Mukanda wa Yakoba
Muanabu ne Nefi wa baluma

1 Bualu monayi, biakalua ne bidimu makumi atanu ne bitanu biakadi bipita katshia ku tshikondu tshivua Lehi mumbuka ku Yelushalema; bua nanku, Nefi wakampesha mema, Yakoba, mukenji mutangila bitata bikesa padi malu â makanunyibua.

2 Ne wakampesha mema, Yakoba, mukenji ne mfunda pa bitata ebi malu makesa amvua ngangata ne adi ne mushinga mukola mupita; ne ntshilengi, amu kakesa, bitangila malu a kala a bantu aba badi babikidibua ne bantu ba Nefi.

3 Bualu wakamba ne malu a kala a bantu benda neakanunyibua pa bitata bienda bikuabu, ne mvua ne bua kukuba bitata ebi ne kubipitshisha kudi ndelanganyi yanyi, ku tshikondu ne tshikondu.

4 Ne bikalaku diyisha divua dia tshijila, anyi dibuluila divua dinena, anyi diamba ku Nyuma, ne mvua ne bua kukanuna biena bualu biabi binena pa bitata ebi, ne mbitangulula monsu mudibi mua kuenjibua, bua bualu bua Kilisto, ne bua bimpa bia bantu betu.

5 Bua bualu bua ditabuija ne dipampakana dikola, bivua bimueneshibua bulelela kutudi bitangila bantu betu, malu kayi abenzekela.

6 Ne tuvua ne mabuluila a bungi, ne nyuma wa buambi muvula; bua nanku, tuvua bamanya bitangila Kilisto ne bukalenga buenda, bualua.

7 Bua nanku, tuakenza mudimu ne dinanukila munkatshi mua bantu betu, bua kubitabujija bua kuluabu kudi Kilisto, ne kuangata buimpa bua Nzambi, bua babuela mu dikisha dienda, bua ne, mu mushindu mukuabu, mu tshiji tshienda, kalu kuditshipa ne kababuedimu to, bu mu diyobola, mu matuku a ditêtshibua, patshivua bana ba Isalele mu tshipela.

8 Bua nanku, tudi tujinga kudi Nzambi bua tuikala mua kuitabujija bantu bonsu bua kabatombokedi Nzambi, bua kumuyobola bua afîka munda, kadi bua bantu bonsu bitaba mu Kilisto, ne bamona lufu luenda, ne bambula mutshi wenda mutshiamakana ne bambula bundu bua ba pa buloba; bua nanku, mema, Yakoba, ndi ngangata pa mutu panyi bua kukumbaja mukenji wa muanetu Nefi.

9 Mpindiewu, Nefi wakabanga kukulakaja, ne wakamona ne uvua katataka ne tshia kufua; bua nanku, wakalâba mutu manyi bua kuikala mfumu ne mukôkeshi pa bantu benda mpindiewu, bilondeshila ku bumfumu bua bamfumu.

10 Bantu bikala bananga Nefi bikola, yeya wakadi mukubi munena wabu, muikala muambula muela wa mvita wa Labana bua kubakuba, ne muikala muenza mudimu mu matuku enda onsu bua diakalenga diabu—

11 Bua nanku, bantu bavua basua kulama tshivulukilu tshia dîna dienda. Ne ewu yonsu uvua ukôkesha pa muaba wenda uvua mubikidibua kudi bantu ne Nefi muibidi, Nefi muisatu, ne amu nanku, bilondeshila bumfumu bua bamfumu; ne ki muvuabu bababikidibua kudi bantu nanku, nansha dîna diabu dikala dikuabu.

12 Ne biakalua ne Nefi wakafua.

13 Kadi, aba bavua kabayi Bena Lamana bavua Bena Nefi; nansha nanku, bavua babikidibua ne, Bena Nefi, Bena Yakoba, Bena Yosefe, Bena Zolama, Bena Lamana, Bena Lemuele ne Bena Yishemaela.

14 Kadi mema, Yakoba, ntshiakubatapulula kabidi ku mêna awu nansha, kadi ne mbikila ne Bena Lamana aba badi bakeba mua kubutula bantu ba Nefi, ne aba badi balunda ba Nefi, nembabikila ne Bena Nefi, anyi bantu ba Nefi, bilondeshila bumfumu bua bamfumu.

15 Ne mpindiewu, biakalua ne bantu ba Nefi, mu bumfumu bua mfumu muibidi, bakabanga kupapisha mitshima yabu ne kudifila kakesa mu bienzedi bibi, bifuanangana ne bia Davidi wa kala uvua ujinga bakaji ne bakaji ba ku mpenga babakibua ba bungi, ne kabidi Salomone, muanenda.

16 Eyowa, ne bakatuadija kabidi kukeba ngolo wa bungi ne biamua bia kabanda, ne bakabanga kakesa kudibandisha mu diditambisha.

17 Bua nanku, mema, Yakoba, ngakabapesha mêyi â, pamvua mbalongesha mu ntempelo, diambedi mema mumana kupeta dituma dianyi, kudi Mukalenga.

18 Bualu mema, Yakoba, ne muanetu Yosefe, tuvua bajididibua bakuidi ne balongeshi ba bantu aba ku tshianza tshia Nefi.

19 Ne tuakanemeka mudimu wetu kudi Mukalenga, tuangata pa mutu petu bujitu, tuitaba mibi ya bantu pa mitu yetu nkayetu bituapanga kubalongesha dîyi dia Nzambi ne dinanukila; bua nanku, ku dikuata dia mudimu ne bukitu buetu mashi abu kâkuikala pa bilamba bietu to; tshianana mashi abu nealua pa bilamba bietu, ne katuakusanganyibua katuyi ne katoba to ku dituku dia ndekelu.