidiani wakapesha misumba yenda ya basalayi mukenji ne mu tshidimu etshi iya kuluisha Bena Nefi mvita.

7 Ne biakalua ne bakaya kuluangana mvita, ne bivua mu ngondu muisambombo; ne monayi, dituku diakayabu kuluangana mvita divua dinena ne ditshinyisha; ne bavua bavuala mushindu wa banyengi; ne bavua ne tshiseba tshia muana mukoku tshijingila ku bimonu biabu, ne bavua bakunjijibua mu mashi, ne mitu yabu ivua mikungula, ne bavua bavuala bifulu bia mvita; ne dimueneka dia misumba ya basalayi ya Gidiani divua dimueneka dinena ne ditshinyisha, bua biluilu biabu, ne bua bavua bakunjijibua mu mashi.

8 Ne biakalua ne misumba ya basalayi ya Bena Nefi, pakamonaye muvua musumba wa basalayi wa Gidiani umueneka, yakapona yonsu panshi, ne bakela mbila yabu kudi Mukalenga Nzambi wayi, ne abepelesha ne abapatuisha mu bianza bia bena lukuna babu.

9 Ne biakalua ne pakamona misumba ya basalayi ya Gidiani nanku yakabanga kuela mbila ne dîyi dikola, bua disanka diayi, bualu bavua batshinka ne Bena Nefi bavua bapona bua bua bôwa bua luzakalu lukola divua misumba yabu ya basalayi mituala.

10 Kadi mu bualu ebu bakateketa maboku, bualu Bena Nefi kabavua bayitshina to, kadi bavua batshina Nzambi wabu ne bavua bamutendekena bua bukubi; bua nanku, pakalua misumba ya basalayi ya Gidiani lubilu kudibu bavua badilongolola bua kutuilangana nabu; eyowa, bakabakidila ne makanda a Mukalenga.

11 Ne mvita yakatuadija mu ngondu muisambombo ewu; ne mvita yabu ivua minena ne itshinyisha, eyowa, ne dishibeyengana diabu divua dikola ne ya ditshingisha, mua ne kakuvua kuanji kuikala dishibeyangana dikola nanku to munkatshi mua bantu bonsu ba Lehi katshia umbuka ku Yelushalema.

12 Ne nansha dikanyina divua Gidiani mufuna ne mitshipu ivuayi muela, monayi, Bena Nefi bakabatamba mua ne bakapingana kunyima kumpala kuabu.

13 Ne biakalua ne Gidigidoni wakafila mukenji ne misumba yenda ya basalayi ibalondakaja tô ne ku mikalu ya tshipela, ne kabepeleshi muntu nansha umua wapona mu bianza biabu mu njila to; ne ki muakabalondakajabu ne muakabashipabu nanku, ku mikalu ya tshipela, mena tô ne muvuabu bakumbaja mukenji wa Gidigidoni.

14 Ne biakalua ne bakalondakaja Gidiani, uvua muimana ne muluangana ne dikima, pavuaye unyema; ne bakamukuata ne bakamushipa bualu uvua mupungila bua diluangana dienda dia bungi. Ne ki muvua ndekelu wa Gidiani munyenganganyi wa bintu nanku.

15 Ne biakalua ne misumba ya basalayi ya Bena Nefi yakapingana ku muaba wayi wa bukubi. Ne biakalua ne tshidimu etshi tshia dikumi ne tshitema tshiakapita, ne banyengi kabakalua kabidi kuluangana mvita to; ne kabakalua kabidi mu tshidimu tshia makumi abidi to.

16 Ne mu tshidimu tshia makumi abidi ne tshimua kabakalua bua kuluangana mvita to, kadi bakaluila ku nseka yonsu bua kunyungulula bantu ba Nefi ku mpenga yonsu; bualu bakatshinka ne biakosabu bantu ba Nefi ku malaba abu, ne biabajingilabu ku nseka yonsu, ne biabakosabu ku bintu biabu bionsu bivua bifumina pambelu, bavua mua kubenzeja bua kudifilabu bilondeshila majinga abu.

17 Mpindiewu bavua badisunguila mulombodi mukuabu, muena dîna dia Zemenaliha; bua nanku tshivua Zemenaliha wakenzeja bua disombela edi difika.

