1 Monayi, bana betu, kanuena nuvuluka ne nuvua babala mêyi a muambi Zenose, avuaye muakula kudi nzubu wa Isalele wamba:

2 Teleja, Ô wewa nzubu wa Isalele, ne umvua mêyi anyi, muambi wa Mukalenga.

3 Bualu mona, Mukalenga udi wamba nanku, nenkufuanyikija, Ô nzubu wa Isalele, ku mutshi wa olive mudima, uvua muntu muangata ne mudisha mu budimi buenda bua olive; ne wakakola, ne wakakulakaja, ne wakatuadija kunyanguka.

4 Ne biakalua ne mfumu wa budimi bua olive wakaya, ne wakamona ne mutshi wa olive wenda wakatuadija kunyanguka; ne wakamba: Nengupempa, ne nengumbula ku nseka yawu, ne nengudisha, bua ne pamuapa udi mua kupatula matamba mapia-mapia ne a mateketa, ne kawufu to.

5 Ne biakalua ne wakawupempa, ne wakumbula ku nseka yawu, ne wakawudisha bilondeshila dîyi dienda.

6 Ne biakalua ne kunyima kua matuku a bungi wakatuadija kupatula kakesa, matamba mapia-mapia ne a mateketa; kadi mona, katongobela kawu kakatuadija kufua.

7 Ne biakalua ne mfumu wa budimi bua olive wakawumona, ne wakambila musadidi wenda: Bidi binnyingalaja bua kujimija mutshi ewu; bua nanku, ndâku utula matamba ku mutshi wa olive wa tshisuku ne u’antuadila apa; ne netutula matamba manena awu avua mabanga kufubidila, ne netuayimansha mu kapia, bua ôshibua.

8 Ne mona, Mukalenga wa budimi bua olive udi wamba, ndi ngumbusha matamba â a bungi mapia-mapia ne a mateketa, nengalamatshisha ponsu pa ngasua; ne kakuena bualu to bua ne nansha muji wa mutshi ewu mulua kufua, ndi mua kulama bimuma biawu buanyi mema nkayanyi; bua nanku, nengangata matamba â mapia-mapia ne a mateketa, ne nengalamatshisha ponsu pangasua.

9 Angata matamba a mutshi wa olive wa tshisuku, ne u’alamatshishaku, pa muaba wayi; ne â andi mutula nenyimansha mu kapia ne nenyôsha, bua ka’akutakaji buloba bua budimi bua olive buanyi to.

10 Ne biakalua ne musadidi wa Mukalenga wa budimi bua olive wakenza bilondeshila dîyi dia Mukalenga wa budimi bua olive, ne wakalamatshishaku matamba a mutshi wa olive wa tshisuku.

11 Ne Mukalenga wa budimi bua olive wakumbuisha ku nseka yawu, ne wakawupempesha, ne wakawudishisha, wambila musadidi wenda ne: Bidi binnyingalaja bua kujimija mutshi ewu; bua nanku, ndi muenza nanku bua pamuapa ngikala mua kulama miji yawu bua kayifu to, bua ngikala mua kudilaminayi.

12 Bua nanku, ndâku, utangila mutshi, ne uwudisha, bilondeshila mêyi anyi.

13 Ne â, nengateka mu tshitupa tshia kuinshi menamena tshia budimi bua olive buanyi, konsu ku ngasua, ki ntshikutangila to; ne ndi ngenza nanku bua ndilamina matamba a ntuadijilu a mutshi; ne kabidi, bua mema ndilamina bimuma bua tshikondu; bualu bidi binnyingalaja bua kujimija mutshi ewu ne bimuma biawu.

14 Ne biakalua ne Mukalenga wa budimi bua olive wakaya njila wenda, ne wakasokoka matamba a ntuadijilu a mutshi wa olive mudima mu bitupa bia kuinshi menamena bia budimi bua olive, amua mu tshitupa tshimua ne makuabu mu tshitupa tshikuabu, bilondeshila ku disua dienda ne disanka dienda.

15 Ne biakalua ne matuku a bungi akapita, ne Mukalenga wa budimi bua olive wakambila musadidi wenda: Luaku, tupueka mu budimi bua olive, bua tuenza mudimu mu budimi bua olive.

