1 Mpindiewu biakalua ne kunyima kua bana ba baluma ba Mosiya benza bintu bionsu ebi, bakangata bantu bungi bukesa ne bakapingana nabu kudi tatuabu, mfumu, ne bakajinga ne abanyishila bua baya, ne bavuabu basungula, ku bulaba bua Nefi bua bayisha bintu bivuabu bumvua, ne bua bapesha bana babu, Bena Lamana, dîyi dia Nzambi—

2 Bua pamuapa bavua mua kubaluisha ku dimanya dia Mukalenga Nzambi wabu, ne kubitabujija bitangila malu mabi a batatuabu; ne bua pamuapa bavua mua kubajikijija lukinu luvuabu nalu kudi Bena Nefi, bua kabidi kubasankishabu mu Mukalenga Nzambi wabu, bua kuluabu ne bulunda muntu kudi mukuabu, ne bua kakuikadi kabidi makokangana mu bulaba bonsu buvua Mukalenga Nzambi wabu mubapesha to.

3 Mpindiewu bavua bajinga ne lupandu lumanyishibua kudi tshifukibua tshionsu, bualu kabavua mua kuitaba ne muntu nansha umua afua to; eyowa, meji mena ne muntu umua akenga mpaji kayiyi ndekelu avua abakankisha ne abazakeja.

4 Ne ki muvua Nyuma wa Mukalenga udileja kudibu nanku, bualu bavua benji ya mibi babi ba menamena. Ne Mukalenga wakamona bikumbana mu lusa luenda ludi kaluyi ndekelu to bua kubepelesha; nansha nanku, bakakenga bikola ne dipampakana dia anyima bua malu mabi abu, bakenga bia bungi ne batshina bua kuimanshibua bua kashidi.

5 Ne biakalua ne bakasengelela tatuabu matuku a bungi ne baya ku bulaba bua Nefi.

6 Ne mfumu Mosiya wakaya ne wakebeja Mukalenga ne uvua ne bua kulekela bana benda ba baluma baya munkatshi mua Bena Lamana bua kuyisha dîyi.

7 Ne Mukalenga wakambila Mosiya ne: Balekela baya, bualu bangi ne bitabuija mêyi abu, ne nebapeta moyo wa tshiendelela; ne nempatuisha bana beba mu bianza bia Bena Lamana.

8 Ne biakalua ne Mosiya wakanyisha bua baya ne benza bilondeshila ku dilomba diabu.

9 Ne bakâsa luendu luabu mu tshipela bua kuya kuyisha dîyi munkatshi mua Bena Lamana; ne nemfunda mulubu wa bienzedi biabu kunyima.

10 Mpindiewu mfumu Mosiya kavua ne muntu wa kuambikila bukalenga to, bualu kakuvua nansha umua wa ku bana benda ba baluma uvua witaba bukalenga to.

11 Bua nanku wakangata miandiku ivua mikanunyibua pa bitata bia kalabi, ne bitata bia Nefi kabidi, ne bintu bionsu bivuaye mulama ne bivuaye mukuba bilondeshila ku mikenji ya Nzambi, kunyima kua kuandamuna ne kufundisha miandiku ivua pa bitata bia ngolo bivua bantu ba Limihi bangula, bivua bimufila ku tshianza tshia Limihi;

12 Ne wakenza nanku bua dipampakana dikola dia bantu benda; bualu bavua bajinga kupita tshipimu bua kumanya bitangila bantu bavua babutuka.

13 Ne mpindiewu wakabiandamuna ku diambuluisha dia mabua abidi avua masuikakaja munda mua bikuatshidi bibidi bia buta.

14 Mpindiewu bintu ebi bivua bilongolola kumbukila ku mbangilu, ne bavua babipesha tshikondu ne tshikondu, kipatshila ka kuandamuna miakulu;

15 Ne tshianza tshia Mukalenga tshivua tshibilama ne tshibikuba, bua ne aleja malu mabi ne malu mapita bubi a bantu benda kudi tshifukibua tshionsu tshiâsa mu bulaba;

16 Ne ewu yonsu udi ne bintu ebi udi ubikidibua ne mumonyi, ku mushindu wa kala.

17 Mpindiewu kunyima kua Mosiya mujikija kuandamuna miandiku eyi, monayi, ivua ilonda mulubu wa bantu bavua babutuka, katshia ku tshikondu tshivuabu babutuka kupingana panyima tô ne ku dibaka dia kaleya kanena, mu tshikondu tshivua Mukalenga mubuejakaja muakulu wa bantu ne bakatangalajibua kula pa mpala wa buloba bonsu, eyowa, ne kupingana panyima mena tô ne ku tshikondu tshia bufuki bua Adama.

18 Mpindiewu mulubu ewu wakadidisha bantu ba Mosiya menamena, eyowa, bavua buwula ntenta ne kanyinganyinga; nansha nanku wakabapesha dimanya dia bungi, tshiakabasankisha.

19 Ne mulubu ewu neufundibua kunyima; bualu monayi, bidi bikengedibua ne bantu bonsu bamanya malu adi mafundibua mu mulubu ewu.

20 Ne mpindiewu, bu mumvua munuambila, kunyima kua mfumu Mosiya muenza bintu ebi, wakangata bitata bia tshiamua tshia kalabi, ne bintu bionsu bivuaye mulama, ne mubiambikila Alama, uvua muana wa baluma wa Alama; eyowa, miandiku yonsu, ne kabidi biandamunyi bia miakulu, ne wakamuambikilabi, ne wakamuelela mukenji ne abilama ne abikuba, ne atungunuka ne kufunda miandiku ya bantu penda, bua kubishila ku lukongu lua bantu lumua ne lukuabu, mena bu muvuabi bishiya katshia ku tshikondu tshivua Lehi mumbuka ku Yelushalema.