1 Ne mpindiewu ndi njikija miandiku yanyi bitangila dibutuka dia bantu banyi, Bena Nefi. Ne biakalua ne tuakadianjila kumpala kua Bena Lamana.

2 Ne mema, Molomo, ngakafundila mfumu wa Bena Lamana mukanda, ne ngakajinga kudiye ne atuanyishila ne tusangisha bantu betu pamua mu bulaba bua Kumola, pabuipi ne kakuna kavua kabikidibua ne Kumola, ne aku tuvua mua kubaluisha.

3 Ne biakalua ne mfumu wa Bena Lamana wakanganyishila tshintu tshimvua mujinga.

4 Ne biakalua ne tuakâsa luendu batangila ku bulaba bua Kumola, ne tuakâsa ntenta yetu ku mpenga yonsu ya kakuna ka Kumola; ne bivua mu bulaba bua mâyi, misulu, ne mpokolo ya bungi; ne apa tuvua ne ditekemena bua kutamba Bena Lamana bukola.

5 Ne pakapita bidimu nkama isatu ne makumi muanda mukulu ne binayi, tuakasangisha bashadila bonsu ba bantu betu ku bulaba bua Kumola.

6 Ne biakalua ne patuakasangisha bantu betu bonsu pamua ku bulaba bua Kumola, monayi mema, Molomo, ngakabanga kukulakaja; ne muikala mumanya ne eyi ivua mvita ya ndekelu ya bantu banyi, ne muikala mupeshibua mukenji kudi Mukalenga ne ntshilekedi ne miandiku ivua mitushila kudi batatuetu, ivua mikala ya tshijila, imata mu bianza bia Bena Lamana to, (bualu Bena Lamana nebayinyangakaja), bua nanku ngakenza miandiku eyi ku bitata bia Nefi, ne ngakasokoka miandiku yonsu ivua minshîla ku tshianza tshia Mukalenga mu kakuna ka Kumola, pa kumbusha bitata bikesa ebi bimvua mupesha muananyi wa baluma Moloni.

7 Ne biakalua ne bantu banyi, ne bakaji babu ne bana babu, bakamona mpindiewu misumba ya basalayi ya Bena Lamana yenda mitangila kudibu; ne bakindila bua kubakidila ne bôwa bua lufu budi butshingisha bikola budi buwuja biadi bia bantu babi.

8 Ne biakalua ne bakalua kutuluisha, ne muntu yonsu uvua muwula ne ditshingishibua dikola bua bunena bua bungi buabu.

9 Ne biakalua ne bakaponela bantu banyi ne muela wa mvita, ne ne difuma, ne ne muketa, ne ne kasuyi, ne ne biluilu bia mvita bia mushindu onsu.

10 Ne biakalua ne bantu banyi bakupudibua, eyowa, mena binunu bianyi dikumi bivua nanyi, ne ngakapona mutapika munkatshi muabu; ne bankampita ku luseka bua ne kabakanshipa to.

11 Ne pakapitabu ne kûpulabu bantu banyi bonsu pa kumbusha makumi abidi ne banayi ba kutudi, (muananyi wa baluma Moloni uvua munkatshi amu) ne tuetu bikala bapanduka lufu luakafua bantu betu, pakatshiabu, pakapingana Bena Lamana ku bitudilu biabu, bafumina ku musongu wa kakuna ka Kumola, tuakamona bantu banyi binunu dikumi bavua bupudibua, bavua bikala balombodibua ku mutu kundi.

12 Ne tuakamona kabidi bantu banyi binunu dikumi bavua muananyi wa baluma Moloni ulombola.

13 Ne monayi, bakashipa binunu dikumi bia Gidigidona, ne uvua munkatshi muabu.

14 Ne Lama wakapona ne binunu bienda dikumi; ne Gilegala wakapona ne binunu bienda dikumi; ne Limaha wakapona ne binunu bienda dikumi; ne Yeneume ne binunu bienda dikumi; ne Kumeniha, ne Moloniha, ne Antionuma, ne Shibiloma, ne Shema, ne Yosha, bakapona muntu yonsu ne binunu dikumi bienda.

15 Ne biakalua ne kuvua balombodi bakuabu dikumi bakashipabu ku muela wa mvita, muntu yonsu ne binunu dikumi bienda; eyowa, bantu mena bonsu, bakashipabu, amu pa kumbusha makumi abidi ne banayi bamvua nabu, ne bakesa kabidi bavua banyemena ku matunga a ku sude, ne bakesa bavua batomboka baya kudisangisha kudi Bena Lamana; ne musunyi onsu, ne mifuba yonsu, ne mashi onsu bivua bilala pa mpala wa buloba, bilekela kudi bianza biakabashipa bua kubola pa bulaba, ne bua kusunsuka ne kupingana kudi mamuabu buloba.

16 Ne anyima wanyi wakapandika ne dipampakana, bua bualu bua bashipibu ba ku bantu banyi, ne ngakabila:

17 Ô nuenu balengela, munyi munuvua mua kumbuka ku njila ya Mukalenga! Ô nuenu balengela, munyi munuvua mua kupidia Yezu awu, uvua muimana ne maboku môlola bua kunuakidila!

18 Monayi, bu nuenu kanuyi benza nanku, kanuvua nupona to. Kadi monayi, nuaponyi, ne ndi ndila dijimina dienu.

19 Ô nuenu bana ba baluma ne ba bakaji bimpa kumona, nuenu batatu ne bamamu, nuenu baluma ne bakaji basela, nuenu bimpa kumona, munyi munuaponyi!

20 Kadi monayi, nuayi, ne kanyinganyinga kanyi kakena mua kunupinga to.

21 Ne dituku didi dilua katataka dikala mubidi wa tshifuaka wenu ne bua kuvuala mubidi udi kawuyi ufua, ne mibidi eyi idi mpindiewu inyanguka mu dibola idi ne tshia kulua katataka mibidi idi kayiyi ibola; ne pashisha nenuikala ne tshia kuimana kumpala kua nkuasa wa tshilumbuluilu tshia Kilisto, bua kulumbuluishibua bilondeshila ku midimu yenu; ne panuikala bakana, apu nenubeneshibua ne batatuenu bakaya kumpala kuenu.

22 Ô bu nuenu bakudimuna mutshima kumpala kua dibutuka dinena edi kunuluila. Kadi monayi, nuayi, ne Tatu, eyowa, Tatu wa Tshiendelela wa mu diûlu, udi mumanya ngikadilu wenu; ne udi wenza nuenu bilondeshila ku bululama buenda ne lusa luenda.