16 Ne biakalua ne Mukalenga wa budimi bua olive, ne musadidi kabidi, bakapueka mu budimi bua olive bua kuenza mudimu. Ne biakalua ne musadidi wakambila mfumu wenda: Mona, tangila eku, mona mutshi.

17 Ne biakalua ne Mukalenga wa budimi bua olive wakatangila ne wakamona mutshi uvua matamba a mutshi wa olive wa tshisuku malamatshishibuaku; ne ukavua musasa ne mutuadija kukuama bimuma. Ne wakamona ne uvua muimpa; ne bimuma biawu bivua bu bimuma bia ntuadijilu.

18 Ne wakambila musadidi: Mona, matamba a mutshi wa tshisuku apetshi tshitalela tshia muji wawu, ne muji wawu mufila bukola bua bungi; ne bualu bua bukola bua bungi bua muji wawu, matamba a tshisuku akuami bimuma bidima. Mpindiewu, bu tuetu katuyi balamatshishaku matamba â, mutshi wawu uvua kufua. Ne mpindiewu, mona, ne ndama bimuma bia bungi, bidi mutshi wabi mukuama; ne bimuma biawu ne ndama bua tshikondu, buanyi mema nkayanyi.

19 Ne biakalua ne Mukalenga wa budimi bua olive wakambila musadidi wenda: Luaku, tuya mu tshitupa tshia kuinshi menamena tshia budimi bua olive, ne tumona matamba a ntuadijilu a mutshi ne ka’ena makuama pawu bimuma bia bungi, bua mona mua kulama bimuma biawu bua tshikondu, buanyi mema nkayanyi.

20 Ne biakalua ne bakaya muaba uvua mfumu musokoka matamba a ntuadijilu a mutshi, ne wakambila musadidi: Mona â; ne wakamona diakumpala divua dikuama bimuma bia bungi; ne wakamona kabidi ne bivua bimpa. Ne wakambila musadidi: Angata bimuma biawu, ne ubilama bua tshikondu, bua mona mua ku bilama buanyi nkayanyi; bualu mona, wakamba ne, diba dila edi ndi muwudisha, ne wakuami bimuma bia bungi.

21 Ne biakalua ne musadidi wakambila mfumu wenda: Munyi mûdi mulua apa kukuna mutshi ewu, anyi ditamba dia mutshi edi? Bualu mona, tshivua tshitupa tshibi tshipita mu bulaba bonsu bua budimi bua olive bueba.

22 Ne Mukalenga wa budimi bua olive wakamuambila: Kumbedi to; mvua mumanya ne tshivua tshitupa tshibi tshia buloba, bua nanku, ngakakuambila, mvua muwudisha diba dila edi, ne udi umona ne mukuama bimuma bia bungi.

23 Ne biakalua ne Mukalenga wa budimi bua olive wakambila musadidi wenda: Tangila eku; mona, ndi mukuna ditamba dikuabu dia mutshi kabidi; ne udi mumanya ne tshitupa tshia buloba etshi tshivua tshibi tshipita tshia kumpala. Kadi, tangila mutshi. Ndi muwudisha diba dila edi, ne wakuami bimuma bia bungi; bua nanku, bisangisha, ne bilama bua tshikondu, bua mona mua kubilama buanyi mema nkayanyi.

24 Ne biakalua ne Mukalenga wa budimi bua olive wakambila kabidi musadidi wenda: Tangila eku, ne mona kabidi ditamba dikuabu, dindi mukuna; mona ne ndi muwudisha kabidi, ne diakuami bimuma.

25 Ne wakambila musadidi wenda: Tangila eku ne mona dia ndekelu. Mona, edi ndi mudikuna mu tshitupa tshimpa tshia buloba; ne ndi mudidisha diba dila edi, ne amu tshitupa tshimua tshia mutshi tshidi tshikuama bimuma bidima, ne tshitupa tshikuabu tshia mutshi tshidi tshikuama bimuma bia tshisuku; mona, ndi mudisha mutshi ewu momumua ne mikuabu.

26 Ne biakalua ne Mukalenga wa budimi bua olive wakambila musadidi: Tula matamba adi ka’ayi makuama bimuma bimpa, ne ayimansha mu kapia.

27 Kadi mona, musadidi kumuambila: Tuwupempayi, ne tumbulayi ku nseka yawu, ne tuwudishayi kakesa kupita, bua pamuapa udi mua ku kukuamina bimuma bimpa, bua umona kubilama bua tshikondu.

