1 Ne mpindiewu biakalua ne Zenife wakambikila Noa, umua wa bana benda ba baluma, bukalenga; bua nanku Noa wakabanga kukôkesha pa muaba wenda; ne kakenda mu njila ya tatuenda to.

2 Bualu monayi, kakalama mikenji ya Nzambi to, kadi wakolonda majinga a mutshima wenda nkayenda. Ne uvua ne bakaji ne bakaji ba ku mpenga babakibua ba bungi. Ne wakenzeja bantu benda mibi, ne kuenza tshivua tshikala tshia malu a bubi bupita ku mesu a Mukalenga. Eyowa, ne bakenda masandi ne bubi bua mushindu onsu.

3 Ne wakateka tshitadi tshia tshia bitanu tshia bionsu bivuabu nabi, tshitupa tshimua tshia tshia bitanu tshia ngolo wabu ne tshia mpalata wabu, ne tshitupa tshimua tshia tshia bitanu tshia zife wabu, ne tshia tshiamua tshia kabanda tshiabu, ne tshia tshiamua tshia kalabi tshiabu ne tshia tshiamua tshifika tshiabu; ne tshitupa tshimua tshia tshia bitanu tshia nyama yabu ya manyi; ne kabidi tshitupa tshimua tshia bitanu tshia nteta yabu yonsu.

4 Ne wakangata bionsu ebi bua kudikuatshishaye, ne bakaji benda ne bakaji ba ku mpenga babakibua benda; ne bakuidi benda kabidi, ne bakaji babu ne bakaji ba ku mpenga babakibua babu; ki muakashintululaye malu a bukalenga nanku.

5 Bualu wakumbusha bakuidi bonsu bavua bajididibua kudi tatuenda; ne kujidilaye bapia-bapia pa muaba wabu, bavua badibandisha mu diditambisha mu mitshima yabu.

6 Eyowa, ne bavua babakuatshila nanku bua bufuba buabu, ne bua ditendelela diabu dia mpingu, ne bua masandi abu, ne bitadi bivua mfumu Noa mutekela bantu benda; ki muvua bantu benza mudimu menamena bua kukuatshisha malu mabi.

7 Eyowa, ne bakavua kabidi batendeledi ba mpingu, bualu mêyi a tshianana ne a lubombu a mfumu ne bakuidi akabadinga; bualu bavua babambila mêyi a lubombu.

8 Ne biakalua ne mfumu Noa wakibaka nzubu mimpa ne mialabala ya bungi; ne wakayilengeja ne mabaya menza bimpa, ne bintu bia mushinga mukola bia mushindu onsu, bia ngolo, ne bia tshiamua tshia mpalata, ne bia tshiamua tshifika, ne bia tshiamua tshia kalabi, ne bia zife, ne bia tshiamua tshia kabanda;

9 Ne wakadibakila kabidi nzubu wa bumfumu mualabala, ne nkuasa wa bukalenga munda muenda, bionsu ebi bivua bia mabaya menza bimpa ne bivua bilengeja ne ngolo ne tshiamua tshia mpalata ne ne bintu bia mushinga mukola.

10 Ne wakenzeja kabidi basadidi benda mudimu muimpa wa mushindu onsu munda mua bimanu bia ntempelo, bia mabaya mimpa, ne bia tshiamua tshia kabanda, ne bia tshiamua tshia kalabi.

11 Ne bisombedi bivua bilamisha bua bakuidi banena, bivua kûlu bipita bisombedi bikuabu bionsu, wakabilengeja ne ngolo munonoka; ne wakibakisha kamanu kadi kafikila pa tshiadi padi muntu musomba mu nkuasa kumpala kuabi, bua bikishisha mibidi yabu ne maboku abu popu padibu bambila bantu benda mêyi a mafi ne a tshianana.

12 Ne biakalua ne wakibaka kaleya pabuipi ne ntempelo, eyowa, kaleya kapita bula, kapita mena bula ne uvua mua kuimana pa musonga waku ne uvua kumona bulaba bua Shiloma panshi, ne kabidi bulaba bua Shemelona buvua Bena Lamana basamu; ne uvua kabidi mua kumona bulaba bonsu bua ku mpenga yonsu.

13 Ne biakalua ne wakenza ne nzubu ya bungi ibakibua mu bulaba bua Shiloma; ne wakenza ne kaleya kanena kibakibua pa kakuna ku node kua bulaba bua Shiloma, buvua buikala muaba wa tshinyemenu bua bana ba Bena Nefi diba divuabu banyema pambelu pa bulaba; ne ki muakenzaye nanku ne mabanji avuaye upeta ku difutshisha dia bantu benda bitadi.

14 Ne biakalua ne wakateka mutshima wenda ku mabanji enda, ne uvua upitshisha diba dienda ku nsombelu mubi ne bakaji benda ne bakaji ba ku mpenga babakibua benda; ne bakuidi benda kabidi bavua bapitshisha diba diabu ne bandumba.

