1 Ne mpindiewu, monayi, bana betu, bu mumvua munuambila ne nengamba ku Nyuma, monayi, etshi ki buambi buanyi—ne bintu bivua muambi ewu Zenose muamba, bitangila nzubu wa Isalele, muvuaye mubifuanyikija ne mutshi wa olive mulelela, bulelela bidi ne tshia kuenzeka.

2 Ne dituku diatekayi tshianza tshienda kabidi bua musangu muibidi bua kuangatulula bantu benda, didi dituku, eyowa, mena musangu wa ndekelu, wikala ne basadidi ba Mukalenga nebaya ne bukola buenda, bua kudisha ne kupempa budimi bua olive buenda; ne kunyima kua abi, nshikidilu udi ulua katataka.

3 Ne bu mudibu babeneshibua aba badi benza mudimu ne dinanukila mu budimi bua olive buenda; ne bu mudibu batshipibua aba bipatshibua ku muaba wabu nkayabu! Ne buloba nebôshibua ne kapia.

4 Ne bu mudi Nzambi wetu ne lusa kutudi, bualu udi uvuluka nzubu wa Isalele, miji ne matamba bubidi buabi; ne udi ôlola bianza bienda kudibu dituku dionsu dijima; ne badi bantu ba nshingu mîminyina ne batontolodi; kadi bonsu badi kabayi bapapisha mitshima yabu nebapandishibua mu bukalenga bua Nzambi.

5 Bua nanku, bana betu bananga, ndi nusengelela ne mêyi a bushindama ne nukudimuna mutshima, ne nulua ne dijinga dia mutshima dionsu, ne nulamata kudi Nzambi bu mudiye munulamata. Ne bu mutshidi diboku dienda dia lusa dikala dinôluela mu bukenka bua mu munya kanupapishi mitshima yenu.

6 Eyowa, lelu, nuenu bumvua dîyi dienda, kanupapishi mitshima yenu to; bualu bua tshinyi nudi basua kufua?

7 Bualu monayi, kunyima kua bikala badishibua ne dîyi dilenga dia Nzambi dituku dijima, nenukuama mamuma mabi, bua nuikala bua kupudibua ne kuedibua mu kapia anyi?

8 Monayi, nenubenga mêyi â anyi? Nenubenga mêyi a bambi anyi; nenubenga mêyi onsu avua mamba bitangila Kilisto, kunyima kua ba bungi nanku bikala bakula bimutangila anyi; ne nenuvila dîyi dilenga dia Kilisto, ne bukola bua Nzambi, ne dipa dia Nyuma wa Tshijila, ne nenujima Nyuma wa Tshijila, ne nenuseka dilongolola dinena dia disungila, didi dilongolodibua buenu anyi?

9 Kanuena bamanya ne nuenu benza malu â, ne bukola bua disungila ne dibika ku lufu, budi mu Kilisto, nebunufikisha bua kuimana ne bundu ne dipîla dikola kumpala kua tshilumbuluidi tshia Nzambi anyi?

10 Ne bilondeshila ku bukola bua bululama, bualu bululama kabuena mua kuvidibua to, nudi ne tshia kuya mu dijiba dia kapia ne nsufulu, dia ndimi ya kapia idi kayiyi ijima to, ne dia muishi udi ubanda mûlu bua kashidi ne kashidi, dîna dijiba dia kapia ne nsufulu didi mpaji kayiyi ndekelu.

11 Ô nanku, bana betu bananga, kudimunayi mutshima, ne buelelayi ku tshibuelelu tshifinakana, ne tungunukayi mu njila udi mubumbakana, tô ne panuapeta moyo wa tshiendelela.

12 Ô ikalayi ne lungenyi; tshinyi tshindi mua kuamba kabidi?

13 Bua kumana, ndi nulaya, tô ne pangasambakena nenu kumpala kua tshilumbuluidi tshilenga tshia Nzambi, tshilumbuluidi tshina tshidi tshikuma bantu babi ne bôwa bubi ne ditshina. Amena.