28 Ne biakalua ne Mukalenga wa budimi bua olive ne musadidi wa Mukalenga wa budimi bua olive bakadisha bimuma bionsu bia mu budimi bua olive.

29 Ne biakalua ne mutantshi mula wakapita, ne Mukalenga wa budimi bua olive wakambila musadidi wenda: Luaku, tupueka mu budimi bua olive, bua tuenza mudimu kabidi mu budimi bua olive. Bualu mona, diba dikadi pa buipi, ne nshikidilu udi ulua mpindiewu; bua nanku, ndi ne tshia kulama bimuma bua tshikondu, buanyi mema nkayanyi.

30 Ne biakalua ne Mukalenga wa budimi bua olive ne musadidi bakapueka mu budimi bua olive; ne bakafika ku mutshi kuvua matamba a ntuadijilu matuka, ne matamba a tshisuku malamatshishibuaku; ne mona bimuma bia mishindu yonsu bivua bikutakaja mutshi.

31 Ne biakalua ne Mukalenga wa budimi bua olive wa kalabula bimua bimuma, mishindu yabu yonsu bilondeshila bungi buabio. Ne Mukalenga wa budimi bua olive wakamba: Mona, diba dila dionsu edi tuvua badisha mutshi ewu, ne ndi mulama bimuma bia bungi bua tshikondu buanyi mema nkayanyi.

32 Kadi mona, musangu ewu mukuama bimuma bia bungi, ne kakuena nansha tshimua tshidi tshimpa. Ne mona, kudi mishindu yonsu ya bimuma bibi; ne kabiena bimpesha tshipeta tshimpa to, nansha bua mudimu wetu onsu; ne mpindiewu bidi binnyingalaja bua kujimija mutshi ewu.

33 Ne Mukalenga wa budimi bua olive wakambila musadidi: Netuenza tshinyi ku mutshi, bua mona mua kulama kabidi bimuma bimpa buanyi mema nkayanyi?

34 Ne musadidi wakambila mfumu wenda: Mona, bualu uvua mulamatshishaku matamba a mutshi wa olive wa tshisuku avua madisha miji, ki padiwu ne moyo ne kîna mafua to; bua nanku udi umona ne itshidi mimpa.

35 Ne biakalua ne Mukalenga wa budimi bua olive wakambila musadidi wenda: Mutshi kawena umpesha tshipeta tshimpa to, ne miji yawu kayena impesha tshipeta tshimpa to pikalaye ukuama bimuma bibi.

36 Kadi, ndi mumanya ne miji idi mimpa, ne bua kipatshila kanyi ndi muyilama; ne bua bukola buayi bupita ivua mikuama bimuma bimpa tô ne mpindiewu, ku matamba a tshisuku.

37 Kadi mona, matamba a tshisuku akasasa ne akatamba miji yawu bukola; ne bualu bua matamba a tshisuku matshimuna miji yabu, mukuama mamuma mabi a bungi; ne mona, bualu bua mukuama mamuma mabi a bungi udi umona ne ukadi utuadija kufua; ne ulua katataka muboba bua wowu kuimanshibua mu kapia, pa kumbusha tuetu bawenzela tshintu bua kuwulama.

38 Ne biakalua ne Mukalenga wa budimi bua olive wakambila musadidi wenda: Tupueka mu bitupa bia kuinshi menamena bia budimi bua olive, ne tumona matamba a ntuadijilu ne makuama pawu mamuma mabi.

39 Ne biakalua ne bakapueka mu bitupa bia kuinshi menamena bia budimi bua olive. Ne biakalua ne bakamona ne bimuma bia matamba a ntuadijilu bivua binyanguka pabi; eyowa, dia kumpala ne dibidi ne dia ndekelu kabidi; ne bivua bionsu binyanguka.

40 Ne bimuma bia tshisuku bia dia ndekelu bivua bitshimuna tshitupa tshia mutshi tshivua tshikuama bimuma bimpa, mena ne ditamba diakafubidila ne diakafua.

41 Ne biakalua ne Mukalenga wa budimi bua olive wakadila, ne wakambila musadidi: Tshinganyi tshimvua mua kuikala muenza kupita bua budimi bua olive buanyi?

