1 Ne mpindiewu pakumvua mfumu mêyi â, wakambila bakuidi benda ne: Ndayi ne muntu ewu, ne mushipayi; bualu tshitudi bua kuenza nenda ntshinyi, bualu udi mupâla.

2 Ne bakasemena ne bakidikija bua kumukuata; kadi wakabakandamena, ne wakabambila ne:

3 Kanundengi to, bualu Nzambi neanutûta binuateka bianza bienu pa mbidi panyi, bualu ntshiena muanji kufila mukenji uvua Mukalenga muntuma bua kufila to; anyi ntshiena muanji kunuambila tshinuvua bandomba ne ngamba to; bua nanku, Nzambi kakulekela ne nunshipa mpindiewu to.

4 Kadi ndi ne tshia kukumbaja mikenji ivua Nzambi mumpesha; ne nudi bamfîkila tshiji bualu ndi munuambila bulelela. Ne kabidi, nudi mbamona ne ndi mupâla bualu ndi muakula dîyi dia Nzambi.

5 Mpindiewu biakalua ne kunyima kua Abinadi muakula mêyi â bantu ba mfumu Noa kabakakima kumukuata to, bualu Nyuma wa Mukalenga uvua nenda; ne mpala wenda uvua ukenka ne bukenka bupita, bu muvua wa Mose pavuaye pa mukuna wa Sina, pavuaye wakula ne Mukalenga.

6 Ne wakakula ne bukola ne bukôkeshi bufuma kudi Nzambi, ne wakatungunuka ne mêyi enda, wamba ne:

7 Nudi numona ne kanuena ne bukola bua kunshipa to, bua nanku, ndi njikija mukenji wanyi. Eyowa, ne ndi mumona udi unutapa mu mitshima yenu bualu ndi nnuambila bulelela bitangila malu mabi enu.

8 Eyowa, ne mêyi anyi adi anuwuja dikema ne dikatshila, ne tshiji.

9 Kadi ndi njikija mukenji wanyi; ne pashisha kundi nya kakuena ne bualu to, bu mema mupandishibua.

10 Kadi ndi nnuambila mushindu ewu: munudi nungenza, momumua, nemuikala tshifuanyikiji ne tshindidimbi bia bintu bitshilualua.

11 Ne mpindiewu ndi nnubadila bishadi bia mikenji ya Nzambi, bualu ndi mmona ne kayena mifundibua mu mitshima yenu to; ndi mmona ne nudi balonga ne balongesha malu mabi tshitupa tshipita bunena tshia moyo wenu.

12 Ne mpindiewu, nudi nuvuluka ne mvua munuambila ne: Kudienzedi lupingu lusonga nansha lumua, anyi tshifuanyikijilu kampanda tshia bintu bidi mu diûlu ku mutu, anyi bidi panshi pa buloba, anyi bidi mu mâyi muinshi mua buloba to.

13 Ne kabidi: Kuyinaminyi to, anyi kuyisadidi nansha; bualu mema Mukalenga Nzambi weba ndi Nzambi wa mukawu, udi unyoka malu mabi a batatu pa mitu ya bana, mu lukongu luisatu ne luinayi ya badi bankina;

14 Ne ntundeja lusa kudi binunu bia badi bannanga ne badi balama mikenji yanyi.

15 Kutedi dîna dia Mukalenga Nzambi weba tshianana to; bualu Mukalenga kena ubingisha udi utela dîna dienda tshianana dipîla to.

16 Uvuluka dituku dia sabata, bua kudijidila.

17 Ukuata mudimu matuku asambombo, ne wenza mudimu weba onsu;

18 Kadi mu dituku dia muanda muteketa, didi dituku dia sabata dia Mukalenga Nzambi weba, kuenji mudimu nansha umua to, wewa, anyi muaneba wa baluma, anyi muaneba wa bakaji, musadidi weba wa baluma, anyi musadidi weba wa bakaji, anyi bimuna bia ngomba bieba, anyi muenyi udi munda mua lupangu lueba;

19 Bualu mu matuku asambombo Mukalenga wakafuka diûlu ne buloba, ne mbuwa, ne bionsu bidimu; bua nanku Mukalenga wakabenesha dituku dia sabata ne wakadijidila.

