1 Mpindiewu kuvua muaba mu Shemelona kuvua bana ba bakaji ba Bena Lamana badisangisha pamua bua kuimbabu misambu, ne bua kujabu maja, ne bua kutshionkomokabu.

2 Ne biakalua ne kuvua dimua dituku bungi bukesa bua munkatshi muabu buvua budisangisha pamua bua kuimbabu misambu ne kujabu maja.

3 Ne mpindiewu bakuidi ba mfumu Noa, bualu bavua ne bundu bua kupingana ku tshimenga tshia Nefi, eyowa, ne bavua batshina kabidi ne bantu bavua mua kubashipa, bua nanku kabakakima kupingana kudi bakaji babu ne bana babu to.

4 Ne bualu bavua bashala mu tshipela, ne bualu bavua bajandula bana ba bakaji ba Bena Lamana, bakasokoma ne bakabatentekela;

5 Ne pavuaku amu bakesa babu badisangisha pamua bua kuja maja, bakuidi ba mfumu Noa bakapatuka mu miaba yabu ya musokoku, ne bakabakuata ne bakaya nabu mu tshipela; eyowa, bakaya ne makumi abidi ne banayi ba ku bana ba bakaji ba Bena Lamana mu tshipela.

6 Ne biakalua ne pakamanya Bena Lamana bana babu ba bakaji bavua bajimina, bakafîkila bantu ba Limihi tshiji, bualu bakela meji bavua bantu ba Limihi ki bavua bîba bana babu ba bakaji.

7 Bua nanku bakatuma misumba yabu ya basalayi; eyowa, mfumu yeya muina mena wakaya kumpala kua bantu benda; ne ku bakaya ku bulaba bua Nefi bua kubutula bantu ba Limihi.

8 Ne mpindiewu Limihi wakabajanduila ku kaleya, wakajandula mena bulongolodi buabu bonsu bua mvita; bua nanku wakasangisha bantu benda pamua, ne bakasokoma babindila mu madimi ne mu metu.

9 Ne biakalua ne pakabanda Bena Lamana, bantu ba Limihi bakabanga kudiela kudibu kumbukila ku miaba yabu ya tshindilu, ne bakabanga kubashipa.

10 Ne biakalua ne mvita yakalua mikola menamena, bualu bakaluangana bu mudi ntambua bua tshiakudia tshiayi.

11 Ne biakalua ne bantu ba Limihi bakabanga kupingaja Bena Lamana panyima pabu; kadi kabavua nansha tshia bibidi tshia bungi bua Bena Lamana to. Kadi bakaluangana bua mioyo yabu, ne bua bakaji babu, ne bua bana babu; bua nanku bakenza bukola buabu bonsu ne bakaluangana bu mudi mpupuji.

12 Ne biakalua ne bakasangana mfumu wa Bena Lamana munkatshi mua bungi bua bafua babu; kadi kavua mufua to, kadi bantu ba Limihi bavua bamutapa ne Bena Lamana bavua bamushiya panshi, bualu kunyema kua bantu benda kuvua kukola.

13 Ne bantu ba Limihi bakamukuata ne bakasuika mputa yenda, ne bakalua nenda kumpala kua Limihi, ne bakamba ne: Mona, ewu ki mfumu wa Bena Lamana; uvua mupona munkatshi mua bafua babu bualu uvua mutapika mputa, ne bavua bamushiya; ne mona, tudi balua nenda kumpala kueba; ne mpindiewu tumushipayi.

14 Kadi Limihi wakabambila ne: kanumushipi to, kadi luayi nenda apa bua mmumona. Ne bakalua nenda. Ne Limihi wakamuambila ne: Tshiena bualu kayi tshiwudi natshi bua kulua kuela bantu banyi mvita? Mona, bantu banyi kabena bashipa mutshipu umvua muela kûdi to; kadi, bua tshinyi udi ushipa mutshipu uwuvua muela kudi bantu banyi?

15 Ne mpindiewu mfumu wakamba ne: ngashipi mutshipu bualu bantu beba mbambula bana ba bakaji ba bantu banyi; bua nanku, mu tshiji tshianyi mvua muvuija bantu banyi bua kuelabu bantu beba mvita.

16 Ne mpindiewu Limihi kavua mumvua tshintu nansha tshimua bitangila bualu ebu to, bua nanku wakamba ne: nenkeba munkatshi mua bantu banyi ne ewu yonsu udi muenza bualu ebu neafua. Bua nanku wakakebeja munkatshi mua bantu benda.

17 Mpindiewu pakumvua Gideona bintu ebi, yeya muikala kapita ka mfumu wakasemena kumpala ne wakambila mfumu ne: ndi nkusengelela ne indila, kukadi bantu aba to, anyi kubapeshi tshilema etshi to.

18 Bualu kuena uvuluka bakuidi batatueba, bavua bantu aba bakeba bua kushipa anyi? Ne kabena mu tshipela anyi? Ne ki mbobu badi bîba bana ba bakaji ba Bena Lamana anyi?

19 Ne mpindiewu, mona, ambila mfumu bintu ebi, bua ambila bantu benda bua bikala ne ditalala kutudi; bualu mona bakadi badilongolola bua kulua kutubunda; ne mona kabidi tudi amu bakesa.

20 Ne mona, badi balua ne misumba yabu ya bungi; ne pa kumbusha mfumu mubatalaja kutudi tudi ne tshia kubutuka.

21 Bualu mêyi avua Abinadi muamba ku Nyuma bua bubi buetu ka’ena makumbana anyi?—ne bionsu ebi bualu tuakabenga kumvuila mêyi a Mukalenga, ne kulekela malu mabi etu to anyi?

22 Ne mpindiewu tutalajayi mfumu, ne tukumbajayi mutshipu utuvua batshipa kudiye; bualu bidi bimpa bipita bua tuikala mu bupika pamutu pa tuetu kujimija mioyo yetu; bua nanku, tulekelayi dimatshisha dia mashi a bungi nanku.

23 Ne mpindiewu Limihi wakambila mfumu bintu bionsu bivua bitangila tatuenda, ne bakuidi bavua banyema mu tshipela, ne wakabapesha tshilema tshia diambula dia bana ba bakaji babu.

24 Ne biakalua ne mfumu wakatalala kudi bantu ba Limihi; ne wakabambila ne: Tuyayi kusambakena ne bantu banyi, kanuyi ne biluilu bia mvita to; ne ndi nditshipa ne mutshipu ne bantu banyi kabakushipa bantu beba to.

25 Ne biakalua ne bakalonda mfumu, ne bakaya kabayi ne biluilu bia mvita to bua kusambakena ne Bena Lamana. Ne biakalua ne bakasambakena ne Bena Lamana; ne mfumu wa Bena Lamana wakinama kumpala kuabu, ne wakabasengelela bua bantu ba Limihi.

26 Ne pakamona Bena Lamana bantu ba Limihi, ne kabavua ne biluilu bia mvita to, bavua ne dibumvuila moyo wa lusa ne bakatalala kudibu, ne bakapingana ne mfumu wabu ne ditalala ku bulaba buabu.