1 Ne biakalua ne musumba wa basalayi wa mfumu wakapingana, kunyima kua kukeba bantu ba Mukalenga kabayi babapeta to.

2 Ne mpindiewu monayi, misumbua ya basalayi ya mfumu ivua mikesa, bualu lufu luvua lubikepesha, ne kuakabanga kuikala ditapuluka munkatshi mua bantu bavua bashala.

3 Ne tshisumbu tshivua tshipita bukesa tshiakabanga kukanyina mfumu, ne kuakabanga kuikala dikokangana dinena munkatshi muabu.

4 Ne mpindiewu kuvua muntu munkatshi muabu uvua dîna ne Gideona, ne uvua muntu wa makanda ne muena lukuna wa mfumu, bua nanku wakatula muela wenda wa mvita, ne wakaditshipa mu tshiji tshienda ne neashipa mfumu.

5 Ne biakalua ne wakaluangana ne mfumu; ne pakamona mfumu ne uvua pabuipi ne kumutamba bukola, wakâsa lubilu ne wakanyema ne wakabanda pa kaleya kavua pabuipi ne ntempelo.

6 Ne Gideona wakamulondakaja ne uvua pabuipi pa kubanda pa kaleya bua kushipa mfumu, ne mfumu wakakupa mesu enda ku mpenga yonsu ku bulaba bua Shemelona, ne monayi, musumba wa basalayi wa Bena Lamana uvua munda mua mikalu ya bulaba.

7 Ne mpindiewu mfumu wakabila mu dipampakana dia anyima wenda, wamba ne: Gideona, ngepelesha, bualu Bena Lamana badi patudi, ne nebatubutula; eyowa, nebabutula bantu banyi.

8 Ne mpindiewu mfumu kavua uditatshisha bua bantu benda kupita bu bua moyo wenda nkayenda to; nansha nanku, Gideona wakepelesha moyo wenda.

9 Ne mfumu wakelela bantu benda mukenji ne banyema Bena Lamana, ne yeya muina wakaya kumpala kuabu, ne bakanyema mu tshipela, ne bakaji babu ne bana babu.

10 Ne biakalua ne Bena Lamana bakabalondakaja, ne bakabakuata, ne bakabanga kubashipa.

11 Mpindiewu biakalua ne mfumu wakabelela mukenji ne bantu baluma bonsu bashiya bakaji babu ne bana babu, ne banyema Bena Lamana.

12 Mpindiewu kuvua bangi bakabenga kubashiya, kadi bakasungula kushala ne kubutuka nabu. Ne bakashala bakashiya bakaji babu ne bana babu ne bakanyema.

13 Ne biakalua ne bakashala panyima ne bakaji babu ne bana babu bakenzeja ne bana babu ba bakaji balenga bimana kumpala ne basengelela Bena Lamana ne kababashipi to.

14 Ne biakalua ne Bena Lamana bakabumvuila moyo wa lusa, bualu bulenga bua buntu bukaji buabu bua kasankisha mitshima yabu.

15 Bua nanku Bena Lamana bakepelesha mioyo yabu, ne bakabangata bakuatshibu ne kuyabu nabu kupingana nabu ku bulaba bua Nefi, ne bakabanyishila ne bobu kuasabu mu bulaba, bilondeshila ku diumvuangana dia ne nebafila mfumu Noa mu bianza bia Bena Lamana, ne nebafila bintu biabu, mena tshia bibidi tshia bionsu bivuabu nabi, tshia bibidi tshia ngolo yabu, ne mpalata yabu, ne bintu biabu bionsu bia mushinga mukola, ne ki muvuabu ne bua kufuta ku tshidimu ne ku tshidimu mulambu kudi mfumu wa Bena Lamana nanku.

16 Ne mpindiewu kuvua umua wa ku bana ba baluma ba mfumu munkatshi mua bavuabu bangata bakuatshibu, muena dîna ne Limihi.

17 Ne mpindiewu Limihi uvua ujinga bua tatuenda kashipibu to; nansha nanku, Limihi kavua mupanga malu mabi a tatuenda to, bualu yeya muina uvua muntu mululama.

18 Ne biakalua ne Gideona wakatuma bantu mu tshipela mu musokoku, bua kukeba mfumu ne bantu bavua nenda. Ne biakalua ne bakasambakena ne bantu mu tshipela, bonsu pa kumbusha amu mfumu ne bakuidi benda.

19 Mpindiewu bavua baditshipa mu mitshima yabu ne nebapingana ku bulaba bua Nefi, ne bu bakaji babu ne bana babu bashipibua, ne bantu bavua bashala nabu kabidi, bavua bakeba disombuela, ne bavua mua kubutuka nabu pabu.

20 Ne mfumu wakabelela mukenji ne kabapinganyi to; ne bakafîkila mfumu tshiji, ne bakamukengesha, tô ne ku lufu ku kapia.

21 Ne bakavua pabuipi ne kukuata bakuidi pabu ne kubashipa, kadi bobu aba bakanyema kumpala kuabu.

22 Ne biakalua ne bakasambakena ne bantu ba Gideona pakavuabu pabuipi ne kupingana ku bulaba bua Nefi. Ne baluma ba Gideona bakabalondela bionsu bivua bienzekela bakaji babu ne bana babu; ne Bena Lamana bavua babanyishila bua bobu kuasabu mu bulaba mu kufuta Bena Lamana tshitadi tshia nkatshi-nkatshi wa bionsu bivuabu nabi.

23 Ne bantu bakambila baluma ba Gideona ne bavua bashipa mfumu, ne bakuidi benda bavua banyema kula nabu mu tshipela.

24 Ne biakalua ne pakajikijabu milulu, bakapingana ku bulaba bua Nefi, ne disanka, bualu kabavua bashipa bakaji babu ne babu to; ne bakambila Gideona tshivuabu benza mfumu.

25 Ne biakalua ne mfumu wa Bena Lamana wakatshipa kudibu, ne bantu benda kabakubashipa to.

26 Ne Limihi penda, muikala muana wa baluma wa mfumu, muikala ne bukalenga bumuambikila kudi bantu, wakatshipa kudi mfumu wa Bena Lamana ne bantu benda nebafuta mulambu wa tshia bibidi tshia bionsu bivuabu nabi kudiye.

27 Ne ne biakalua ne Limihi wakabanga kushikika bukalenga ne kushikika ditalala munkatshi mua bantu benda.

28 Ne mfumu wa Bena Lamana wakateka balami ku mpenga ya bulaba yonsu, bua kulamaye bantu ba Limihi mu bulaba, bua kabayi mu tshipela to; ne uvua ukuatshisha balami benda ne mulambu uvuaye upeta kudi Bena Nefi.

29 Ne mpindiewu mfumu Limihi uvua ne ditalala ditungunuka mu bukalenga buenda bua mutantshi wa bidimu bibidi, muvua Bena Lamana kabayi babakengesha anyi bakeba bua kubabutula to.