42 Mona, mvua mumanya ne bimuma bionsu bia budimi bua olive, pa kumbusha ebi, bivua bilua binyanguka. Ne mpindiewu â avua umua musangu makuama bimuma bimpa alu pawu manyanguka; ne mpindiewu, mitshi yonsu ya mu budimi buanyi bua olive kayina mimpa to amu bua kupudibua ne kuedibua mu kapia.

43 Ne mona wa ndekelu ewu, udi ditamba diawu difubidila, mvua muwukuna mu muaba wa buloba muimpa; eyowa, uvua mena wa disungula kundi ku mutu kua bitupa bikuabu bionsu bia bulaba bua budimi bua olive buanyi.

44 Ne wakamona ne mvua kabidi mukosa bivua bikutakaja tshitupa tshia buloba etshi, bua mema kukuna mutshi ewu pa muaba wabi.

45 Ne wakamona ne tshitupa tshiawu tshivua tshikuama bimuma bimpa, ne tshitupa tshiawu tshivua tshikuama bimuma bibi; ne bualu ntshivua mutula matamba awu ne muyimansha mu kapia, mona, matshimuna ditamba dimpa mu mushindu ne diakafubidila.

46 Ne mpindiewu, mona, nansha kukuba konsu kutuvua benzela budimi bua olive buanyi, mitshi yawu yavu minyanguka, mu mushindu ne kayena ikuama bimuma bimpa to; ne mvua mutekemena kulama eyi, bua kudilamina bimuma biayi bua tshikondu. Kadi, mona, idi milua bu mutshi wa olive wa tshisuku, ne kayena ne mushinga amu bua kupudibua ne kuedibua mu kapia; ne bidi binnyingalaja bua kuyijimija.

47 Kadi tshinyi tshimvua mua kuenza kupita mu budimi bua olive buanyi? Mvua mutekesha tshianza tshianyi, ne ntshivua mubudisha anyi? To, mvua mubudisha, ne mvua mumbula ku nseka yabu, ne mvua mubupempa, ne mvua mubufukisha; ne mvua môlola tshianza tshianyi pabuipi ne dituku dijima, ne nshikidilu ukadi pabuipi. Ne bidi binnyingalaja bua kûpula mitshi yonsu ya budimi bua olive buanyi, ne kuyimansha mu kapia bua yôshibua. Nganyi wanyangi budimi bua olive buanyi?

48 Ne biakalua ne musadidi wakambila mfumu wenda: Nki bula bua budimi bua olive bueba anyi—matamba abu ki matshimuna miji idi mimpa anyi? Ne bualu matamba matshimuna miji yawu, mona avua makola lukasa kupita bukola bua miji, angata bukola bua nkayawu. Mona, ndi ngamba, nki bua bualu ebu budi mitshi ya budimi bua olive bueba milua minyanguka anyi?

49 Ne biakalua ne Mukalenga wa budimi bua olive wakambila musadidi: Tuyaku ne tûpula mitshi ya mu budimi bua olive ne tuyimansha mu kapia, bua kayilu kukutakaja buloba bua budimi bua olive buanyi to, bualu ndi muenza bionsu. Tshinyi tshimvua mua kuenza kupita bua budimi bua olive buanyi?

50 Kadi, mona, musadidi wakambila Mukalenga wa budimi bua olive: Buepelesha kabidi mutantshi mukesa.

51 Ne Mukalenga wakamba: Eyowa, nembuepelesha kabidi mutantshi mukesa, bualu bidi binnyingalaja bua kujimija mitshi ya mu budimi bua olive buanyi.

52 Pa nanku, tuangatayi amua a matamba a eyi amvua mukuna mu bitupa bia kuinshi menamena bia budimi bua olive buanyi, ne tu’alamatshisha ku mutshi kuvuawu maluila; ne tutulayi ku mutshi matamba awu adi ne bimuma bia bululu bupita, ne tulamatshishaku matamba a ntuadijilu pa muaba wawu.

53 Ne nengenza nanku bua mutshi kawufu to, bua, pamuapa, ndi bua kudilamina miji yawu bua kipatshila kanyi nkayanyi.

54 Ne, mona, miji ya matamba a ntuadijilu a mutshi umvua mukuna muaba onsu umvua musua itshidi ne moyo; bua nanku, bua kuyilama kabidi bua kipatshila kanyi nkayanyi, nengangata matamba a mutshi ewu, ne nengalamatshisha kudiwu. Eyowa, nendamatshishaku matamba a mutshi wayi wa ku mbangilu, bua mema kudilamina miji kabidi buanyi nkayanyi, bua pâluayi ne bukola bukumbana pamuapa adi mua kunkuamina bimuma bimpa, ne ndi ne mua kupeta kabidi butumbi mu mamuma a budimi bua olive buanyi.

