1 Ne mpindiewu biakalua Amona ne mfumu Limihi bakabanga kuebejangana ne bantu bua mushindu wa kudipatuishabu mu bupika; ne mena bakenza ne bantu bonsu badisangisha pamua; ne bakenza nanku bua kupetabu dîyi dia bantu bitangila bualu ebu.

2 Ne biakalua ne kabakapeta mushindu kudipatuishabu mu bupika to, pa kumbusha bua kuambulabu bakaji babu ne bana babu, ne bisumbu bia bimuna bikesa biabu, ne bia bimuna binena biabu, ne ntenta yabu, ne kuyabu mu tshipela; bualu pavua bantu ba Limihi bela meji a kudipatuisha mu bupika ne muela wa mvita, kakuvua mushindu wa kukokangana ne Bena Lamana to bualu bavua bapita bungi.

3 Mpindiewu biakalua ne Gideona wakasemena kumpala ne wakimana kumpala kua mfumu, ne wakamuambila: Mpindiewu Ô mfumu, tô ne mpindiewu uvua misangu ya bungi mumvuila mêyi anyi patuvua bikala tukokangana ne bana betu, Bena Lamana.

4 Ne mpindiewu Ô mfumu, kuena mmumona ne ndi musadidi mulembakana to, kadi bu mûdi tô ne mpindiewu muteleja mêyi anyi nansha ku tshipimu kayi, ne avua ne diambuluisha kûdi, mena nanku ndi njinga ne uteleja mêyi anyi musangu ewu, ne nengikala musadidi weba ne nempatuisha bantu aba ku bupika.

5 Ne mfumu wakamuanyishila ne akula. Ne Gideona wakamuambila ne:

6 Mona kajila ka ku mfundu, kupitshila ku tshimanu tshia ku mfundu, ku luseka lua ku mfundu kua tshimenga. Bena Lamana, anyi balami ba Bena Lamana, batu bakuatshika mâluvu butuku; bua nanku tutumayi dimanyisha munkatshi mua bantu bonsu aba, bua basangisha bisumbu biabu bia bimuna bikesa ne binena pamua, bua kubilombola mu tshipela butuku.

7 Ne nenya bilondeshila ku dîyi dieba, bua kufuta mulambu wa mvinyo wa ndekelu kudi Bena Lamana, ne nebakuatshika; ne netupita kajila ka musokoku ku dia bakaji dia tshitudilu tshiabu pikalabu bakuatshika ne balala.

8 Netuye nanku ne bakaji betu ne bana betu, ne bisumbu bia bimuna bikesa bietu, ne bia bimuna binena bietu mu tshipela; ne netuenza luendu tunyunguluka ku mikalu ya bulaba bua Shiloma.

9 Ne biakalua ne mfumu wakumvuila mêyi a Gideona.

10 Ne mfumu Limihi wakenza ne bantu benda basangisha bisumbu bia bimuna biabu pamua; ne wakatuma mulambu wa mvinyo kudi Bena Lamana; ne wakabatuma kabidi mvinyo mupita bungi, bu dipesha kudibu; ne bakanua mvinyo uvua mfumu Limihi mubatumina bikola.

11 Ne biakalua ne bantu ba mfumu Limihi bakaya butuku mu tshipela ne bisumbu bia bimuna bikesa biabu ne bia bimuna binena biabu, ne banyunguluka bulaba bua Shiloma mu tshipela, ne kukoba njila wabu batangila ku bulaba bua Zalahemela, balombodibua kudi Amona ne bana babu.

12 Ne bavua bakaya mu tshipela ne ngolo yabu yonsu, ne biamua bia mpalata, ne bintu biabu bia mushinga mukola, bivuabu mua kuambula, ne biakudia biabu kabidi; ne bakatungunuka ne luendu luabu.

13 Ne kunyima kua bikala matuku a bungi mu tshipela bakafika mu bulaba bua Zalahemela, ne bakadisangisha ku bantu ba Mosiya, ne bakalua bantu benda.

14 Ne biakalua ne Mosiya wakabakidila ne disanka; ne wakakidila kabidi miandiku yabu, ne kabidi miandiku ivua bantu ba Limihi bangula.

15 Ne mpindiewu biakalua ne pakamanya Bena Lamana ne bantu ba Limihi bavua bumbuka mu bulaba butuku, bakatuma musumba wa basalayi mu tshipela bua kubalondakajabu;

16 Ne kunyima kua kubalondakajabu matuku abidi, kabatshivua mua kulonda makasa abu to; bua nanku bakajimina mu tshipela.