1 Ne mpindiewu, biakalua ne pakajikija mfumu Benyamina kuakula mêyi avua muanjelu wa Mukalenga mumupesha, ne wakakupa mesu enda ku mpenga yonsu kudi musumba wa bantu, ne monayi bavua bapona pa buloba, bualu ditshina dia Mukalenga diakalua kudibu.

2 Ne bakadimona ngikadilu wabu wa mu mubidi, mena mushadila kupita lupuishi lua buloba. Ne bakabila bikola ne dîyi dimua, bamba: Ô fua lusa, ne enzela mashi a bupikudi bua Kilisto bua tupeta dibuikidila dia mibi yetu, ne mitshima yetu ikezudibua; bualu tudi tuitabuija Yezu Kilisto, Muana wa Nzambi, wakafuka diûlu ne buloba, ne bintu bionsu; wapueka munkatshi mua bana ba bantu.

3 Ne biakalua ne kunyima kua bakula mêyi â Nyuma wa Mukalenga wakalua kudibu, ne bakuwjibua ne disanka, bakapeta dilekedibua dia mibi yabu, ne bavua ne ditalala mu meji, bua ditabuija ditamba bunena divuabu nadi kudi Yezu Kilisto walua, bilondeshila ku mêyi avua mfumu Benyamina mubambila.

4 Ne mfumu Benyamina wakabulula mukana muenda kabidi ne wakabanga kubambila, wamba: Balunda banyi ne bana betu, tshisa tshianyi ne bantu banyi, ndi ndomba kabidi nuteleja, ne numvua ne numvua bishadila bia mêyi anyi anganuambila.

5 Bualu monayi, bu dimanya dia buimpa bua Nzambi musangu ewu dinusaka ku dimanya dia naka wenu, ne ngikadilu wenu wa dipanga dia mushinga ne dipona—

6 Ndi nnuambila, panudi balua ku dimanya dia buimpa bua Nzambi, ne bukola buenda budi kabuyi kufuanyikija to, ne lungenyi luenda, ne ditukija dienda, ne bulekelelu buenda kudi bana ba bantu; ne kabidi, bupikudi buvua bulongolodibua kumbukila ku tshishimikidi tshia buloba, bua kudibu lupandu lulua kudi udi uteka tshieyemenu tshienda kudi Mukalenga, ne udi munanukidi mu dilama dia mikenji yenda, ne utungunuka mu ditabuija, mena tô ne ku ndekelu kua moyo wenda, ndi ngamba ne, moyo wa mubidi wa tshifuaka—

7 Ndi ngamba ne ewu ki muntu udi upeta lupandu, ku njila wa bupikudi buvua bulongolodibua kumbukila ku tshishimikidi tshia buloba bua bukua bantu bonsu, bonsu bavua bikalaku katshia dipona dia Adama, anyi badiku mpindiewu, anyi bikalaku, mena tô ne ku ndekelu wa buloba.

8 Ne ewu ki mushindu udi lupandu luvua. Ne kakuena lupandu lukuabu to amu elu luvua luambibua; kakuena makumbana makuabu adi muntu bua kupandishibua to amu makumbana andi munuambila.

9 Itabuijayi Nzambi; itabuijayi ne udi ne moyo, ne wakafuka bintu bionsu, bionsu mu diûlu ne pa buloba; itabuijayi ne udi ne lungenyi lonsu, ne bukola bonsu, bionsu mu diûlu ne pa buloba; itabuijayi ne muntu kena umvua bintu bionsu bidi Mukalenga mua kumvua.

10 Ne kabidi, itabuijayi ne nudi ne tshia kukudimuna mutshima wenu ku mibi yenu ne kuyilekela, ne kudipuekesha kumpala kua Nzambi; ne lombayi mu bulelela bua mutshima bua anubuikidila; ne mpindiewu, bu nuenu bitabuija bintu bionsu ebi tangilayi ne nubienza.

11 Ne ndi nnuambila kabidi bu mumvua muamba kumpala, ne bu munudi balua ku dimanya dia butumbi bua Nzambi, anyi bu nuenu bamanya buimpa buenda ne balabula dinanga dienda, ne bapeta dilekedibua dia mibi yenu, bidi bifila disanka dinena menamena mu anyima yenu, mena nanku ndi musua ne nuvuluka, ne diba dionsu nukuatayi mu tshivulukilu tshienu bunena bua Nzambi, ne naka wenu, ne buimpa ne bulekelelu buenda kunudi, nuenu bifukibua bidi kabiyi bikumbana, ne nudipuekesha nansha ne mu ndondu ya didipuekesha, nubikila dîna dia Mukalenga dituku dionsu, ne nuimana ne disuminyina mu ditabuija dia malu adi alua, avua mambibua mu mukana mua muanjelu.

12 Ne monayi, ndi nnuambila ne binuenza nanku nenusanka diba dionsu, ne nuwula ne dinanga dia Nzambi, ne nenulama dilekedibua dia mibi yenu; ne nenukola mu dimanya dia butumbi buenda yeya wakanufuka, anyi mu dimanya dia tshidi tshilulama ne tshilelela.

13 Ne kanuakuikala ne meji a kuenzelangana bibi, kadi a kusomba talala, ne a kupesha muntu yonsu tshintu tshienda.

14 Ne kanuakulekela bana benu bafua nzala to, anyi benda butaka to; anyi kanuakulekela ne basambuka mikenji ya Nzambi to, anyi ne baluangana ne batandangana to, anyi ne basadila diabulu, udi mukalenga wa mibi, anyi udi nyuma mubi uvua batatuetu bamba, yeya udi muena lukuna wa buakana bonsu.

