1 Ne mpindiewu biakalua panyima pa bimua bidimu bimana kupita, kua kalua muntu umua munkatshi mua bantu ba Nefi, muena dîna dia Shelema.

2 Ne biakalua ne wakatuadija kuyisha munkatshi mua bantu, ne kubambila ne kakuakuikala Kilisto to. Ne wakayisha bintu bia bungi bivua bia lubombu kudi bantu; ne uvua wenza nanku bua kutonkola diyisha dia Kilisto.

3 Ne wakenza mudimu ne dinanukila bua ne apambuisha mitshima ya bantu, mu mushindu ne wakapambuisha mitshima ya bungi; ne yeya mumanya ne mema, Yakoba, mvua ne ditabuija mu Kilisto walua, wakakeba bikola mushindu wa kulua kundi.

4 Ne uvua muyila, bu ne uvua ne dimanya dijima dia muakulu wa bantu; bua nanku, uvua mua kuenzela lubombu lua bungi, ne bukola bua mêyi bupita, bilondeshila bukola bua diabulu.

5 Ne uvua ne ditekemena dia kumbukula mu ditabuija, nansha kuikala mabuluila a bungi ne bintu bia bungi bimvua mumona bitangila malu â; bualu mvua bulelela mumona banjelu, ne bavua bansadila. Ne kabidi, mvua mumvua dîyi dia Mukalenga diakula kundi mu muaku menamena, ku tshikondu ne tshikondu; bua nanku ntshivua bua kubukudibua to.

6 Ne biakalua ne wakalua kundi, ne wakangambila mushindu ewu, wamba: Muanetu Yakoba, ndi mukeba bikola mushindu wa kuakula neba; bualu ndi mumvua ne ndi kabidi mumanya ne udi wendakana bikola, uyisha tshiwudi ubikila ne lumu luimpa, anyi diyisha dia Kilisto.

7 Ne udi mupambuisha bangi ba bantu aba mu mushindu ne badi banyangakaja njila muakana wa Nzambi; ne kabena balama mikenji ya Mose idi njila muakana to; ne badi bakudimuna mikenji ya Mose mu dikukuila dia muntu uwudi wamba ne nealua bidimu nkama ya bungi kumpala. Ne mpindiewu mona, mema, Shelema, ndi nkuambila ne etshi tshidi kupenda Nzambi; bualu muntu nansha umua kena mumanya bintu bu ebi to; bualu kena bua kumanya bintu bitshilualua to. Ne ku mushindu ewu Shelema wakakokangana nanyi.

8 Kadi monayi, Mukalenga Nzambi wakapumuina Nyuma wenda mu anyima wanyi, mu mushindu ne ngakamupuwisha mu mêyi enda onsu.

9 Ne ngakamuambila: Udi uvila Kilisto walua anyi? Ne wakamba: bikalaku Kilisto, ntshiakumuvila to; kadi ndi mumanya ne kakuena Kilisto to, ne kavuaku to, anyi kakuikalaku nansha.

10 Ne ngakamuambila: Udi witabuija mifundu anyi? Ne wakamba ne: Eyowa.

11 Ne ngakamuambila: Nanku kuena uyumvua to; bualu bulelela idi ijadika bua Kilisto. Mona, ndi nkuambila ne nansha umua wa bambi kavua mufunda, anyi muamba ku Nyuma kayi muakula bitangila Kilisto ewu to.

12 Ne ebi nki bionsu to—bivua bindeja, bualu ndi mumvua ne mumona; ne bidi kabidi bindeja ku bukola bua Nyuma wa Tshijila; bua nanku, ndi mumanya ne bikalaku kakuyi bupikudi buenzeka bukua bantu bonsu budi ne tshia kujimina.

13 Ne biakalua ne wakangambila: ndeja tshimanyinu tshimua ku bukola ebu bua Nyuma wa Tshijila, kuwudi mumanyina bia bungi nanku.

14 Ne ngakamuambila: Ndi nganyi bua mema kutêta Nzambi bua kukuleja tshimanyinu tshia tshintu tshiwudi mumanya ne tshidi tshilelela? Kadi neutshivila, bualu udi muena diabulu. Nansha nanku, disua dianyi kadienzeki; kadi Nzambi yeya mua kukutûta, atshi tshikala tshimanyinu kûdi ne udi ne bukola, bionsu mu diûlu ne pa buloba; ne kabidi, ne Kilisto nealua. Ne disua dieba, Ô Mukalenga, dienzeka, kadi dianyi to.