15 Ne biakalua ne wakadima madimi a mvinyo mu bulaba bonsu; ne wakibaka bikaminu, ne wakenza mvinyo wa bungi; ne bua nanku wakalua mukuatshiki wa mvinyo, ne bantu benda kabidi.

16 Ne biakalua ne Bena Lamana bakabanga kubuelela bantu benda, kubuelela bisumbu bikesa, ne kubashipa mu madimi abu, ne pavuabu badisha bisumbu bia bimuna biabu.

17 Ne mfumu Noa wakatuma balami ku miaba mishilangana mu bulaba bua kubalamina ku bula; kadi kavua mutuma bungi bukumbana to, ne Bena Lamana bakababunda ne bakabashipa, ne bakapatula bisumbu bia bimuna biabu bia bungi mu bulaba; ki muakabanga Bena Lamana kubashipa nanku, ne kubenzela lukinu luabu.

18 Ne biakalua ne mfumu Noa wakatuma misumba yenda ya basalayi bua kubaluisha, ne biakabapingaja panyima, anyi biakabapingaja panyima bua mutantshi wa diba mukesa; bua nanku, biakapingana, ne disanka bua bintu bivuabu banyenga.

19 Ne mpindiewu, bavua badibandisha ne diditambisha mu mitshima yabu bua ditshimuna dinena edi; bavua badileja bua bukola buabu nkayabu, bamba ne makumi abu atanu avua mua kukandamena binunu bia Bena Lamana; ne ki muvuabu badileja nanku, ne basanka bua mashi, ne mu dimatshisha dia mashi a bana babu, ne bavua benza nanku bua mfumuabu ne bakuidi babu.

20 Ne biakalua ne kuvua muntu munkatshi muabu uvua ne dîna ne Abinadi; ne wakaya munkatshi muabu, ne wakabanga kuamba ku Nyuma, wamba ne: Monayi, Mukalenga udi wamba nanku, ne monayi mumpesha mukenji nanku, wamba ne: ndâku, ne ambila bantu aba ne: Mukalenga udi wamba ne—Diakabi dikala kudi bantu aba, bualu ndi mumona malu mapita bubi abu, ne bubi buabu, ne masandi abu; ne nembakumbula mu tshiji tshianyi, pa kumbusha bobu bakudimuna mutshima.

21 Ne pa kumbusha bobu bakudimuna mutshima ne bakudimuka kudi Mukalenga Nzambi wabu, monayi, nembafila mu bianza bia bena lukuna babu, eyowa, nebatuadibua mu bupika; ne tshianza tshia bena lukuna babu netshibatatshisha.

22 Ne nebilua ne nebamanya ne ndi Mukalenga Nzambi wabu, ne ndi Nzambi wa mukawu, udi unyoka malu mabi a bantu banyi.

23 Ne nebilua ne pa kumbusha bantu aba bakudimuna mutshima ne bakudimuka kudi Mukalenga Nzambi wabu, nebabuejibua mu bupika; ne muntu nansha umua kakubapatuisha to, pa kumbusha Mukalenga Nzambi wa Bukitu Bonsu.

24 Eyowa, ne nebilua ne pâbilabu kundi nengikala ne lujoku bua kumvua mbila yabu; eyowa, ne nengalekela ne batûtshibua kudi bena lukuna babu.

25 Ne pa kumbusha bakudimuna mutshima mu bikunyi ne butu, ne babila ne bukitu kudi Mukalenga Nzambi wabu, ntshiakumvua masambila abu to, nansha kubapatuisha mu ntatu yabu; ne nanku Mukalenga udi wamba, ne nanku udi mmupesha mukenji.

26 Mpindiewu biakalua ne pakabambila Abinadi mêyi â bakamufîkila tshiji, ne bakakeba bua kuangata moyo wenda; kadi Mukalenga wakamupatuisha mu bianza biabu.

27 Mpindiewu pakumvua mfumu Noa mêyi avua Abinadi muambila bantu, wakafîka penda tshiji; ne wakamba ne: Abinadi nganyi, bua kundumbuluishaye mema ne bantu banyi, anyi Mukalenga nganyi, bua yeya kupesha bantu banyi lutatu lukola nanku?

28 Ndi nupesha mukenji bua nulua ne Abinadi apa, bua mmushipesha, bualu muamba bintu ebi bua yeya kusonsola bantu banyi bua bafîkilangana tshiji bamua kudi bakuabu, ne bua kujula makokangana munkatshi mua bantu banyi; bua nanku nemmushipa.

29 Mpindiewu mesu a bantu avua mafofomijibua; bua nanku bakapapisha mitshima yabu bua kubenga mêyi a Abinadi, ne bakakeba bua kumukuata kubangila diba adi to ne kunyima. Ne mfumu Noa wakapapisha mutshima wenda bua kubenga dîyi dia Mukalenga, ne kakakudimuna mutshima wenda ku bienzedi bienda bibi to.