1 Ne biakalua ne kunyima kua mfumu Limihi mujikija kuakula kudi bantu benda, bualu wakabambila bintu bia bungi ne ndi mufunda amu bikesa mu mukanda ewu, wakambila bantu benda bintu bionsu bivua bitangila bana babu bavua mu bulaba bua Zalahemela.

2 Ne wakimanyisha Amona kumpala kua musumba wa bantu, ne wakabambila kabidi bionsu bivua bifikila bana babu katshia diba diakapatuka Zenife mu bulaba tô ne diba diakapatukaye yeya nkayenda mu bulaba.

3 Ne kabidi, wakabalondela mêyi a ndekelu avua mfumu Benyamina mubalongesha, ne wakawumvuija bantu ba mfumu Limihi, bua bumvua mêyi onsu akakulaye.

4 Ne biakalua ne kunyima kua mumana kuenza bionsu ebi, mfumu Limihi wakatangalaja musumba wa bantu, ne wakabapingaja muntu yonsu ku nzubu wenda.

5 Ne biakalua ne wakalombesha bitata bivua ne miandiku ya bantu benda katshia ku tshikondu tshiakumbukabu ku bulaba bua Zalahemela, bua bitekibua kumpala kua Amona, bua abibala.

6 Mpindiewu, katataka pakabala Amona miandiku, mfumu wakamuebeja bikalaye ne uvua mua kuandamuna miakulu, ne Amona wakamuambila ne kavua mua kujingulula to.

7 Ne mfumu wakamuambila ne: Mumvua nyingalala bua ntatu ya bantu banyi, ngakenzeja ne bantu makumi ne asatu ba ku bantu banyi bâsa luendu tshipela, nanku bua bafika ku bulaba bua Zalahemela, bua tulomba kudi bana betu batupatuisha ku bupika.

8 Ne bakajimina mu tshipela bua mutantshi wa matuku a bungi, kadi bavua bananukidi, ne kabakapeta bulaba bua Zalahemela to kadi bakapingana ku bulaba ebu, bikala benza luendu mu bulaba munkatshi mua mâyi a bungi, bikala bajandula bulaba buvua buwula ne mifuba ya bantu, ne ya nyama, ne kabidi buvua buwula ne bibutu bia nzubu ya mishindu yonsu, bikala bajandula bulaba buvua buwula kala ne bantu bavua ba bungi bu misumba ya Isalele.

9 Ne bua bujadiki bua ne malu avuabu bamba avua malelela, bakalua ne bitata makumi abidi ne binayi bivua biwula ne mikanunu, ne bivua bia ngolo munonoka.

10 Ne monayi, kabidi, bakalua ne bibuikilu bia pa tshiadi, bidi bialabala, ne bidi bikala bia tshiamua tshia kalabi ne bia tshiamua tshia kabanda, ne bidi bikala bikamakana bijima.

11 Ne kabidi, bakalua ne miela ya mvita, bikuatshilu biayi bivua binyanguka, ne bitâtu biayi bivua bikuata dimomena; ne kakuvua muntu nansha umua mu bulaba avua mua kuandamuna muakulu anyi mikanunu idi pa bitata ebi to. Bua nanku ngakakuebeja ne: Udi mua kuandamuna anyi?

12 Ne nkuambila nanku kabidi: Udi mumanya muntu udi mua kuandamuna anyi? Bualu ndi njinga ne miandiku eyi yandamunyibua mu muakulu wetu; bua, pamuapa, itupesha dimanya dia tshishadi tshia bantu bavua babutuka, kuvua miandiku eyi mifumina; anyi, pamuapa, ne itupesha dimanya dia bina bantu aba bavua babutuka; ne ndi njinga kumanya tshiena bualu tshia dibutuka diabu.

13 Mpindiewu Amona wakamuambila: Ndi mua kukuambila ne dijadika, Ô mfumu, kudi muntu udi mua kuandamuna miandiku; bualu udi ne bia kutangila nabi, ne kukudimuna miandiku idi mikala ya ku matuku a kala; ne tshidi dipa dia Nzambi. Ne bintu abi bidi bibikidibua ne biandamunyi bia miakulu, ne kakuena muntu udi mua kutangilamu amu Nzambi mumupesha mukenji, tshianana yeya mutangila bivuaye kayi ne bua kutangila ne afua. Ne ewu yonsu udi Nzambi mupesha mukenji bua kutangila mu biobi, yeya awu udi ubikidibua ne mumonyi.

14 Ne mona, mfumu wa bantu badi mu bulaba bua Zalahemela ki muntu udi ne mukenji wa kuenzela bintu ebi, ne udi ne dipa dinena edi tshia Nzambi.

15 Ne mfumu wakamba ne mumonyi udi munena kupita muambi.

16 Ne Amona wakamba ne mumonyi udi kabidi mubuluidi ne muambi; ne muntu kena mua kupeta dipa dia kupita edi to, amu yeya muikala ne bukola bua Nzambi, budi muntu kayi mua kuikala nabu to; kadi muntu udi mua kuikala ne bukola bunena bumupeshela kudi Nzambi.

17 Kadi mumonyi udi mua kumanya bintu bikadi bipita, ne kabidi bintu bitshilualua, ne ku njila wabi bintu bionsu nebibuluibua, anyi, nansha bintu bia mu musokoku ne bimueneshibua, ne bintu bisokoka ne bipatuka patoka, ne bintu bidi kabiyi bimanyibua ne bimanyishibua kudibi, ne kabidi bintu nebimanyishibua ku njila wabi bidi mushindu mukuabu kabiyi mua kumanyibua to.

18 Nanku Nzambi udi mulongolola njila bua muntu enza bishima bikola ku njila wa ditabuija; bua nanku ulua diambuluisha dinena kudi bakuenda.

19 Ne mpindiewu, pakajikija Amona kuakula mêyi â mfumu wakasanka menamena, ne wakela Nzambi tuasakidila, wamba: kakuena mpata to ne bualu busokoka budi munda mua bitata ebi, ne kakuena mpata to ne biandamunyi bia miakulu ebi bivua bilongolola bua kipatshila ka kujingulula malu masokoka awu kudi bana ba bantu.

20 Ô bu mudiyi minena midimu ya Mukalenga, ne bu mudiwu mula mutantshi udiye utukijila bantu benda; eyowa, ne bu mudiwu mpofu ne kayi munzuluka ngumvuilu wa bana ba bantu; bualu badi babenga kukeba lungenyi, anyi kabena bajinga ne lubakôkesha to!

21 Eyowa, badi bu tshisumbu tshia mikoko mipâla idi inyema mulami wa mikoku, idi itangalaka, ne inyemeshibua, ne ikusudibua kudi nyama ya mu dîtu.