18 Kadi monayi, ebu buvua bualu buimpa bua Bena Nefi; bualu kabivua bikumbana bua banyengi kusomba mutantshi mula bua kuikala ne tshipeta kampanda pa mutu pa Bena Nefi, bua bualu bua biakudia biabu bia bungi bivuabu balama mu tshibutshilu,

19 Ne bua bualu bua bukepela bua biakudia munkatshi mua banyengi; bualu monayi, kabavua ne tshintu to amu pa kumbusha munyinyi bua kudia kuabu, munyinyi wakapetabu mu tshipela;

20 Ne biakalua ne nyama ya dîtu yakakepela mu tshipela mua ne banyengi bakavua pabuipi ne kufua ne nzala.

21 Ne Bena Nefi bavua batungunuka kuya mu munya ne butuku, ne bavua babunda misumba yabu ya basalayi, ne bavua babashipa ku binunu ne ku makumi a binunu.

22 Ne nanku bantu ba Zemenaliha bakajinga bua kulekela dijinga, bua lufu lunena luvua lubaluila mu munya ne butuku.

23 Ne biakalua ne Zemenaliha wakapesha bantu benda mukenji bua badiumbusha mu disombela, ne baya mu bitupa bia kula bia mu bulaba bua ku node.

24 Ne mpindiewu, Gidigidoni bualu uvua mumanya dijinga diabu, ne bualu uvua mumanya buteketa buabu bua dipanga dia biakudia, ne bua dishipeyangana dikola divua dienzeka munkatshi muabu, bua nanku wakatuma misumba yenda ya basalayi mundankulu, ne wakabakosa njila wa ku muaba wabu wa kunyemena, ne wakateka misumba yenda ya basalayi mu njila wabu wa kunyemena.

25 Ne bakenza nanku mundankulu, ne bakaya mu luendu luabu kupita muaba uvua banyengi bikala, bua ne pakatshiabu, pakabanga banyengi luendu luabu, bakatuilangana ne misumba ya basalayi ya Bena Nefi kumpala kuabu ne kunyima kuabu.

26 Ne banyengi bavua bikala ku sude bavua pabu bakoshibua mu miaba yabu ya kunyemena. Ne bintu bionsu ebi biakenzeka ku bulombodi bua Gidigidoni.

27 Ne kuvua banyengi binunu bia bungi bakadifila bu mudi bena lukanu kudi Bena Nefi, ne bakashipa tshishadi tshiabu.

28 Ne bakakuata mulombodi wabu, Zemenaliha, ne bakamowa ku mutshi, eyowa, ku katongobela kawu tô ne muakafuaye. Ne pakamowabu tô ne pakafuaye bakûpula mutshi panshi, ne kubila ne dîyi dikola, bamba ne:

29 Mukalenga akuba bantu benda mu buakana ne mu bunsantu bua mutshima, bua bupudishibua panshi bonsu bâkeba bua kubashipa bua bukalenga ne bipungidi bia mu musokoku, mena bu muvua muntu ewu mupudibua panshi.

30 Ne bakasanka ne kubila kabidi ne dîyi dimua, bamba ne: Nzambi wa Abalahama, ne Nzambi wa Isaka, ne Nzambi wa Yakoba, akuba bantu aba mu buakana, diba dionsu dikalabu babila dîna dia Nzambi wabu bua bukubi.

31 Ne biakalua ne bakela mbila, bonsu bu mudi muntu umua, batudika mu kuimba ne mu kusamuna Nzambi wabu bua bualu bunena buvuaye mubenzela, mu dibakuba dia kupona mu bianza bia bena lukuna babu.

32 Eyowa, bakabila: Hozana kudi Nzambi Mutamba Bunena. Ne bakabila: Dibeneshibua dikala dîna dia Mukalenga Nzambi wa Bukitu Bonsu, Nzambi Mutamba Bunena.

33 Ne mitshima yabu ivua miwula ne disanka, tô ne ku dipatula dia binsonji bia bungi, bua bualu bua buimpa bua Nzambi bua kubapatuisha mu bianza bia bena lukuna babu; ne bavua bamanya ne bivua bua dikudimuna diabu dia mutshima ne didipuekesha diabu ki muakapatuishibuabu mu dibutuka dia kashidi.