1 Ne biakalua ne kunyima kua bidimu bibidi ne Abinadi wakalua munkatshi muabu mudifuanyikija bu muntu mukuabu, bua ne kabakamumanya to, ne wakatuadija kuamba ku Nyuma munkatshi muabu, wamba ne: Mukalenga mumpesha mukenji, wamba ne: Abinadi, ndâku ne amba ku Nyuma kudi bantu banyi aba, bualu mbapapisha mitshima yabu ku mêyi anyi; kabena bakudimuna mutshima ku bienzedi biabu bibi to; bua nanku nembanyoka mu tshiji tshianyi, eyowa, mu tshiji tshianyi tshikola nembanyoka bua malu mabi ne malu mapita bubi abu.

2 Eyowa, diakabi kudi lukongu lua bantu elu! Ne Mukalenga wakangambila: Olola tshianza tshieba ne amba ku Nyuma, wamba ne: Mukalenga udi wamba nanku, nebilua ne lukongu lua bantu elu, bua malu mabi alu, nelukuatshibua mu bupika, ne nebatûtshibua pa matama; eyowa, nebipatshibua kudi bantu, ne nebashipibua; ne mikuku ya mûlu, ne mbua, eyowa, nyama ya muitu, neikusula misunyi yabu.

3 Ne nebilua ne moyo wa mfumu Noa newikala ne mushinga bu wa tshilamba munda mua tshikutu tshia kapia kakola; bualu neamanya ne ndi Mukalenga.

4 Ne nebilua ne nentûta bantu banyi aba ne ntatu mikola, eyowa, ne tshiyola ne ne tshipupu; ne nembelesha mikunda dituku dijima.

5 Eyowa, ne nengenza ne babasuika majitu pa nyima yabu; ne nebabasaka kumpala bu mudi mpunda wa kamama.

6 Ne nebilua ne nentuma mvula wa mabua munkatshi muabu, ne neabatûta; ne lupepela lua ku esete nelubatûta kabidi; ne bishi nebinyanga bulaba buabu, ne nebidia mu bujima nteta yabu.

7 Ne nebatûtshibua netshipupu tshinena—ne nengenza bionsu ebi bua malu mabi ne malu mapita bubi abu.

8 Ne nebilua ne pa kumbusha bakudimuna mutshima nembabutula bonsu pa mpala wa buloba; nansha nanku nebashiya miandiku panyima pabu, ne nenyikuba bua bisamba bikuabu biâsa mu bulaba ebu; eyowa, nengenza nanku bua mema kuleja bisamba bikuabu malu mapita bubi a bantu aba. Ne Abinadi wakamba ku Nyuma a bungi mabi bua bantu aba.

9 Ne biakalua ne bakamufîkila tshiji; ne bakamukuata ne bakamufila musuika kumpala kua mfumu, ne bakambila mfumu ne: Mona, tudi balua ne muntu ewu uvua muamba ku Nyuma bibi bitangila bantu beba kumpala kueba, ne udi wamba ne Nzambi neababutula.

10 Ne udi kabidi wamba ku Nyuma bibi bitangila moyo weba, ne wamba ne moyo weba newikala bu tshilamba mu tshikutu tshia kapia.

11 Ne kabidi, udi wamba ne newikala bu mudi lubalabala lûma lua mu budimi, bu mudi mena lubalabala lûma lua mu budimi, ludi nyama ikulula ne idiatakaja mu makasa.

12 Ne kabidi, udi wamba ne newikala bu mudi bilongu bia chardon, udi, padiwu muboba menamena, padi lupepela luela, bidi bitangalajibua pa mpala wa bulaba. Ne udi udingisha ne Nzambi uvua muamba nanku. Ne udi wamba ne bionsu ebi nebikufikila pa kumbusha wewa mukudimuna mutshima, ne mbua malu mabi eba.

13 Ne mpindiewu, Ô mfumu, bubi bunena kayi bûdi muenza, anyi mibi minena kayi idi bantu beba benza, bua tupîshibua kudi Nzambi anyi tulumbuluishibua kudi muntu ewu?

14 Ne mpindiewu, Ô mfumu, mona, katuena bapîla to, ne wewa, Ô mfumu, kuena ne mibi to; bua nanku, muntu ewu washimi bikutangila, ne wambi naka ku Nyuma.

15 Ne mona, tudi ne bukola, katuakuya mu bupika to, anyi kuangatshibua bakuatshibu kudi bena lukuna betu to; eyowa, ne udi mulubuluka mu bulaba, ne neulubuluka kabidi.

16 Mona, muntu awu nyeya ewu, tudi tumufila mu bianza bieba; udi mua kuenza nenda monsu mudibi bikulengelela.

17 Ne biakalua ne mfumu Noa wakelesha Abinadi mu lukanu; ne wakapesha bakuidi mukenji bua kudisangishabu pamua bua abuela nabu mu tshipangu bitangila tshiakuenzaye nenda.

