1 Kadi monayi, mema, Yakoba, ndi musua kunuambila nuenu badi ne mutshima mukezuka. Tangilayi kudi Nzambi ne dikamakana dia meji ne musambilayi ne ditabuija dikola ne neanusamba mu makenga enu, ne neanulumubuluila, ne neatuma bululama buenda pa mutu pa badi bakeba dibutuka dienu.

2 Ô nuenu bonsu badi ne mutshima mukezuka, julayi mutu ne angatayi dîyi dilenga dia Nzambi ne sankilayi mu dinanga dienda; bualu nudi mua kuenza nanku bua kashidi, pikala meji enu makamakana.

3 Kadi diakabi, diakabi kunudi nuenu badi kanuyi ne mutshima mukezuka to, badi bakoya dituku edi kumpala kua Nzambi; bualu bulaba nebutshipibua bua bualu buenu, pa kumbusha nuenu bakudimuna mutshima; ne Bena Lamana, badi kabayi bakoya bunudi, nansha nanku mbatshipibua ne mutshipu mukola, nebanunyasula tô ne ku dibutuka.

4 Ne tshikondu tshidi tshilua ne lukasa, bua ne amu nuenu bakudimuna mutshima nebangata bulaba bua bupianyi buenu, ne Mukalenga Nzambi neumbusha bakana munkatshi muenu.

5 Monayi, bena Lamana, bana benu, banudi nunyoka bua bukoya buabu ne bua mulawu udi mulua pa dikoba diabu, badi bakana banupita, bualu kabena bapua moyo mukenji wa Mukalenga, uvua mupeshibua kudi tatuetu—ne bikala amu ne mukaji umua, ne kabikadi nansha ne umua wa ku bakaji ba ku mpenga babakibua to, ne kakuikadi dienda dia masandi munkatshi muabu to.

6 Ne mpindiewu, mukenji ewu, badi batangila bua kuwulama; nanku, bualu bua ditangila edi, mu dilama dia mukenji ewu, Mukalenga Nzambi kakubabutula to, kadi neikala ne lusa kudibu; ne dituku dikuabu nebalua bantu babeneshibua.

7 Monayi, babayabu badi bananga bakaji babu, ne bakaji babu badi bananga babayabu; ne babayabu ne bakaji babu badi bananga bana babu, ne dipanga ditabuija diabu ne lukinu luabu kunudi bidi biluila ku bubi bua batatuabu; bua nanku, nudi babapita ku buakana ku mesu a Mufuki wenu ku tshinyi?

8 Ô bana betu, ndi ntshina amu nuenu bakudimuna mutshima ku mibi yenu, dikoba diabu nedikala ditoka dipita dienu, panuatuadibua nabu kumpala kua nkuasa wa butumbi wa Nzambi.

9 Bua nanku, ndi nupesha mukenji, udi muikala dîyi dia Nzambi, kanubapendi kabidi, bua bualu bua bufîkuluka bua makoba abu; kabidi kanubapendi bua bukoya buabu, kadi nenuvuluka bukoya buenu nkayenu, ne vulukayi ne bukoya buabu mbulua bualu bua batatuabu.

10 Pananku, nenuvuluka bana benu, mu mushindu unudi basâmisha mitshima yabu bualu bua tshilejilu tshinudi bateka kumpala kuabu; ne kabidi, vulukayi ne bua bualu bua bukoya buenu, nudi mua kuambula bana benu ku dinyanguka, ne mibi yabu isangishibua pa mitu yenu ku dituku dia nshikidilu.

11 Ô bana betu, telejayi mêyi anyi, julayi makokeshi a anyima yenu, dinyungushayi bua nubika ku tulu tua lufu, ne disuluilayi ku makenga a ngena bua kanulu banjelu ba diabulu, bua kuimanshibua mu dijiba dia kapia ne nsufulu didi dikala lufu luibidi.

12 Ne mpindiewu mema, Yakoba, ngakakula malu a bungi kupita kudi bantu ba Nefi, mbadimuisha bitangila buendenda ne majinga a mubidi, ne mishindu yonsu ya mibi, mbambila bipeta biayo bibi.

13 Ne tshia lukama tshimua tshia bienzedi bia bantu aba, badi babanga kuvula mpindiewu, katshiena mua kufundibua pa bitata ebi; kadi bia bungi bia ku bienzedi biabu bidi bifundibua pa bitata binena, ne mvita yabu, ne makokangana abu, ne bumfumu bua bamfumu babu.

14 Bitata ebi mbibikila ne bitata bia Yakoba, ne bivua bienza ku tshianza tshia Nefi. Ne ndi njikija kuamba mêyi â.