55 Ne biakalua ne bakangata matamba a mutshi a ntuadijilu akavua malua a tshisuku, ne ku alamatshisha ku mitshi ya ntuadijilu, ikavua payi milua ya tshisuku.

56 Ne bakangata kabidi imua mitshi ya ntuadijilu ikavua milua ya tshisuku, ne bakayilamatshisha ku mutshi wayi wa ku mbangilu.

57 Ne Mukalenga wa budimi bua olive wakambila musadidi: Kutudi matamba a tshisuku ku mitshi to, pa kumbusha adi mapita bululu; ne mu yoyi neulamatshisha bilondeshila mundi muamba.

58 Ne netudisha kabidi mitshi ya budimi bua olive, ne netupempa matamba ayi, ne netutula ku mitshi matamba adi makola, adi ne tshia kûma, ne netuyimansha mu kapia.

59 Ne ndi ngenza nanku bua ne, pamuapa, miji yayi idi mua kupeta bukola bualu bua buimpa buayi; ne bua dishintulula dia matamba, bua buakana butshimuna bibi.

60 Ne bualu ndi mulama matamba a ntuadijilu ne miji yawu, ne ndi mulamatshishaku matamba a ntuadijilu kabidi ku mutshi wawu wa ku mbangilu, ne ndi mulama miji ya mutshi wayi wa ku mbangilu, bua, pamuapa, mitshi ya budimi bua olive buanyi idi mua kukuama kabidi bimuma bimpa, ne bua mpeta disanka kabidi bua bimuma bia budimi bua olive buanyi, ne, pamuapa ndi mua kusanka bikola bualu ndi mulama miji ne matamba a bimuma bia kumpala—

61 Bua nanku, ndâku, ne bikila basadidi, bua tuenza mudimu ne dinanukila ne bukola buetu mu budimi bua olive, bua tulongolola njila, bua nkuamisha kabidi bimuma bia ntuadijilu, bimuma bia ntuadijilu ebi bidi bimpa ne bilenga bipita bimuma bikuabu bionsu.

62 Bua nanku, tuyayi ne tuenza mudimu ne bukola buetu musangu wa ndekelu ewu, bualu monayi nshikidilu ukadi pabuipi, ne musangu ewu ngua ndekelu ungapempa budimi bua olive buanyi.

63 Lamatshishayi matamba; tuadijayi ne a ndekelu bua alua a kumpala, ne bua a kumpala alua a ndekelu, ne umbulayi ku nseka ya mitshi, yonsu ya kala ne ya miteketa, ya kumpala ne ya ndekelu; ne ya ndekelu ne ya kumpala, bua yonsu idishibua kabidi bua musangu wa ndekelu.

64 Bua nanku, umbulayi ku nseka yayi, ne ipempayi, ne ifukishayi kabidi, bua musangu wa ndekelu, bualu nshikidilu ukadi pabuipi. Ne bikalabi nanku ne malamatshishibu a ndekelu â neasasa, ne neakuama bimuma bia ntuadijilu, nanku nenuyilongoluela njila, bua amona mua kusasa.

65 Ne pikalawu matuadija kusasa nenumbusha matamba adi akuama bimuma bia bululu, bilondeshila ku bukola bua mimpa ne bula buawu; ne kanumbushi mabi musangu umua to, bua miji yawu kayilu kupita dilamatshishibua bukola, ne dilamatshishibua diawu kadifu, ne ntshijimiji mitshi ya budimi bua olive buanyi.

66 Bualu bidi binnyingalaja bua kujimija mitshi ya mu budimi bua olive buanyi; bua nanku, nenumbusha matamba mabi bilondeshila muikala mimpa asasa, bua muji ne katongobela bikumbanangana ku bukola, tô ne pikala mimpa matshimuna mabi, ne pupudibua mitshi mibi ne pedibua mu kapia, bua kayikutakaji buloba bua budimi bua olive buanyi to; ne nanku nengumbusha mitshi mibi mu budimi bua olive buanyi.

