1 Mêyi a Yakoba, muanabu ne Nefi, akambaye kudi bantu ba Nefi, kunyima kua lufu lua Nefi:

2 Mpindiewu, bana betu bananga, mema, Yakoba, bilondeshila mudimu undi nawu kumpala kua Nzambi, wa kunemesha mudimu wanyi ne mutshima mushindama, ne bua kumbusha mibi yenu ku bilamba bianyi, ndi mbanda lelu mu ntempelo bua kunumanyisha dîyi dia Nzambi.

3 Ne nudi bamanya nuenu nkayenu ne tô ne mpindiewu ndi munanukila mu mudimu wa dibikila dianyi; kadi dituku edi ndi ngumvua bujitu bua dijinga ne dipampakana bua diakalenga dia anyima yenu binena kupita bimvua ntshiyi muanji kuikala nabi tô ne mpindiewu to.

4 Bualu monayi, tô ne mpindiewu, nudi batumikila ku dîyi dia Mukalenga dindi munupesha.

5 Kadi monayi, telejayi kundi, ne manyayi ne ku diambuluisha dia Mufuki wa diûlu ne wa buloba wa bukola bonsu ndi mua kunuambila bitangila meji enu, munudi bikala nubanga kuenzela mibi, mibi idi imueneka kundi ne mikala ya bubi bukola, eyowa, ne bubi bukola kudi Nzambi.

6 Eyowa, bidi bikengesha anyima wanyi ne bidi bimpingaja panyima ne bundu kumpala kua Mufuki wanyi, ne ndi ne bua kunujadikila bitangila bubi bua mitshima yenu.

7 Ne kabidi bidi binkengesha ne ndi ne tshia kuamba mêyi makola bua bualu buenu, kumpala kua bakaji benu ne bana benu, ba bungi badi ne biumvuilu bipita bulenga, ne binonoka, ne biteketa kumpala kua Nzambi, bualu budi busankisha Nzambi;

8 Ne bidi bingelesha meji ne mbabanda bua kumvua dîyi dia Nzambi didi disankisha, eyowa, dîyi didi diôndopa anyima mutapika.

9 Bua nanku, bidi binemeja anyima wanyi ne ngenzejibua, bua bualu bua mukenji mukola umvua mupeta kudi Nzambi, dia kunudimuisha bilondeshila mibi yenu, bua kudiundisha mputa ya aba bakadi batapika, pamutu pa kusamba ne kôndopa mputa yabu; ne aba badi kabayi batapika, pamutu pa kutshionkomoka pa dîyi dilenga dia Nzambi, badi ne tuela tujula bua kubatubula anyima yabu ne kutapa meji abu mateketa.

10 Kadi nansha bunena bua mudimu, ndi ne tshia kuenza bilondeshila mikenji mikola ya Nzambi, ne kunuambila bitangila bubi buenu ne malu mapita bubi enu, ku mpala kua ba mutshima mukezuka, ne ba mutshima mutshibuluka, ne ku ditua dia disu didi ditubula dia Nzambi wa Bukitu Bonsu.

11 Bua nanku, ndi ne tshia kunuambila bulelela bilondeshila butoka bua dîyi dia Nzambi. Bualu monayi, bu mumvua muebeja Mukalenga, ki mudi dîyi dimvuila, diamba ne: Yakoba, banda mu ntempelo malaba, ne manyisha dîyi dingakupesha kudi bantu aba.

12 Ne mpindiewu, monayi, bana betu, etshi ki dîyi dindi nnumanyisha, ne ba bungi munkatshi muenu mbatuadija kukeba ngolo, ne biamua bia tubanda, ne mishindu yonsu ya biamua bia mushinga mukola bidi bulaba ebu, budi bulaba bua dilaya bualu buenu, ne bualu bua ndelanganyi yenu, nebivulangana.

13 Ne tshianza tshia Mulongolodi ntshitua mumuemua pa mutu penu ne disanka dinena, mu mushindu ne nudi bapeta mabanji a bungi; ne bualu bamua benu mbapeta bivula kupita bana benu nuadibandishi mu diditambisha dia mitshima yenu, ne nudi ne nshingu mîminyina ne mitu mûlu bua mishinga ya bilamba bienu, ne nudi nukengesha bana benu bualu nudi nuela meji ne nudi babapita.

14 Ne mpindiewu, bana betu, nudi nuela meji ne Nzambi udi unubingisha mu bualu ebu anyi? Monayi, ndi nnuambila ne, To. Kadi udi unupîsha, ne panuikala nutungunuka mu malu â, bitungu bienda bidi ne tshia kulua kunudi lukasa.

15 Ô ne yeya anuleja ne udi mua kunutubula, ne ne ditua dimua dia disu dienda udi mua kunutûta mu lupuishi!

16 Ô ne yeya anumbusha ku malu mabi â ne malu mapita bubi â! Ne Ô ne nuenu nuteleja dîyi dia mikenji yenda; ne kanulekedi diditambisha edi dia mitshima yenu dibutula anyima yenu!

17 Elelayi bana benu meji bu kunudi nuenu nkayenu, ne ikalayi balunda ba bonsu ne bianza biunzulula ne bintu bienu, bua bikala babanji bu nuenu.