18 Ne biakalua ne bakambila mfumu ne: Luaku nenda apa bua tumukonka; ne mfumu wakafila mukenji bua balua nenda kumpala kuabu.

19 Ne bakabanga kumuela nkonku bua kumutupakajabu, nanku bua bikala ne tshiakumufundilabu; kadi wakabandamuna ne dikima, ne wakakolela ku nkonku yabu yonsu, eyowa, bakakema; bualu wakabakolela ku nkonku yabu yonsu, ne wakabapuwisha mu mêyi abu onsu.

20 Ne biakalua ne umua wabu wakamba ne: Miaku idi mifunda, ne ivua batatuetu balongesha idi yumvuija tshinyi, yamba ne:

21 Bu mudiwu malengela pa mikuna makasa a ewu udi utuala lumu luimpa; udi utangalaja ditalala; udi ulua ne lumu luimpa lua buimpa; udi utangalaja lupandu; udi wambila Siona ne, Nzambi weba udi ukôkesha!

22 Batentekedi beba nebabandisha dîyi; nebimba misambu ne dîyi pamua, bualu nebadimuena ne mesu pâpingaja Mukalenga Siona kabidi.

23 Tudikayi ne disanka; imbayi pamua nuenu miaba ya bikulu ya Yelushalema; bualu Mukalenga wasambi bantu benda, yeya wasungidi Yelushalema;

24 Mukalenga waleji diboku dienda dia tshijila patoka ku mesu a bisamba bionsu; ne ndekelu ya buloba yonsu neimona lupanda lua Nzambi wetu?

25 Ne mpindiewu Abinadi wakabambila ne: Nudi bakuidi, ne nudi nuenza bu nudi nulongesha bantu aba, ne nudi numvua nyuma wa buambi ku Nyuma, ne nutshidi nujinga kumanya kundi tshidi bintu ebi bikeba kuamba?

26 Ndi nnuambila ne, diakabi dikala kunudi bualu nudi nunyangakaja njila ya Mukalenga! Bualu bu nuenu numvua bintu ebi kadi kanuena babilongesha to; bua nanku, nudi banyangakaja njila ya Mukalenga.

27 Kanuena bafila mitshima yenu bua kumvua to; bua nanku, kanuena ne lungenyi to. Nanku, ntshinyi tshinudi nulongesha bantu aba?

28 Ne bakamba ne: Tudi tulongesha mikenji ya Mose.

29 Ne wakabambila kabidi ne: Bu nuenu nulongesha mikenji ya Mose, bua tshinyi kanuena nuyilama to? Bua tshinyi nudi nuteka mitshima yenu pa mabanji? Bua tshinyi nudi nuenda masandi ne nudi nujikija makanda enu ne bandumba, eyowa, ne nuenzeja bantu aba mibi, bua Mukalenga kuitabayi bua nkutuma bua kuamba ku Nyuma bibi bia bantu aba, eyowa, dibi mena dipita bua bantu aba?

30 Kanuena bamanya ne ndi ngamba bulelela anyi? Eyowa, nudi bamanya ne ndi ngamba bulelela; ne nudi ne tshia kuzakala kumpala kua Nzambi.

31 Ne nebilua ne nenutûtshibua bua malu mabi enu, bualu nuvua bamba nudi nulongesha mikenji ya Mose. Ne nudi bamanya tshinyi bitangila mikenji ya Mose? Lupandu ludi luluila ku mikenji ya Mose anyi? Nudi nuamba tshinyi?

32 Ne bakandamuna ne bakamba ne lupandu luvua luluila ku mikenji ya Mose.

33 Kadi mpindiewu Abinadi wakabambila ne: Ndi mumanya ne nuenu balama mikenji ya Nzambi nenupandishibua; eyowa, nuenu balama mikenji ivua Mukalenga mupesha Mose pa mukuna wa Sina, wamba ne:

34 Ndi Mukalenga Nzambi weba, uvua mukupatula mu bulaba bua Ejipitu, mu nzubu wa bupika.

35 Kuikadi ne Nzambi mukuabu kumpala kuanyi to.

36 Kudienzedi lupingu lusonga nansha lumua, anyi tshifuanyikijilu kampanda tshia tshintu kampanda tshidi mu diûlu ku mutu, anyi tshidi panshi pa buloba to.

37 Mpindiewu Abinadi wakabambila ne, Nudi benza bionsu ebi anyi? Ndi nnuambila ne, To, kanuena benza to. Ne nudi balongesha bantu aba ne benza bintu bionsu ebi anyi? Ndi nnuambila ne, To, kanuena benza to.