15 Kadi nenubalongesha mua kuenda mu njila ya bulelela ne ya bushindama; nenubalongesha mua kunangangana, ne mua kusadilangana.

16 Ne kabidi, nuenu nkayenu nenuambuluisha badi bakengela diambuluisha dienu; nenupesha bintu bienu kudi udi mupanga; ne kanuakulekela ne mulombi neadila kunudi tshianana to, ne kanumuipatshi bua aya kufua to.

17 Pamuapa newamba: Muntu wakadituadila dikenga dienda; bua nanku ntshiakumôluela diboku dianyi to, ne ntshiakumupesha biakudia bianyi to, anyi ntshiakumupesha bintu bianyi bua kakengi to, bualu bua manyoka enda adi malulama—

18 Kadi ndi nkuambila, Ô muntu, ewu yonsu udi utshienza, yeya udi ne bualu bunena bua kukudimuna mutshima wenda; ne pa kumbusha yeya mukudimuna mutshima ku bivuaye muenza udi ufua bua kashidi, ne kena ne muaba mu bukalenga bua Nzambi to.

19 Bualu monayi, katuena bonsu balombi anyi? Katuena bonsu beyemena kudi Muntu Umua, Nzambi mena, bua bintu bionsu bitudi nabi, bua biakudia ne bilamba, ne bua ngolo, ne mpalata, ne mabanji onsu atudi nawu a mishindu yonsu anyi?

20 Ne monayi, nansha mpindiewu, nudi bikala nubila dîna dienda, ne nudi nulomba dilekedibua dia mibi yenu. Ne udi mulekela ne nulomba kakuyi tshipeta anyi? To; munupumuina Nyuma wenda, ne muwujija mitshima yenu ntenta ne disanka, ne mupuwisha mikana yenu bua kanuakudi, bualu disanka dienu ndipita bunena.

21 Ne mpindiewu, bu Nzambi, wakanufuka, unudi beyemena bua mioyo yenu ne bua bionsu binudi nabi ne tshinudi, unupesha tshionsu tshinudi nulomba tshidi tshiakana, ne ditabuija, bitabuija ne nenupeta, Ô pananku, bu munudi ne bua kupeshangana bimua bia bintu binudi nabi.

22 Ne bu wewa ulumbuluisha muntu udi ukuela dilomba dienda bua bintu bieba bua kafu to, ne umupîsha, dipîsha dieba nedikala dilulama bualu wamupadi bintu bieba, bidi kabiyi bieba to kadi bia Nzambi, yeya udi kabidi muena moyo weba; ne kadi kuakuela dilomba to, anyi kuakukudimuna mutshima bua biwudi muenza to.

23 Ndi nnuambila, diakabi dikala kudi muntu awu, bualu bua bintu bienda bifua nenda; ne mpindiewu, ndi ngamba bintu ebi kudi bonsu badi babanji mu bintu bia pa buloba ebu.

24 Ne kabidi, ndi ngambila bapela, nuenu badi kanuyi nabi ne kadi nudi nabi bikumbana, bua kudia ku dituku ne ku dituku; ndi musua kuamba ne nuenu bonsu badi bapala mulombi, bualu kanuena nabi; ndi musua ne nuamba mu mitshima yenu ne: Ntshiena mpesha to bualu ntshiena natshi, kadi bu mema natshi mvua mua kupesha.

25 Ne mpindiewu, binuamba nanku mu mitshima yenu nudi nushala kanuyi ne dipîla to, tshianana nudi bapîshibua; ne dipîshibua dienu didi dilulama, bualu nudi nualakana tshinudi kanuyi natshi to.

26 Ne mpindiewu, bua bualu bua bintu binganuambidi ebi—buena kuamba ne, bua bualu bua kulama dilekedibua dia mibi yenu ku dituku ne ku dituku, ne kuenda kanuyi bapîla to kumpala kua Nzambi—ndi musua ne nuabanya bimua bia bintu bienu kudi bapela, muntu yonsu bilondeshila bidiye nabi, bu bua kudisha badi ne nzala, kuvuadisha badi butaka, kukumbula babêdi ne kubapesha diambuluisha diabu, bionsu mu nyuma ne mu mubidi, bilondeshila ku bidibu bapangila.

27 Ne tangilayi ne malu onsu â adi enjibua mu lungenyi ne bulongama; bualu kabiena bikengedibua ne muntu anyema lubilu kupita makanda adiyi nawu to. Ne kabidi, bidi bikengedibua ne ikala ne dinanukila, nanku bua apetelaku tshia lumbandi; bua nanku, malu onsu adi ne tshia kuenjibua mu bulongama.

28 Ne ndi musua ne nuvuluka, ne ewu yonsu munkatshi muenu udi usomba tshintu tshia mukuenda, avua ne bua kupingaja tshintu tshivuaye musomba, bilondeshila muvuaye muitaba, anyi kabiyi nanku to newenza mibi; ne pamuapa newenzeja mukueba mibi kabidi.

29 Ne bua kujikija, ntshiena bua kunuambila bintu bionsu bidi bua kunuenzeja mibi to; bualu kudi njila ne mishindu mishilangana, mena ya bungi mundi ntshiyi mua kuyibala to.

30 Kadi bionsu bindi mua kunuambila ne, binuapanga kudilama, ne meji enu, ne mêyi enu, ne bienzedi bienu, ne kulama mikenji ya Nzambi, ne kutungunuka mu ditabuija dia binuakumvua bitangila dilua dia Mukalenga wetu, mena ne ku ndekelu kua mioyo yenu, nudi ne tshia kufua. Ne mpindiewu, Ô muntu, vuluka, ne kufu to.