20 Nemeka tatueba ne mamueba, bua matuku eba ikala a bungi pa bulaba budi Mukalenga Nzambi weba mukupesha.

21 Kushipianganyi to.

22 Kuendi masandi to. Kuibi to.

23 Kushiminyinyi mukueba malu a mafi to.

24 Kualakanyi nzubu wa mukueba to, kualakanyi mukaji wa mukueba to, anyi musadidi wenda wa baluma, anyi musadidi wenda wa bakaji, anyi ngomba wenda, anyi mpunda wenda, anyi tshintu nansha tshimua tshia mukueba to.

25 Ne biakalua ne kunyima kua Abinadi mujikija mêyi â wakabambila ne: Nudi balongesha bantu aba bua batangila bua kuenza bintu ebi bua kulama mikenji eyi anyi?

26 Ndi nnuambila ne, To; bualu bu nuenu balongesha, Mukalenga kavua wenza ne ndua ne ngamba ku Nyuma bibi bitangila bantu aba to.

27 Ne mpindiewu nuvua nuamba ne lupandu ludi luluila ku mikenji ya Mose. Ndi nnuambila ne bidi bikengedibua bua mpindiewu ne nulama mikenji ya Mose; kadi ndi nnuambila ne, diba nedilua pikalabi kabiyi bikengedibua bua kulama mikenji ya Mose to.

28 Ne menamena kabidi, ndi nnuambila ne, lupandu kaluena luluila ku mikenji nkayayi to; ne bu kabiyi bua bupikudi buenza Nzambi nkayenda bua mibi ne malu mabi a bantu benda, bavua ne tshia kufua kakuyi diepuka to, nansha bua mikenji ya Mose.

29 Ne mpindiewu ndi nnuambila ne bivua bikengedibua ne kuikala mikenji mipeshibua kudi bana ba Isalele, eyowa, mena mikenji mikola menamena; bualu bavua bantu ba nshingu mîminyina, benji ba malu mabi lukasa, ne ba lujoku bua kuvuluka Mukalenga Nzambi wabu;

30 Bua nanku Nzambi wakabapesha mikenji, eyowa, mikenji ya midimu ne milulu, mikenji ivuabu ne tshia kulama ne bushuwa menamena ku dituku ne ku dituku, bua kuikalabu bavuluka Nzambi ne mudimu wabu kudiye.

31 Kadi monayi, ndi nnuambila ne bintu bionsu ebi bivua bifuanyikiji bia bintu bilualua.

32 Ne mpindiewu, bakumvua mikenji anyi? Ndi nnuambila ne, To, kabakumvua bonsu mikenji to; ne bivua nanku bua bupapa bua mitshima yabu; bualu kabakumvua ne muntu nansha umua kavua mua kupandishibua to pa kumbusha bikala ku disungila dia Nzambi.

33 Bualu monayi, Mose kakamba ku Nyuma kudibu bitangila dilua dia Mashiya, ne ne Nzambi neasungila bantu benda to anyi? Eyowa, ne mena bambi bonsu bavua bakamba ku Nyuma katshia buloba buabanga—kabakakula bia bungi anyi bikesa bitangila malu â anyi?

34 Kabavua bamba ne Nzambi nkayenda nealua panshi munkatshi mua bana ba bantu, ne neangata tshimfuanyi tshia muntu, ne neaya ne bukola bunena pa mpala wa buloba anyi?

35 Eyowa, ne kabavua bamba kabidi ne neavuija dibika ku lufu dia bafua, ne ne yeya, nkayenda, neakengeshibua ne neatatshishibua anyi?