1 Mpindiewu Alama, bualu Mukalenga uvua mumudimuisha ne misumba ya basalayi ya mfumu Noa ivua mua kubaluila, ne bualu wakambila bantu benda, bua nanku bakasangisha bisumbu bia bimuna biabu, ne bakangata nteta yabu, ne bakaya mu tshipela kumpala kua misumba ya basalayi ya mfumu Noa.

2 Ne Mukalenga wakabapesha makanda, bua bantu ba mfumu Noa kababakuatshi bua kubabutula to.

3 Ne bakanyema mu luendu matuku muanda mukulu mu tshipela.

4 Ne bakafika ku amua bulaba, eyowa, mena bulaba bulengela ne buimpa, bulaba bua mâyi makezuka.

5 Ne bakâsa ntenta yabu, ne bakabanga kudima buloba, ne bakabanga kuibaka nzubu minena; eyowa, bavua benji ba mudimu bikola, ne bakenza mudimu menamena.

6 Ne bantu bavua bajinga ne Alama ikala mfumu wabu, bualu bantu benda bavua bamunanga.

7 Kadi wakabambila ne: Monayi, kabiena bikengedibua ne tuikala ne mfumu to; bualu Mukalenga udi wamba ne: kanuakuangata musunyi umua ne mushinga kupita mukuabu to, anyi muntu umua kakuela meji ne udi mupita mukuabu to; bua nanku ndi nnuambila ne kabiena bikengedibua ne nuikala ne mfumu to.

8 Nansha nanku, bivua mua kuikala bimpa bua nuenu kuikala ne mfumu bu koko kuikala mushindu wa nuenu kuikala matuku onsu ne bantu balulama bua kuikalabu ba mfumu benu.

9 Kadi vulukayi malu mabi a mfumu Noa ne bakuidi benda; ne mema muina mvua mukuatshibua mu diteyi, ne ngakenza bintu bia bungi bivua wa malu a bubi bupita ku mesu a Mukalenga, biakangenzeja dikudimuna dia mutshima dia mpaji dikola;

10 Nansha nanku, kunyima kua mpaji ya bungi, Mukalenga wakateleja mbila yanyi, ne wakandamuna masambila anyi, ne wakangenza tshiamu tshia mudimu mu bianza bienda bua kufikisha bangi benu ku dimanya dia bulelela buenda.

11 Nansha nanku, ntshiena nditumbisha bua bualu ebu to, bualu ntshiena mukumbana bua kuditumbisha mema nkayanyi to.

12 Ne mpindiewu ndi nnuambila ne, mfumu Noa wakanukengesha, ne nuvua mu bupika kudiye ne bakuidi benda, ne bakanufikisha ku dienza dia malu mabi; bua nanku nuvua basuikibua ne mionji ya malu mabi.

13 Ne mpindiewu bualu nuakapatuishibua ku bukola bua Nzambi mu mionji eyi, eyowa, mena mu bianza bia mfumu Noa ne bantu benda, ne mu mionji ya malu mabi kabidi, mena ki mundi njinga ne nukankamana mu budishikaminyi ebu buakanufikisha badikadila, ne kanuanyishi bua muntu nansha umua kuikalaye mfumu wenu to.

14 Ne kabidi kanuanyishi bua muntu nansha umua kuikalaye mulongeshi wenu anyi musadidi wenu to, pa kumbusha yeya muikala muntu wa Nzambi, udi wenda mu njila yenda ne udi ulama mikenji yenda.

15 Ka muakalongesha Alama bantu benda nanku, ne muntu yonsu ananga mukuenda bu mudiyi mudinanga, ne kakuikadi dikokangana munkatshi muabu to.

16 Ne mpindiewu, Alama uvua muakuidi wabu munena, bualu uvua muashi wa ekelezia wabu.

17 Ne biakalua ne muntu nansha umua kavua upeta bukôkeshi bua kuyisha anyi bua kulongesha to, pa kumbusha bumupesha kudiye bufuma kudi Nzambi. Bua nanku uvua wakajidila bakuidi babu bonsu ne balongeshi babu bonsu; ne nansha umua kavua mujididibua to pa kumbusha muikala muntu mululama.

18 Bua nanku bakatangila bantu babu, ne bakabadisha ne bintu bia buakana.

19 Ne biakalua ne bakabanga kulubuluka menamena mu bulaba; ne bakabikila bulaba ne Helama.

20 Ne biakalua ne bakavulangana ne bakalubuluka menamena mu bulaba bua Helama; ne bakâsa tshimenga, tshiakabikilabu ne tshimenga tshia Helama.

