1 Ne mpindiewu, biakalua ne kunyima kua Abinadi muakula mêyi â, wakôlola tshianza tshienda ne wakamba ne: Tshikondu netshilua tshiamona bonsu lupandu lua Mukalenga; tshiamona tshisamba tshionsu, tshisa tshionsu, muakulu onsu, ne bantu bonsu disu ne disu ne nebatonda kumpala kua Nzambi ne bitungu bienda bidi biakana.

2 Ne pashisha bantu ba bubi nebipatshibua, ne nebapeta tshia kuelela mikunda, ne kudidila, ne kudilakana, ne kusumakana kua menu abu; ne ebi bualu bavua babenga kumvuila dîyi dia Mukalenga; bua nanku Mukalenga kena ubasungila to.

3 Bualu badi mu mubidi ne bena diabulu, ne diabulu udi ne bukola pa bobu; eyowa, mena nyoka wa kala awu wakadinga baledi betu ba diambedi, tshiakenzeja dipona diabu; divua dikala bualu bua kaluila bukua bantu ba mu mubidi, bena masanka a pa buloba, bena diabulu, bajingulula bubi ku buimpa, bikala badibatshika kudi diabulu.

4 Nanku bukua bantu bonsu buvua bujimina; ne monayi, buvua bua kuikala bujimina kakuyi ndekelu bu Nzambi kayi musungila bantu benda ku ngikadilu wabu wa dipona ne dijimina to.

5 Kadi vulukayi muntu udi utungunuka mu buikadi buenda bua mu mubidi ne udi utungunuka mu njila ya mibi ne ya kutombokela Nzambi, udi ushala mu ngikadilu wenda wa dipona ne dijimina, ne diabulu udi ne bukôkeshi bonsu kudiye. Bua nanku udi muikala bu ne disungila kadivua dienzejibua to, bualu udi muena lukuna wa Nzambi; ne diabulu kabidi udi muena lukuna wa Nzambi.

6 Ne mpindiewu bu ne Kilisto kavua mulua pa buloba to, ndi ngamba bintu bitshilualua bu bikadi bimana kulua, kakuvua mua kuikala disungila to.

7 Ne bu Kilisto kavua mubika ku bafua to, anyi bu kavua mukosa mionji ya lufu to bua lukita kaluikadi ne butshimunyi to, ne bua lufu kaluikadi ne kalonda to, kakuvua mua kuikala dibika dia ku lufu to.

8 Kadi kudi dibika dia ku lufu, bua nanku lukita kaluena ne butshimunyi to, ne kalonda ka lufu kadi kadînyibua mu Kilisto.

9 Yeya udi bukenka ne moyo wa ba pa buloba; eyowa, bukenka budi kabuyi ndekelu, budi kabuyi mua kufîkuluka nansha; eyowa, ne kabidi moyo udi kawuyi ndekelu, bua lufu kaluikadiku kabidi to.

10 Mena mubidi wa tshifuaka ewu neuvuala mubidi udi kawuyi ufua, ne mubidi wa dibola ewu neuvuala mubidi udi kawuyi ubola, ne nebatuadibua bua kuimana kumpala kua tshilumbuluidi tshia Nzambi, bua kulumbuluishibua kudiye bilondeshila ku midimu yabu ne idi mikala mimpa anyi ne idi mikala mibi—

11 Pikalabi bimpa, bua kupeta dibika dia ku lufu bua moyo ne musangelu kabiyi ndekelu; ne pikalabi bibi, bua dibika dia ku lufu bua dipîshibua dia kadiyi ndekelu, ne badi bafidibua kudi diabulu, udi mubabatshika, tshidi tshikala dipîshibua—

12 Ne bavua benda bilondeshila ku masua ne majinga abu a mu mubidi; kabavua banji kubikila Mukalenga patshivua diboku dia lusa dibôluela nansha; bualu diboku dia lusa divua dibôluela, ne bavua babenga; bavua badimuisha bua malu mabi abu ne nansha nanku bavua babenga ku’alekela; ne bavua baledibua mukenji bua kukudimuna mutshima ne nansha nanku bavua babenga kukudimuna mutshima.

13 Ne mpindiewu, kanuena ne tshia kuzakala ne kukudimuna mutshima ku mibi yenu, ne kuvuluka ne amu mu Kilisto ne ku njila wenda ki munudi mua kupandishibua anyi?

14 Bua nanku, bu nuenu nulongesha mikenji ya Mose, longeshayi ne didi tshindidimbi tshia bintu bitshilualua—

15 Balongeshayi ne disungila didi divuila ku njila wa Kilisto Mukalenga, udi muikala mena Tatu wa tshiendelela. Amena.