1 Ne mpindiewu, biakalua ne Alama, uvua munyema basadidi ba mfumu Noa, wakakudimuna mutshima ku mibi ne malu mabi enda, ne wakendakana mu musokoku munkatshi mua bantu, ne wakabanga kulongesha mêyi a Abinadi—

2 Eyowa, bitangila malu atshivua kulua, ne kabidi bitangila dibika dia bafua, ne disungila dia bantu, divua bua kumvuijibua ku bukola, ne makenga, ne lufu lua Kilisto, ne dibika ne dibanda dienda mu diûlu.

3 Ne wakalongesha bantu bonsu bavua basua kuteleja dîyi dienda. Ne wakalongesha mu musokoku, bua ne kabilu ku dimanya dia mfumu to. Ne bangi bakitabuija mêyi enda.

4 Ne biakalua ne bantu bonsu bakamuitabuija bakaya ku muaba uvua ubikidibua ne Molomo, uvua muinyika dîna dia mfumu, uvua ku mikalu ya bulaba buvua buwula ne nyama ya dîtu ku misangu ne ku bikondu.

5 Mpindiewu, kuvua mushimi wa mâyi makezuka ku Molomo, ne Alama wakayaku, bualu kuvua tshipuka tshia mitshi mikesa tshivua pabuipi ne mâyi, muvuaye kudisokoka munda munya ku dimukebejija dia mfumu.

6 Ne biakalua ne bantu ba bungi bakamuitabuija bakayaku bua kuteleja mêyi enda.

7 Ne biakalua ne kunyima kua matuku a bungi kuvua bantu ba bungi basangishibua pamua ku muaba wa Molomo, bua kumvua mêyi a Alama. Eyowa, bonsu bavua bitabuija dîyi dienda bavua basangishibua pamua bua kumuteleja. Ne yeya wakabalongesha, ne wakabayisha bitangila dikudimuna dia mutshima, ne disungila, ne ditabuija dia Mukalenga.

8 Ne biakalua ne yeya wakabambila ne: Monayi, mâyi a Molomo ngowu â (bualu avua abikidibua nanku) ne mpindiewu, bu munudi nujinga kubuela mu tshisumbu tshia mikoko tshia Nzambi, ne bua kubikidibua bantu benda, ne bitaba bua kuambuilangana majitu enu, bua ô ikala mapepela;

9 Eyowa, ne nudi bitaba bua kudila ne badi badila; eyowa, ne kusamba badi ne dijinga dia disamba, ne kuikala bajadiki ba Nzambi diba dionsu, mu bintu bionsu, ne mu miaba yonsu inudi mua kuikala mu, mena tô ne ku lufu, bua nuenu kusungidibua kudi Nzambi, ne kubadibua munkatshi mua bena dibika dia ku lufu dia kumpala, bua nuenu kupeta moyo wa tshiendelela—

10 Mpindiewu ndi nnuambila, bikala edi didi dijinga dia mitshima yenu, ntshinyi tshidi tshinukandika bua kutambuishibua mu dîna dia Mukalenga, bu njadikilu kumpala kuenda ne nudi babuela nenda mu tshipungidi, ne nenumusadila ne nenulama mikenji yenda, bua ne anupumuina Nyuma wenda bivula kupita?

11 Ne mpindiewu pakumvua bantu mêyi â, bakatûta bikashi bua disanka, ne kutua tshikemu, bamba ne: Edi ndijinga dia mitshima yetu.

12 Ne mpindiewu biakalua ne Alama wakangata Helama, uvua muikala muntu wa kumpala, ne wakaya ne wakimana mu mâyi, ne wakabila, wamba ne: Ô Mukalenga, upumuina musadidi weba Nyuma weba bua enza mudimu ewu ne bunsantu bua mutshima.

13 Ne pakambaye mêyi â, Nyuma wa Mukalenga uvua pa mutu penda, ne wakamba ne: Helama, ndi nkutambuisha, mmundi ne bukôkeshi bufuma kudi Nzambi wa Bukitu Bonsu, bu mu bujadiki ne nuabuedi nenda mu tshipungidi tshia kumusadila tô ne panudi nufua lufu mu mubidi wa tshifuaka; ne Nyuma wa Mukalenga apumunyibua pa mutu penu; ne Yeya akupesha moyo wa tshiendelela, ku disungila dia Kilisto, wakalongololaye katshia ku tshishimikidi tshia buloba.

14 Ne kunyima kua Alama muamba mêyi â, bubidi buabu, Alama ne Helama bakadijîka mu mâyi; ne bakatundubuka ne bakapatuka mu mâyi ne disanka, buwula ne Nyuma.

15 Ne kabidi, Alama wakangata muntu mukuabu, ne wakaya tshiakabidi mu mâyi, ne wakamutambuisha momumua ne wa kumpala, kadi kakadijîka kabidi mu mâyi to.

16 Ne wakatambuisha yonsu wakalua ku muaba wa Molomo mushindu ewu; ne bavua bungi pabuipi ne bantu nkama ibidi ne inayi; eyowa, ne bakatambuishibua mu mâyi a Molomo, ne bakuwujibua ne ngâsa wa Nzambi.