21 Nansha nanku Mukalenga udi mumona bikumbana bua kupeshaye bantu benda dinyoka; eyowa, udi utêta ditukija diabu ne ditabuija diabu.

22 Nansha nanku—ewu yonsu udi wela tshieyemenu tshienda kudiye, yeya neabandishibua ku dituku dia ndekelu. Eyowa, ne ki muvuabi bua bantu aba.

23 Bualu monayi, nenuleja ne bakatuadibua mu bupika, ne muntu nansha umua kavua mua kubapatuisha to pa kumbusha Mukalenga Nzambi wabu, eyowa, mena Nzambi wa Abalahama ne Isaka ne wa Yakoba.

24 Ne biakalua ne wakabapatuisha, ne wakabaleja bukola buenda bunena, ne kusanka kuabu kuvua kunena.

25 Bualu monayi, biakalua ne pavuabu mu bulaba bua Helama, eyowa, mu tshimenga tshia Helama, pavuabu badima ku mpenga ya buloba yonsu, monayi musumba wa basalayi wa Bena Lamana uvua mu mikalu ya bulaba.

26 Mpindiewu biakalua ne bana babu ne Alama bakanyema bashiya madimi abu, ne bakadisangisha mu tshimenga tshia Helama; ne bôwa bukola buakabakuata bualu bua kumona Bena Lamana.

27 Kadi Alama wakasemena kumpala ne wakimana munkatshi muabu, ne wakabakankamija bua kabikadi ne bôwa to, kadi bavuluka Mukalenga Nzambi wabu ne neabapatuisha.

28 Bua nanku bakalekela bôwa buabu, ne bakabanga kubila kudi Mukalenga bua atekesha mitshima ya Bena Lamana, bua bobu kubepelesha, ne bakaji babu, ne bana babu.

29 Ne biakalua ne Mukalenga wakatekesha mitshima ya Bena Lamana. Ne Alama ne bana babu bakasemena kumpala ne bakadifila mu bianza biabu; ne Bena Lamana bakangata bulaba bua Helama.

30 Mpindiewu misumba ya basalayi ya Bena Lamana, ivua milondakaja bantu ba mfumu Limihi, ivua mijimina matuku a bungi mu tshipela.

31 Ne monayi, bivua bisangana bakuidi ba mfumu Noa abu, mu muaba wakabikilabu ne Amulona; ne bakavua babanga kuasa mu bulaba bua Amulona ne bakavua babanga kudima buloba.

32 Mpindiewu dîna dia mulombodi wa bakuidi abu divua Amulona.

33 Ne biakalua ne Amulona wakasengelela Bena Lamana; ne wakatuma kabidi bakaji babu kumpala, bavua bikala bana ba bakaji ba Bena Lamana, bua basengelela bana babu ba baluma, bua kabashipi ba bayabu to.

34 Ne Bena Lamana bavua ne diumvuila Amulona ne bana babu moyo wa lusa, ne kabakabashipa to, bua bakaji babu.

35 Ne Amulona ne bana babu bakadisangisha kudi Bena Lamana, ne pavuabu benda luendu mu tshipela bua kukeba bulaba bua Nefi bakapeta bulaba bua Helama, buvua Alama ne bana babu basamu.

36 Ne biakalua ne Bena Lamana bakalaya Alama ne bana babu ne, biabalejabu njila uvua ulombola ku bulaba bua Nefi bavua mua kubanyishila ne bikala ne moyo ne budishikaminyi buabu.

37 Kadi pakabaleja Alama njila uvua ulombola ku bulaba bua Nefi Bena Lamana bakabenga kulama dilaya diabu; kadi bakateka balami ku mpenga yonsu ya bulaba bua Helama, pa mutu pa Alama ne bana babu.

38 Ne bashadila babu bakaya ku bulaba bua Nefi; ne tshitupa tshiabu tshiakapingana ku buloba bua Helama, ne bakalua kabidi ne bakaji ne bana ba balami bavua bashiyibua mu bulaba.

39 Ne mfumu wa Bena Lamana wakanyishila Amulona ne ikala mfumu ne mukôkeshi pa bantu benda, bavua mu bulaba bua Helama; nansha nanku kavua ne bukôkeshi bua kuenza tshintu nansha tshimua kushilangana ne disua dia mfumu wa Bena Lamana to.