18 Kadi kumpala kua kukeba mabanji, kebayi bukalenga bua Nzambi.

19 Ne kunyima kua nuenu bapeta ditekemena munda mua Kilisto nenupeta mabanji, binua’akeba; ne nenu’akeba mu dijinga dia kuenza bimpa; bua kuvuadika badi butaka, ne bua kudisha badi ne nzala, ne bua kulekesha bakuatshibu, ne bua kupesha dikuatshisha kudi babêdi ne batatshishibua.

20 Ne mpindiewu, bana betu ndi munuambila bua bidi bitangila diditambisha; ne ba munkatshi muenu badi batatshisha mukuenu, ne badi bamukengesha bualu nuvua nuditambisha mu mitshima yenu bua bintu bidi Nzambi munupesha, nudi nubuambila tshinyi?

21 Kanuena nuela meji ne malu a mushindu ewu adi malu mapita bubi kudiye wakafuka musunyi onsu anyi? Ne umua udi ne mushinga ku mesu kuenda bu mudi mukuabu. Ne musunyi onsu udi wa ku lupuishi; ne bua ndekelu wa momumua udiyi mubafuka, bua ne balama mikenji yenda ne bamutumbisha bua kashidi.

22 Ne mpindiewu, ndi njikija kunuambila pa bidi bitangila diditambisha edi. Ne bu mema ntshiyi ne bua kunuambila pa bubi budi bupita kutonda, mutshima wanyi uvua mua kusanka bikola bua bualu buenu.

23 Kadi dîyi dia Nzambi didi dinnemeja, bualu bua mibi yenu idi mipita kutonda. Bualu monayi, mudi Mukalenga wamba ne: Bantu aba bakadi babanga kukola mu bubi; kabena bumvua mifundu, bualu badi bakeba kudibingisha mu dienda dia masadi, bualu bua bintu bivua bifundibua bitangila Davidi ne muanenda Salomone.

24 Monayi, Davidi ne Salomone, bulelela, bavua ne bakaji ne bakaji ba ku mpenga babakibua ba bungi, tshintu tshivua tshibi tshipita kumpala kuanyi, mudi Mukalenga wamba.

25 Bua nanku, Mukalenga udi wamba ne: Ndi mupatula bantu aba mu bulaba bua Yelushalema, ku bukola bua diboku dianyi, bua ndibishila ditamba diakana ku mamuma a mu tshifuka tshia Yosefe.

26 Bua nanku, mema, Mukalenga Nzambi, ntshiakulekela ne bantu aba benza bu bobu ba kala to.

27 Bua nanku, bana betu, ngumvuayi, ne telejayi dîyi dia Mukalenga: Bualu kakuakuikala muntu muluma umua munkatshi muenu amu udi ne mukaji umua; ne bakaji ba ku mpenga babakibua kakuikala nansha ne umua to;

28 Bualu mema, Mukalenga Nzambi, ndi nsankila mu bunonoka bua bantu bakaji. Ne masandi adi malu mapita bubi kumpala kuanyi; ki mudi Mukalenga wa Misumba wamba.

29 Bua nanku, bantu aba nebalama mikenji yanyi, mudi Mukalenga wa biluilu wamba, tshianana bulaba nebutshipibua bua bualu buabu.

30 Bualu Mukalenga wa Misumba udi wamba ne, mema musua kudibishila ndelanganyi, nentumina bantu banyi mukenji; tshianana badi ne tshia kumvuila malu â.

31 Bualu monayi, mema Mukalenga, ndi mumona dibungama, ne ndi mumvua muadi wa bana ba bakaji ba bantu banyi mu bulaba bua Yelushalema, eyowa, ne mu malaba onsu a bantu banyi, bua bualu bua bubi ne malu mapita bubi bia babayabu.

32 Mukalenga wa Biluilu udi wamba ne, Ne ntshiakulekela ne mbila ya bana ba bakaji balenga ba bantu aba, bandi mupatula ku bulaba bua Yelushalema ibanda tô ne kundi bualu bua bantu baluma ba bantu banyi, mudi Mukalenga wa biluilu wamba.

33 Bualu kabakuangata bakuatshibu bana ba bakaji ba bantu banyi bualu bua buteketa buabu, amu mema mubakumbula ne mutshipu mukola, tô ne ku dibutuka; bualu kabadia kuenda masandi to, bu bobu ba kala, mudi Mukalenga wa Biluilu wamba.

34 Ne mpindiewu, monayi, bana betu, nudi bamanya ne mikenji eyi ivua mipeshibua kudi tatuetu, Lehi; bua nanku nudi badianjila kuyimanya, ne nudi balua mu dipîshibua dinena, bualu nudi benza malu â anuvua kanuyi mua kuenza to.

35 Monayi, nudi benza malu mabi makola kupita bana betu bena Lamana. Nudi batshibula mitshima miteketa ya bakaji benu ne nudi bajimija lulamatu lua bana benu, bualu bua tshilejilu tshienu tshibi kumpala kuabu; ne kudila kua mitshima yabu kudi kubanda kudi Nzambi bualu buenu. Ne bualu bua bukola bua dîyi dia Nzambi didi dipueka bua dibingisha dienu, mitshima ya bungi idi mifua, mitubuka ne mputa miondoka.