Shapita 14
Yeshaya udi wakula bitangila Mashiya—Udi uleja dipuekeshibua ne makenga a Mashiya—Mashiya udi ufila anyima wenda bu mulambu bua kufuta nawu bua mibi ya bantu ne udi ulumbuluila basambuki ba mikenji—Fuanyikijayi ne Yeshaya 53. Pabuipi ne 148 k.d.K.
1 Eyowa, Yeshaya kena mena wamba to ne: Nganyi udi muitabuija muaku wetu, ne kudi nganyi udi diboku dia Mukalenga dibuluibua?
2 Bualu neakola kumpala kuenda bu mudi lutonga, ne bu mudi muji udi upatuka mu bulaba bûma; kena ne tshimfuanyi anyi bulengela to; ne patuamumona kakuena buimpa budi bumujingisha kutudi.
3 Udi mupetudibua ne mupidibua kudi bantu; muntu wa kanyinganyinga, ne mumanya mpaji; tuakasokoka mpala yetu kudiye; wakapetudibua, ne katuakamuanyisha to.
4 Bushuwa uvua muambula mpaji yetu, ne muambula kanyinganyinga ketu; kadi tuakamumona bu mukumibua, mutûtshibua kudi Nzambi, ne mutatshishibua.
5 Kadi wakatapibua mputa bua disambuka dia mikenji dietu, wakasâmishibua bua malu mabi etu; dinyoka didi divuija ditalala divua pa mutu penda; ne ku mibundabunda yenda tudi bôndopibua.
6 Tuetu bonsu, bu mudi mikoku, tudi bapambuka; tudi balonda muntu yonsu njila wenda nkayenda; ne Mukalenga wakateka malu mabi etu tuetu bonsu pa muntu penda.
7 Uvua mukengeshibua, ne uvua mutatshishibua, kadi kakabulula mukana muenda to; bakavua nenda bu mudi muana wa mukoku ku tshishipelu, ne bu mudi mukoku kumpala kua badi bawukosa miosa mushindu wa ne kakabulula mukana muenda to.
8 Wakumbushibua mu lukanu ne ku tshilumbuluilu tshiakana; ne nganyi wakuila tshikondu tshienda? Bualu uvua mukoshibua mu bulaba bua ba moyo; bua disambuka mikenji dia bantu banyi wakakumibua.
9 Wakanyisha bua lukita luenda luikala popamua ne bantu babi, ne popamua ne mubanji mu lufu luenda; nansha muvuaye kayi muenza bubi to, ne muvua didinga nansha dimua kadiyi dipatuka mukana muenda to.
10 Bitshivua bisankisha Mukalenga bua kumusâmisha; wakamunyingalaja; palua kufila anyima wendabu mulambu bua mibi neamona ndelanganyi yenda, nealepesha matuku enda, ne dijinga dia Mukalenga nedikumbana mu tshianza tshienda.
11 Neamona dikenga dia anyima wenda, ne neasanka; ku dimanya dienda musadidi wanyi muakana neabingisha ba bungi; bualu neambula malu mabi abu pa mutu penda.
12 Bua nanku nemmuabanyina tshitupa tshia bintu popamua ne bantu banena, ne neabanyangana bintu binyenga mu mvita popamua ne bilobo; bualu wakapumuna anyima wenda tô ne ku lufu; ne uvua mubadibua popamua ne bashipi ba mikenji; ne wakambula mibi ya bangi, ne ulumbuluila basambuki ba mikenji.