1 Mema, Zenife, mulongeshibua mu muakulu onsu wa Bena Nefi, ne muikala ne dimanya dia bulaba bua Nefi, anyi bulaba bua bupianyi bua diambedi bua batatuetu, ne mutumibua bu mutentekedi munkatshi mua Bena Lamana bua kutentekela bukola buabu, bua musumba wetu wa basalayi ulua kudibu ne ubabutula—kadi panakamona bintu bivua bimpa munkatshi muabu ngakajinga ne kababutuki to.

2 Bua nanku, ngakakokangana ne bana betu mu tshipela, bualu mvua musua ne mukôkeshi wetu atua nabu ndondu; kadi bu muvuaye muntu wa tshinyangu ne mukebi wa kumatshisha kua mashi a bantu wakela mukenji ne banshipa; kadi ngakapandishibua kupitshila ku dimatshisha dia mashi a bungi a bantu avua mitshikishibua; bualu tatu wakaluisha muanenda, ne muana wa baluma muanabu wa baluma, tô ne pakabutuka bantu ba bungi ba musumba wetu wa basalayi mu tshipela; ne bamua betu bavua bepeleshibua, tuakapingana ku bulaba bua Zalahemela bua kuambila bakaji babu ne bana babu.

3 Ne kabidi, bulua mvua ne lukunukunu lupita bua kupiana bulaba bua batatuetu, ngakasangisha bonsu bavua bajinga kuya kuasa mu bulaba, ne tuakabanga luendu luetu kabidi batangila mu tshipela bua kubanda ku bulaba; kadi tuakatûtshibua ne tshiyola ne ntatu mikola; bualu katuvua tuvuluka Mukalenga Nzambi wetu to.

4 Nansha nanku, kunyima kua matuku a bungi batambakana mu tshipela, tuakâsa ntenta yetu pa muaba uvua bana betu bashipibua, udi pabuipi ne bulaba bua batatuetu.

5 Ne biakalua ne ngakaya kabidi ne baluma banayi ba ku bantu banyi mu tshimenga, kudi mfumu, bua mema kumanya meji a mfumu, ne bua mema kumanya ne ndi mua kuyamu ne bantu banyi ne kuasa mu bulaba mu ditalala.

6 Ne ngakaya kudi mfumu, ne wakenza tshipungidi nanyi ne ndi mua kuasa mu bulaba bua Lehi-Nefi, ne bulaba bua Shiloma.

7 Ne wakela mukenji kabidi ne bantu benda bapatuka mu bulaba, ne mema ne bantu banyi tubuela mu bulaba bua tuasamu.

8 Ne tuakabanga kuasa nzubu, ne kuakaja bimanu bia tshimenga, eyowa, mena bimanu bia tshimenga tshia Lehi-Nefi, ne tshimenga tshia Shiloma.

9 Ne tuakabanga kudima bulaba, eyowa, mena ne mishindu yonsu ya mamînu, ne mamînu a matala, ne mamînu a mponda, ne mamînu a orge, ne ne neas, ne ne sheum, ne ne mamînu a bimuma bia mishindu yonsu; ne tuakabanga kuvulangana ne kulubuluka mu bulaba.

10 Mpindiewu tshivua budimu ne dikazamuka dia mfumu Lamana, bua kubueja bantu banyi mu bupika, buakafilaye bulaba bua tuasamu.

11 Bua nanku biakalua ne, kunyima tuetu basomba mu bulaba bua mutantshi wa bidimu dikumi ne bibidi, mfumu Lamana wakabanga kutshina, ne mu mushindu mukuabu bantu banyi kabalu kukolakana mu bulaba, ne Bena Lamana kabalu mua kubatamba bukola nekubabueja mu bupika to.

12 Mpindiewu bavua bafuba ne bantu batendeledi ba mpingu; bua nanku bavua bajinga kutubueja mu bupika, bua basankisha budiavi buabu ku midimu ya bianza bietu; eyowa, bua badidisha ne disanka pa mitu ya bisumbu bia bimuna bia mu madimi etu.

13 Bua nanku biakalua ne mfumu Lamana wakabanga kusonsola bantu benda bua ne bakokangana ne bantu banyi; bua nanku kuakabanga kuikala mvita ne makokangana mu bulaba.

14 Bualu, mu tshidimu tshia dikumi ne tshisatu tshia bumfumu buanyi mu bulaba bua Nefi, kula pabuipi ne tshitupa tshia sude tshia bulaba bua Shiloma, pavua bantu banyi banuisha bisumbu bia bimuna biabu mâyi ne babidisha, ne badima maloba abu, musumba wa bungi wa Bena Lamana wakalua kudibu ne wakabanga kubashipa, ne kubanyenga bisumbu bia bimuna biabu ne matala a mu madimi abu.

15 Eyowa, ne biakalua ne bonsu bavua bapita Bena Lamana ku lubilu bakanyema, mena ku tshimenga tshia Nefi, ne bakambikila bua kubakuba.

16 Ne biakalua ne ngakabapaya ne mata, ne ne miketa, ne miela ya mvita, ne ne tuela tua mvita, ne ne bibonga, ne ne bieledi, ne ne biluilu bia mishindu yonsu bituvua benza, ne mema ne bantu banyi tuakaya kuluangana ne Bena Lamana.

17 Eyowa, ku bukola bua Mukalenga, tuakaya kuluangana ne Bena Lamana; bualu mema ne bantu banyi tuakabila ne bukitu kudi Mukalenga bua ne atupatuisha mu bianza bia bena lukuna betu, bualu tuakavuluka dipatuishibua dia batatuetu.

18 Ne Nzambi wakumvua mbila yetu ne wakitaba masambila etu; ne tuakaya ne bukola buenda; eyowa, tuakaya kuluangana ne Bena Lamana, ne mu dituku dimua ne butuku bumua tuakashipa binunu bisatu ne makumi asatu; tuakabashipa mena tô ne patuakabipata mu bulaba buetu.

19 Ne mema, nkayanyi, ne bianza bianyi nkayanyi, ngakambuluisha bua kujîka bafua babu. Ne monayi, tuvua ne kanyinganyinga kakola ne muadi bualu bana betu nkama ibidi ne makumi muanda muteketa ne tshitema bavua bashipibua.