17 Ne bakabikidibua ne ekelezia wa Nzambi, anyi ekelezia wa Kilisto, kubangila diba adi tô ne matuku akalonda. Ne biakalua ne ewu yonsu wakatambuishibua ku bukola ne bukôkeshi bua Nzambi wakasakidibua ku ekelezia wenda.

18 Ne biakalua ne Alama, bualu uvua ne bukôkeshi bufuma kudi Nzambi, wakajidila bakuidi; wakajidila mena muakuidi umua bua bantu makumi atanu bua kubayisha, ne bua kubalongesha bitangila bintu bia bukalenga bua Nzambi.

19 Ne wakabelela mukenji ne kabalongeshi tshintu tshikuabu to amu bintu bivuaye mulongesha, ne bivua bambi bansantu bakula ne mukana muabu.

20 Eyowa, wakabelela mukenji mena ne kabayishi tshintu tshikuabu to amu dikudimuna dia mutshima ne ditabuija kudi Mukalenga, uvua musungila bantu benda.

21 Ne wakabelela mukenji ne kakuikadi dikokangana kudi muntu ne mukuenda to, kadi ne batangila kumpala ne kipatshila kamua, bikala ne ditabuija dimua ne ditambuisha dimua, bikala ne mitshima yabu misuikakaja pamua mu bobumua ne mu dinanga dia muntu bua mukuenda.

22 Ne ki muakabelelaye mukenji bua kuyishabu nanku. Ne ki muakaluabu bana ba Nzambi nanku.

23 Ne wakabelela mukenji ne basekelela dituku dia sabata, ne badijidila, ne bela kabidi Mukalenga Nzambi wabu tuasakidila dituku dionsu.

24 Ne wakabelela mukenji kabidi ne bakuidi bavuaye mujidila benza mudimu ne bianza biabu bua dikuatshisha diabu.

25 Ne kuvua dituku dimua mu lumingu lonsu divuabu basungula bua bikala ne bua kudisangisha pamua bua kulongeshabu bantu, ne bua kutendelelabu Mukalenga Nzambi wabu, ne kabidi, misangu yonsu ivuabi mu bukôkeshi buabu, bua kudisangisha pamua.

26 Ne bakuidi kabavua beyemena kudi bantu bua dikuatshisha diabu to; kadi bavua ngâsa wa Nzambi bua mudimu wabu, bua ne bakolakana mu Nyuma, bikala ne dimanya dia Nzambi, bua kulongeshabu ne bukola ne bukôkeshi bufuma kudi Nzambi.

27 Ne Alama wakabelela mukenji kabidi ne bantu ba mu ekelezia bafila bimua bia bintu biabu, muntu yonsu bilondeshila ku bivuaye nabi; padiye ne bintu bivula, udi ne bua kufila bivula kupita, ne ewu udi ne bikesa, badi ne bua kumulomba bikesa; ne udi kayi ne tshintu to, badi ne bua kumupesha.

28 Ne nanku badi ne bua kufila bimua bia bintu biabu ne mutshima wabu musua ne majinga abu mimpa kudi Nzambi, ne kudi bakuidi bavua kabayi nabi to, eyowa, ne kudi mukengi yonsu, muntu udi butaka.

29 Ne wakabambila nanku, bualu Nzambi uvua mumuelela mukenji; ne bakenda bôloloka kumpala kua Nzambi, bapeshangana bintu bia pa buloba ne bia mu nyuma bilondeshila ku bikengelu ne ku majinga abu.

30 Ne mpindiewu biakalua ne bionsu ebi bivua bienjibua mu Molomo, eyowa, pabuipi ne mâyi a Molomo, mu dîtu divua pabuipi ne mâyi a Molomo; eyowa, muaba wa Molomo, mâyi a Molomo, dîtu dia Molomo, bu mudibi bilengela ku mesu a bakafika ku dimanya dia Musungidi wabu; eyowa, ne bu mudibu babeneshibua, bualu nebimba bua butumbi buenda kashidi.

31 Ne bintu ebi bivua bienzejibua ku mikalu ya bulaba, bua ne kabilu ku dimanya dia mfumu to.

32 Kadi monayi, biakalua ne mfumu, bualu uvua mujandula ditambakana munkatshi mua bantu, wakatuma basadidi benda bua kubatentekela. Bua nanku mu dituku divuabu badisangisha pamua bua kuteleja dîyi dia Mukalenga bakajandudibua kudi mfumu.

33 Ne mpindiewu mfumu wakamba ne Alama udi usonsola bantu ku dimutombokela; bua nanku wakatuma musumba wenda wa basalayi bua kubabutula.

34 Ne biakalua ne bakamanyisha Alama ne bantu ba Mukalenga dilua dia musumba wa basalayi wa mfumu; bua nanku ebu bakangata ntenta yabu ne mêku abu ne bakaya mu tshipela.

35 Ne bavua bantu pabuipi ne nkama inayi ne makumi atanu.