15 Ne biakalua ne pamvua mema, Yakoba, muakula mêyi â, bukola bua Mukalenga buakalua pa mutu penda, mu mushindu ne wakapona pa buloba. Ne biakalua ne wakadishibua bua mutantshi wa matuku a bungi.

16 Ne biakalua ne wakambila bantu: Disangishayi pamua malaba, bualu nemfua; pa nanku, ndi njinga kuakula ne bantu kumpala kua mema kufua.

17 Ne biakalua ne malaba, musumba wa bantu uvua musangishibua pamua; ne wakabambila patoka ne wakavila bintu bivuaye mubalongesha, ne wakatonda Kilisto, ne bukola bua Nyuma wa Tshijila, ne disadila dia banjelu.

18 Ne wakabambila patoka, ne uvua mudingibua kudi bukola bua diabulu. Ne wakakula bua ngena, ne bua tshiendelela, ne bua dinyoka dia tshiendelela.

19 Ne wakamba ne: Ndi ntshina ne ndi bua kuikala muenza bubi budi kabuyi bua kubuikidibua to, bualu ndi mushima Nzambi; bualu ndi muvila Kilisto, ne muamba ne ndi ngitabuija mifundu; ne idi bulelela ijadika buenda. Ne bualu ndi mushima Nzambi nanku ndi ntshina bikola ne tshilumbu tshianyi tshidi mua kuikala tshibi tshipita; kadi ndi ntonda kudi Nzambi.

20 Ne biakalua ne pavuaye muamba mêyi â kavua mua kuamba kabidi, ne wakakula moyo.

21 Ne pavua musumba wa bantu mumona ne uvua muakula bintu ebi pavuaye pabuipi ne kukula moyo, bakakema menamena, mu mushindu ne bukola bua Nzambi buakapona kudibu, ne bakatûtshika tô ne bakapona pa buloba.

22 Mpindiewu, tshintu etshi tshivua ntshisankisha mema, Yakoba, bualu mvua mutshilomba kudi Tatu wanyi uvua mu diûlu; bualu uvua mumvua lubila luanyi ne kuandamuna disambila dianyi.

23 Ne biakalua ne ditalala ne dinanga dia Nzambi bivua bipingajibua kabidi munkatshi mua bantu; ne bakakebulula mifundu, ne kabakumvuila kabidi mêyi a muntu mubi ewu kabidi to.

24 Ne biakalua ne mishindu ya bungi ivua milongolodibua bua kupinguluja Bena Lamana ku dimanya dia bulelela; kadi bivua bionsu tshianana, bualu bavua basanka mu mvita ne dimatshisha dia mashi, ne bavua ne lukinu lua tshiendelela kutudi, bana babu. Ne bavua bakeba ku bukola bua biluilu biabu bua batushipa diba dionsu.

25 Bua nanku, bantu ba Nefi bakadikolesha kumpala kuabu ne biluilu biabu, ne ne bukola buabu bonsu, beyemena kudi Nzambi ne lubuebua lua lupandu luabu; bua nanku, bakalua kabidi, batambi ba baluishi babu.

26 Ne biakalua ne mema, Yakoba, ngakabanga kukulakaja; ne miandiku ya bantu aba mikala milamibua pa bitata bikuabu bia Nefi, bua nanku, ndi nshikija miandiku eyi, manyisha ne ndi mufunda bilondeshila ku dimanya dianyi dionsu, ku diamba ne diba diakapita netu, ne kabidi matuku etu a moyo akapita bu mudi mu tshilota buetu, tuetu bikala bantu nkayetu ne bashindama, batambakanyi, bipatshibua ku Yelushalema, baledibua mu mpaji, mu tshipela, ne banyoka kudi bana betu, biakaleleja mvita ne makokangana; bua nanku, tuakadilakana matuku etu onsu.

27 Ne mema, Yakoba, ngakamona ne ndi ne tshia kupueka mu lukita luanyi mu tshitupa tshikesa, bua nanku, ngakambila muananyi wa baluma Enosha: Angata bitata ebi. Ne ngakamuambila bintu bivua muanetu Nefi mumpesha mukenji bua kuenza, ne wakalaya kutumikila bivua ku mikenji. Ne ndi njikija mifundu yanyi pa bitata ebi; mina mifundu idi mikala mikesa; ne ndi ndaya mubadi bua kashidi, ne ditekemena ne bana betu ba bungi nebikala mua kubala mêyi anyi. Bana betu, adieu.