67 Ne matamba a mutshi wa ntuadijilu nendamatshisha kabidi ku mutshi wa ntuadijilu;

68 Ne matamba a mutshi wa ntuadijilu nendamatshisha ku matamba a ntuadijilu a mutshi; ne nanku nengasangisha pamua kabidi, bua akuama mamuma a ntuadijilu, ne neikala amua.

69 Ne mabi neimanshibua, eyowa, pambelu pa bulaba bua budimi bua olive buanyi bonsu; bualu monayi, amu musangu ewu umua nempempa budimi bua olive buanyi.

70 Ne biakalua ne Mukalenga wa budimi bua olive wakatuma musadidi wenda; ne musadidi wakaya ne wakenza muvua Mukalenga mumuambila, ne wakalua ne basadidi bakuabu; ne bavua bakesa.

71 Ne Mukalenga wa budimi bua olive wakabambila; Ndayi, ne enzayi mudimu mu budimu bua olive, ne bukola buenu. Bualu monayi, ewu udi musangu wa ndekelu ungadisha budimi bua olive buanyi; bualu nshikidilu ukadi pabuipi, ne tshikondu tshidi tshifika lukasa; ne nuenu benza mudimu ne bukola buenu pamua nanyi, nenupeta disanka bua bimuma bingadilamina bua tshikondu tshialua katataka.

72 Ne biakalua ne basadidi bakaya ne bakenza mudimu ne bukola buabu; ne Mukalenga wa budimi bua olive wakenza mudimu pamua nabu; ne bakatumikila mikenji ya Mukalenga wa budimi bua olive mu bintu bionsu.

73 Ne kuakatuadija kuikala bimuma bia ntuadijilu mu budimi bua olive; ne matamba a ntuadijilu akatuadija kusasa ne kutanta menamena; ne matamba a mu tshisuku akabanga kutudibua ne kuimanshibua; ne bakalama miji ne katongobela kabu momumua, bilondeshila bukola buawu.

74 Ne nanku bakenza mudimu, ne dinanukila dionsu, bilondeshila mikenji ya Mukalenga wa budimi bua olive, mena tô ne paki suikibua matamba mabi pambelu pa budimi bua olive, ne pakadilamina Mukalenga mu mushindu ne mitshi yakalua bimuma bia ntuadijilu kabidi; ne biakalua bu mubidi umua; ne bimuma bivua momumua; ne Mukalenga wa budimi bua olive uvua mudilamina bimuma bia ntuadijilu, bivua ne mushinga mupita kudiye kumbukila ku mbangilu.

75 Ne biakalua ne pakamona Mukalenga wa budimi bua olive ne bimuma bienda bivua bimpa, ne budimi bua olive buenda kabuvua kabidi bunyanguka to, wakabikila basadidi benda, ne wakabambila: Monayi, bua musangu wa ndekelu ewu tuakadisha budimi bua olive buanyi; ne nudi bamona ne ndi muenza bilondeshila disua dianyi; ne ndi mulama bimuma bia ntuadijilu, mu mushindu ne bidi bimpa, nansha bu muvuabi ku mbangilu. Ne nudi babeneshibua; bualu, bualu nuvua bananukidi mu dienza nanyi mudinu mu budimi bua olive buanyi, ne nuvua balama mikenji yanyi, ne nuantuadidi kabidi bimuma bia ntuadijilu, ne budimi bua olive buanyi kabuena kabidi bunyanguka to, ne bimuma bibi bidi bimanshibua, monayi, nenupeta disanka nanyi bua bimuma bia budimi bua olive buanyi.

76 Bualu monayi, bua mutantshi mula nendilamina bimuma bia budimi bua olive buanyi bua tshikondu, tshidi tshilua katataka; ne bua musangu wa ndekelu ndi mudisha budimi bua olive buanyi, ne mubupempa, ne mububundulula ku nseka, ne mubufukisha; bua nanku nendilamina bimua bimuma, bua mutantshi mula, bilondeshila ku tshimvua muamba.

77 Ne pikala diba dilua dikala bimuma bibi bilua kabidi mu budimi bua olive buanyi, apu nensangishisha bimpa ne bibi; nendama bimpa buanyi mema nkayanyi, ne nengimansha bibi pa muaba wabi nkayabu. Ne pashisha tshikondu ne ndekelu nebilua; ne nengôshisha budimi bua olive buanyi ne kapia.